يۆانكا ترامپ – اقش رەسپۋبليكاشىلارىنىڭ جۇلدىزى

يۆانكا ترامپ – اقش پرەزيدەنتتىگىنە رەسپۋبليكاشىلار پارتياسى اتىنان ۇمىتكەر دونالد ترامپتىڭ قىزى. ول سوڭعى بىرەر كۇندە رەسپۋبليكاشىلار سەزىنىڭ جاڭا جۇلدىزى بولىپ شىعا كەلدى. اكەسى باعدارلامالىق باياندامامەن پارتيالاستارى الدىنا شىعاردا ونى دەلەگاتتارعا حابارلاعان دونالدتىڭ ايەلى مەلانيا ەمەس, تاپ وسى قىزى بولدى. يۆانكانىڭ مۇنداعى مىندەتتەرىنىڭ ءبىرى سايلاۋشى ايەلدەردى اكەسى جاعىنا قاراي بۇرىپ جىبەرۋ بولاتىن. ونىڭ بۇل ءسوزى جامان شىققان جوق. «مەنىڭ اكەمنىڭ مەنشىگىنە جاتاتىن كومپانيادا ەر كىسىلەردەن گورى ايەلدەر اناعۇرلىم كوپ. ايەلدەر اتقارعان جۇمىستارى ءۇشىن ايلىق جالاقىنى ەر كىسىلەرمەن بىردەي كولەمدە الادى. ال قىز-كەلىنشەكتەر انا اتانعان كەزدە ولارعا قاشاندا قولداۋ كورسەتىلىپ تۇرادى. مەنىڭ اكەم امەريكاعا ءوزىنىڭ بۇرىنعى ۇلىلىعىن اكەلەم دەپ ايتسا, ول قالايدا سونى جاسايدى», - دەدى يۆانكا قىسقاشا ءسوزىنىڭ بارىسىندا. 34 جاستاعى يۆانكا ترامپ – ءۇش بالانىڭ اناسى. بۇرىن ول مودەل بولىپ جۇمىس جاساعان. قازىر تابىستى بيزنەسۆۋمەن رەتىندە تانىلىپ ءجۇر.  Google الەۋمەتتىك جەلىسىنىڭ ىزدەستىرۋ جۇيەسىندە ونىڭ اتى اكەسىنەن گورى دە ءجيى كورىنەدى. يۆانكانىڭ كۇيەۋى بەلارۋس جەرىندە تۋىپ-وسكەن, بۇرىنعى پارتيزان ەۆرەيدىڭ ۇرپاعى. مۇرات ايتقوجا