قوستاناي نەگە مۇنارتىپ تۇر؟

قوستاناي ەكى-ءۇش كۇننەن بەرى مۇنارتىپ تۇر. تۇماننان گورى تۇتىنگە كوبىرەك ۇقسايدى. سون­دىقتان بولار, قوستانايلىقتار ءورت ءسوندىرۋ جانە اپاتتان قۇتقارۋ قىزمەتىنە تەلەفون سوعىپ, بەيما­زالانعان. «كورشى رەسەي ورماندارى ورتەنىپ جاتىر ەكەن» دەگەن الىپ-قاشپا اڭگىمەلەر دە تەز ارادا تاراپ ۇلگەردى. اڭگىمەگە سەنگەندىكتەن بە, الدە باسقاداي بەيمالىم سەبەپتەن بە, العاشقى كۇنى قالالىقتاردىڭ مۇرنىنا ءتۇتىن ءيىسى كەلگەندەي بولدى. رەسەي جاقىن بولعانىمەن ونداعى ورماننىڭ ورتىنەن قوستاناي قالاسىن قاشانعى ءتۇتىن تۇمشالاپ تۇرماق؟ ال قالانى كىرەۋكەلەپ تۇرعان ءتۇتىن بولسا دا, تۇمان بولسا دا, ونىڭ ەرتەڭىنە قالىڭداي تۇسكەنى بايقالدى. دالا جەلكەم بولىپ تۇر, سوندا دا الگى ءتۇتىننىڭ تۇمشالانۋى كەتەر ەمەس. بىراق وبلىستىق توتەنشە جاعدايلار دەپارتامەنتىندەگىلەر رەسەي جاق­تا ورماننىڭ ورتەنگەنى تۋرالى ناقتى اقپارات جوق ەكەنىن ايتتى. ايتەۋىر تابيعاتتىڭ بۇل تىلسىمىنا اڭ-تاڭ قالعاندار كوپ. – مۇنى نەگىزى تابيعات قۇبى­لىسىنا جاتقىزعانىمىز دۇرىس بولار. ءبىزدىڭ وڭىردە ۇزاق ۋاقىت جاڭبىر جاۋدى, اۋانىڭ ىلعالى كوپ. تاڭەرتەڭگى, كەشكى ۋاقىتتا ىلعالدى اۋانىڭ اسەرىنەن اينالا تۇمشالانادى, تۇمان تۇسەدى, – دەدى ينجەنەر-سينوپتيك انتونينا شيبارشينا. ال كۇن­دىز كۇن ىسي باستاعاندا دا اينالانىڭ تۇ­ماندانۋى نەمەسە شاڭدانۋى سەكىلدى كورىنىس كەتپەي تۇر. بۇل ساۋالعا دا سينوپتيك ماماننىڭ ءوز بولجامى بار ەكەن. – بىزگە وڭتۇستىك باتىس ءسىبىر مەن وڭتۇستىك ورالدان اۋا اعى­سى كەلىپ جاتىر. ول وڭتۇستىك ورالداعى تولىپ جاتقان زاۋىتتار مەن وندىرىستىك كاسىپورىنداردان شىعاتىن ءتۇتىندى اكەلۋى مۇمكىن. سونىمەن قاتار, سىبىردە ورمان ورتەنىپ جاتۋى دا ىقتيمال عوي, ونىڭ ءتۇتىنى دە اۋا اعىسىمەن كەلىپ جاتقان بولار, – دەدى انتونينا شيبارشينا. ادەتتە, جەل سوققاندا سوناۋ سىبىردەگى تايگا تۇگىل, ءوزى­مىزدە ورتەنگەن ورماننىڭ ءتۇتىنى تاراپ كەتەر ەدى. ءسىبىر ورمانى مەن وڭتۇستىك ورالداعى زاۋىتتار تۇتىنىنە قوستاناي سۇرانىس بەرگەندەي, نەگە ول قالانى تۇمشالاپ كەتپەي تۇر؟ بۇل دا تابيعات قۇبىلىسى ما؟ جۇرتتىڭ ويى سان-ساقتا. ءنازيرا جارىمبەتوۆا, «ەگەمەن قازاقستان» قوستاناي