بۇگىن گەرمانيانىڭ شۆاينفۋرت قالاسىندا توعىزقۇمالاقتان ەرلەر مەن ايەلدەر اراسىندا ەۋروپانىڭ اشىق چەمپيوناتى باستالدى.
دۇنيەجۇزىلىك توعىزقۇمالاق فەدەراتسياسى ءباسپاسوز قىزمەتىنىڭ حابارلاۋىنشا, چەمپيوناتقا گەرمانيا, فرانتسيا, گرەكيا, شۆەيتساريا, يسپانيا, رەسەي, چەحيا سەكىلدى وننان استام ەلدىڭ وكىلدەرى قاتىسىپ جاتىر. جارىس شۆەيتسار جۇيەسى بويىنشا وتەدى.
قۇرلىق چەمپيوناتىنىڭ اشىلۋ سالتاناتىنا دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ, قازاقستان مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ جانە شۆاينفۋرت قالاسىنىڭ مەرى كارل حاينتس كاۋچوك قاتىستى.
«توعىزقۇمالاق - قازاقتىڭ دۇنيەجۇزىلىك مادەنيەتكە قوسقان جارقىن ۇلەسىنىڭ ءبىرى. چەمپيونات - ينتەللەكتۋالدىق سايىس, مادەني شارا عانا ەمەس, مادەني مۇرامىزدى ناسيحاتتاۋ جولى. بۇل – دۇنيەجۇزىلىك فەدەراتسيانىڭ قۇرىلعان كۇنىنەن باستاپ العا قويعان مىندەتتەرىنىڭ ءبىرى», - دەپ اتاپ ءوتتى ءاليحان بايمەنوۆ.
دۇنيەجۇزىلىك فەدەراتسيا 2009 جىلدان بەرى توعىزقۇمالاقتان ءۇش رەت الەم چەمپيوناتىن وتكىزدى. ونىڭ سوڭعىسىنا 25 ەلدىڭ وكىلدەرى قاتىستى.
چەمپيوناتتاردىڭ وتۋىنە دىنمۇحاممەد ىدىرىسوۆ, كەڭەس راقىشەۆ, ەرلان ءاشىم, ماقسات رامانقۇلوۆ, ەرعالي يبراگيموۆ سەكىلدى وتاندىق كاسىپكەرلەر قولداۋ كورسەتىپ كەلەدى. سوڭعى جىلدارى مەملەكەت تاراپىنان دا توعىزقۇمالاقتى دامىتۋعا جۇيەلى كوڭىل اۋدارىلۋدا. قازىرگى تاڭدا توعىزقۇمالاقپەن اينالىساتىن قازاقستاندىقتار سانى 200 مىڭنان استى. الدا ازيا چەمپيوناتىن ۇيىمداستىرۋعا قىتاي وكىمەتى دە قولداۋ كورسەتۋگە نيەت ءبىلدىرىپ وتىر.
ەۋروپا چەمپيوناتى بارىسىنداعى حالىقارالىق تۋرنيرگە قازاقستان ۇلتتىق قۇراما كومانداسى مۇشەلەرى دە قاتىسىپ, شەتەلدىك سپورتشىلاردىڭ شەبەرلىگىن ارتتىرىپ, تاجىريبە جيناقتاۋىنا كومەك كورسەتەدى. جارىسقا قاتىسۋشىلار مەن توعىزقۇمالاق اۋەستەنۋشىلەرى – نەگىزىنەن ەۋروپا ەلدەرىندە تۇرىپ جاتقان جەرگىلىكتى حالىق.
چەمپيونات اياسىندا, سونداي-اق, ۇلتتىق ويىندى حالىقارالىق دەڭگەيدە ودان ءارى دامىتۋ ماسەلەلەرى دە كەڭىنەن تالقىلانادى.
چەمپيونات 24 شىلدە كۇنى مارەگە جەتەدى.
رۋسلان يگىلىك
