«قايرات» قوناقتا «ماككابيدەن» 1:2 ەسەبىمەن جەڭىلدى (ۆيدەو)

بۇگىن تەل-اۆيۆ قالاسىندا فۋتبولدان ەۋروپا ليگاسىنىڭ ەكىنشى ىرىكتەۋ كەزەڭىندە ءيزرايلدىڭ «ماككابيى» مەن الماتىنىڭ «قايرات» كوماندالارى كەزدەستى. ويىن 2:1 ەسەبىمەن الاڭ يەلەرىنىڭ جەڭىسىمەن اياقتالدى. يزرايلدىكتەر ماتچتىڭ 5-مينۋتىندا ەسەپ اشتى. دوپتى ءبىزدىڭ ستانيسلاۆ لۋنەۆتى ەركىن الداپ وتكەن تال بەن-حايم قاقپانىڭ الىس بۇرىشىن ادەمى تاستادى. ءبىرازدان كەيىن ءبىزدىڭ جىگىتتەر ءوز-وزدەرىنە كەلىپ, قاۋىپتى شابۋىلدار ۇيىمداستىرۋعا كوشتى. تايم ورتاسىنا قاراي الاڭداعى جاعداي تەڭەستى. وسى تۇستا قايراتتىقتار ساپىندا اندرەي ءارشاۆيننىڭ بەلسەندىگى ايقىن بايقالدى. بىراق كوماندا بۇدان ارتىققا بارا المادى. الماتىلىقتار ەكىنشى تايمدى ەداۋىر قارقىندى باستادى. ولار اقىرى 64-مينۋتتا بۇرىشتامادان بەرىلگەن دوپ كەزىندە تارازى باسىن تەڭەستىردى. دوپتى بۇرىشتان يساەل اۋەلەتىپ جەتكىزدى دە, جەرار گوۋ ونى باسپەن قاتتى ۇرىپ, قاقپانىڭ تورىنان ءبىر-اق شىعاردى. https://youtu.be/SCUXepn1eJs قايراتتىقتاردىڭ بۇدان كەيىن دە گول سوعاتىن مۇمكىندىكتەرى كوپ بولدى. ءبىر اندرەي ءارشاۆينننىڭ ءوزى قاقپاعا بىرنەشە رەت تۋرا سوققى جاسادى. الايدا, ولاردىڭ ءبىرى نىسانادان ءسال قيسىق كەتسە, ەندى ءبىرىن قاقپاشى ۇستاپ الىپ جاتتى. مۇنىڭ ەسەسىنە, الاڭ يەلەرىنىڭ جولدارى بولىپ كەتتى. ولار 85-مينۋتتا  كەزەكتى شابۋىل ورىستەتتى. سونىڭ وتىندە جۇرگەن كوماندا كاپيتانى گال البەرمان دوپتى ءبىزدىڭ قاقپاشىنىڭ سول جاق بۇرىشىنان تورعا قاراي سۇڭگىتە سالدى. https://youtu.be/XqrbyT9v6iY ءبىر ايتا كەتەتىن جايت, الاڭ يەلەرى سيمۋلياتسيامەن قوناقتاردىڭ كوپ مازاسىن قاشىردى. كوپ جاعدايدا الاڭداعى پورتۋگاليالىق تورەشى سولاردىڭ وسى قيتۇرقى ارەكەتىنە ءتۇسىپ قالىپ جاتتى. وسىنىڭ جەلەۋىمەن ءبىزدىڭ بىرنەشە فۋتبولشى ەسكەرتۋ قاعازىن الىپ تا ۇلگەردى. ال يزرايلدىكتەر گولكيپەرىنىڭ ارشاۆين جاقىنداعاننان وتىرىك قۇلاپ, بۇراتىلىپ جاتىپ العانى ءتىپتى سوراقى بولدى. وسىنا اڭعارعان اربيتر تەك ماتچتىڭ سوڭىنا قاراي عانا جورتا قۇلاي سالاتىن يزرايلدىكتەردى جازالاي باستادى. بىراق مۇنىڭ ءبىز ءۇشىن ەشقانداي جەڭىلدىگى بولعان جوق. وسىنداي لاستاۋ ويىنمەن كوزگە تۇسكەن الاڭ يەلەرى جەڭىستى الىپ كەتتى. تاعى ءبىر ايتاتىن نارسە, الاڭداعى ەكى كوماندانىڭ دا باس جاتتىقتىرۋشىسى گرۋزين ماماندارى بولدى. اتاپ ايتقاندا, الاڭ يەلەرىن سايىسقا شوتا ارۆەلادزە دايىنداسا, مەيمانداردى كاحابەر تسحادادزە باستاپ باردى. كەزىندە بۇلاردىڭ ەكەۋى دە ءتبيليسيدىڭ «دينامو» كومانداسىنىڭ ساپىندا ويناعان. ەندى «ماككابي» ءۇشىنشى ىرىكتەۋ كەزەڭىندە رۋمىنيانىڭ «پاندۋري» كلۋبىمەن كەزدەسەدى. كوماندالاردىڭ ءبىرىنشى ويىنى 28 شىلدە كۇنى, ەكىنشى كەزدەسۋى 4 تامىزدا وتەدى. داستان كەنجالين