مۇگەدەك جاننىڭ ءۇمىتى

ول – «ايگەرىم» ءفيلمى سەمەيدە اتوم جوباسى ايا­سىندا كوپتەگەن شارالار لەگى ۇيىمداستىرىلۋدا. سونىڭ ءبىرى مۇگەدەك جاننىڭ تاعدىرىنا ارنالعان «ايگەرىم» كوركەم ءفيلمىنىڭ تۇساۋكەسەرى №3 مەكتەپتە ءوتتى. «جاس ۇلان» كينوستۋدياسىندا تۇسىرىلگەن بۇل ءفيلمنىڭ تاربيەلىك ءمانى زور, ادامداردىڭ ءبىر-بىرىنە قامقور بولۋىن جانە قوعامىمىزداعى مۇگەدەك جاندارعا قارايلاسۋعا ۇيرەتەدى, دەدى تۇساۋكەسەر بارىسىندا مەكتەپ ديرەكتورى نۇرجان احمەتقاليەۆ جوعارى سىنىپ وقۋشىلارىنا قاراتا. فيلم قازاقستان حالقى اسسامب­­لەياسىنىڭ تاپسىرىسى بويىنشا ءتۇ­سىرىلگەن. رەجيسسەرى ەركىن راقىشەۆ. ول جاستاي كوزى كورمەي قالعان ايگەرىم دەگەن قىزدىڭ اۋىر تاعدىرىنا قۇرىلعان. ايگەرىم ەسەيگەن شاعىندا تىگىنشى بولىپ جۇمىسقا ورنالاسادى. بىردە ول قولارباعا تاڭىلعان ەرلان ەسىمدى جىگىتپەن تانىسادى. ايگەرىممەن ارالاسا ءجۇرىپ ەرلاننىڭ ويىنا كىشكەنتاي كەزىندە ءبىر قىزدىڭ كوزىنە حيميالىق زات توگىپ, زاقىمداپ العانى تۇسەدى. ايتا كەتۋ كەرەك, بۇل ءفيلمنىڭ ستسەناري اۆتورلارىنىڭ ءبىرى سەمەيلىك جاس قالامگەر, مۇگەدەك جان نۇركەن بەكتاس. ءفيلمدى تاماشالاعان №3 مەكتەپتىڭ قازاق ءتىلى, ادەبيەتى ءپانىنىڭ مۇعالىمى گۇلزيا دۇيسەنقىزىنىڭ ايتۋىنشا, وسىنداي كينو بالالاردى ادامگەرشىلىككە تاربيەلەيدى. سەبەبى, ءفيلمدى تاماشالاپ وتىرساڭىز, قىتايدا لۋ دەگەن دارىگەر جاڭا پرەپارات ويلاپ تاپقانىن, ونىڭ ايگەرىمگە كومەگى ءتيۋى مۇمكىن ەكەندىگىن ايتادى. ەرلاننىڭ ءوزى جارىمجان ەكەندىگىنە قاراماستان قاراجاتىن ايگەرىمنىڭ كوزىنىڭ ەمىنە ۇسىنعاندىعىنا تولقىعان دارىگەر وتانى تەگىن جاسايتىندىعىن ايتادى. فيلم سوڭىندا جاس قىزدىڭ كوزى جازىلىپ كەتكەندىگىن كورگەن وقۋشىلاردىڭ دا قۋانىشىندا شەك بولمادى. بۇل تۇرعىدا 9 «ا» سىنىپ وقۋشىسى ءاسيما الىبەكوۆا, 8 «ب» سىنىپ وقۋشىسى اقساۋلە كارىباەۆالار ادام ءوز سەنىمىن ەشقاشان جوعالتپاۋ كەرەكتىگىن وسى فيلم­نەن ءۇي­رەنۋگە بولاتىندىعىن تىلگە تيەك ەتتى. ءفيلمنىڭ تۇساۋكەسەرىنە قاتىسقان اقىن, فيلولوگيا عىلىمدارىنىڭ كانديداتى مۇرات سۇلتانبەكوۆ مۇنداي ءفيلمدى وتاندىق تەلەارنالاردان كورسەتىپ, جاستار سىيلىعىنا ۇسىنعان ءجون ەكەندىگىن ايتتى. راۋشان نۇعمانبەكوۆا سەمەي