كارىزدىڭ كىناراتى

كولكىلدەگەن كوشەلەر وسكەمەندىكتەرگە ۆەنەتسيانى ەسكە سالدى سوڭعى كۇندەرى ءور التاي­دىڭ اسقاق شىڭدارىن ءجيى ءبۇر­كەپ الاتىن كوكشۋلان بۇلت­تار شىعىسقازاقستاندىق تۇر­عىنداردىڭ جازعى دەمالىسىن ويداعىداي وتكىزۋىنە مۇمكىندىك بەرمەۋدە. البەتتە, تابيعاتتىڭ جاراتىلىسىنا مويىنۇسىنباسقا لاجىمىز جوق. دەسە دە, قالا ينفراقۇرىلىمىنىڭ قولايسىزدىق تۋدىرۋى جەرگىلىكتى اكىمدىكتىڭ ارەكەتسىزدىگىنەن بە دەگەن ويعا قالدىرادى. ايتالىق, گازەتىمىزدە «نوسەر ءنوپىرى» (8 شىلدە, 2016 جىل) اتتى ماقالامىزدا قالىڭ جاۋعان جاۋىننان كوشەنى كول­كىلدەگەن سۋ العاندىقتان كارىز جۇيەلەرىنىڭ جۇمىسىندا كىنارات بارلىعىن جازعان ەدىك. الايدا, جوندەلگەن نەمەسە تازالانعان ارىق جوقتىعى تاعى بەلگىلى بولدى. بۇرناعى كۇنى ءتۇس الەتىندە ءبىر ساعاتقا جەتەر-جەتپەس جاۋىن-شاشىندا وبلىس ورتالىعىنىڭ كوشەلەرىندەگى كولىكتەر كورگەن جانعا ءجۇزىپ جۇرگەندەي اسەر قالدىردى. بەينەبىر وسكەمەندە ەمەس ۆەنەتسيادا جۇرگەندەيمىز, دەسەدى تۇرعىندار. اتاپ ايتقاندا, تولاسسىز جاڭبىردان جاڭا سوگرا, ميرنىي كەنتى, قالاداعى تاۋەلسىزدىك داڭعىلى مەن ميحاەليس كوشەسى جانە باسقا دا جەرلەردى سۋ باس­تى. تاۋەلسىزدىك داڭعىلىندا كولىك كەپتەلىسى ورىن الدى. وسىندا كەلە جاتقان ءبىز تىزەدەن سۋ كەشكەن تۇرعىندارعا, بەلۋارىنان مالتىعىپ جان-جاعىنا سۋ شاشا قوزعالعان كولىكتەرگە كۋا بولدىق. جەكە سەكتورلارداعى ۇيلەردىڭ ىرگەتاسىنا كوتەرىلگەن سۋ جەرتولەلەرگە دە قۇيىلدى. قالالىق توتەنشە جاعداي باس­قارماسى اۆرورا كوشەسىنىڭ تۇرعىنى كومەك سۇراعانىن, اۋلاسىنداعى 65 سانتيمەترلىك بيىكتىككە كوتەرىلگەن سۋدى سور­عىزىپ العانىن ايتادى. ال كوشەدەگى سۋدىڭ دەڭگەيى 85 سانتيمەترگە دەيىن كوتەرىلگەن بولاتىن. جالپى, قۇتقارۋشىلار جەكە ۇيلەر يەلەرىنىڭ تابيعاتتىڭ توسىن رايى­نا كەز كەلگەن ۋاقىتتا دايىن بولۋىن, سۋاعار ارىقتار جاساپ, قۇم تولتىرىلعان قاپتاردى ازىرلەپ قويۋ قاجەتتىگىن جەتكىزدى. ال ءبىزدىڭ قوس نوسەردەن تۇيگەن ويىمىز – قالا بيلىگى كوشە جيەكتەرىندەگى ارىقتار مەن كارىز جۇيەلەرىن جەدەل جاڭعىرتۋدى قولعا الۋى ءتيىس. دۋمان اناش, «ەگەمەن قازاقستان» وسكەمەن