اۋعانستاندا لاڭكەستىك شابۋىلدان 80-نەن استام ادام قازا تاپتى

[caption id="attachment_52813" align="aligncenter" width="700"] فوتو: ria.ru[/caption] اۋعانستان استاناسى كابۋل قالاسىندا جويقىن جارىلىس بولدى. وسىنىڭ سالدارىنان 80-نەن استام ادام قازا تاۋىپ, 200-گە جۋىعى زارداپ شەكتى. ريا «نوۆوستي» اقپارات اگەنتتىگىنىڭ مالىمەتىنە سايكەس, وقىس وقيعا حالىق كوبىرەك شوعىرلانعان جەردە بولعان. العاشىندا 60 ادامنىڭ قازا تاپقانى تۋرالى حابارلانعان. الايدا, اۋعانستاننىڭ ىشكى ىستەر مينيسترلىگى ولاردىڭ قاتارى 80-نەن اسقانىن مالىمدەدى. تاسس اقپارات اگەنتتىگىنىڭ حابارلاۋىنشا, جينالعان جۇرت باميان پروۆينتسياسىن ەلەكترمەن جابدىقتاۋ جۇمىسىن كەيىنگە قالدىرعانى ءۇشىن نارازىلىقتارىن بىلدىرگەن ەكەن. ءدال وسى كەزدە جانكەشتىلەردىڭ ءبىرى ءوزىن-ءوزى جارىپ جىبەرگەن. بۇدان بولەك تاعى ەكى سودىر لاڭكەستىك ارەكەتىن جۇزەگە اسىرماق بولىپتى. الايدا, بىرەۋىنىڭ جارىلعىش زاتى ىسكە قوسىلماي قالسا, ەكىنشىسىن كۇشتىك قۇرىلىم وكىلدەرى دەر كەزىندە بايقاپ الدىن العان. كوپ ۇزاماي تەررورلىق شابۋىلدى دايش لاڭكەستىك توبىنىڭ سودىرلارى جاساعانى بەلگىلى بولدى. كەيبىر مالىمەتتەردە كابۋل قالاسىندا ەكى بىردەي جارىلىس بولعانى ايتىلادى. الايدا, بۇل ازىرگە رەسمي تۇردە حابارلانعان جوق. ايان ءابدۋالي