قۇمارپاز قىز

3 600 000 تەڭگەگە ۇتىلدى اقمولا وبلىسىنىڭ پولي­تسەيلەرى كوكشەتاۋ قالاسىنداعى بۋكمەرلىك كەڭسەلەردىڭ ءبىرىنىڭ كاسسير-وپەراتورىنىڭ ۇستىنەن قىلمىستىق ءىس قوزعادى. ول قۇمار­پازدىق شەڭگەلىنەن شىعا الماي, كومپانياعا تيەسىلى 3 600 000 تەڭگەگە جۋىق قارجىنى ۇتتىرىپ قويىپتى. بۋكمەرلىك كەڭسە ديرەك­تورىنىڭ شاعىمى بويىنشا پوليتسيا قىزمەتكەرلەرى تەكسەرۋ جۇمىستارىن ۇيىمداستىرىپ, 30 جاستاعى جەرگىلىكتى تۇرعىندى ۇستاعان. ول وسىندا ءۇش جىل بويى جۇمىس ىستەيدى ەكەن. كاسسيردىڭ قىزمەتتىك مىندەتىنە كليەنتتەردىڭ اقشاسىنا ءارتۇرلى ويىندارعا ستاۆكا قويىپ, جەڭگەن جاعدايدا ۇتىستارىن بەرىپ وتىرۋ كىرەدى. 16 شىلدە كۇنى ساعات 20.00-دە جۇمىسقا كەلگەن ول ارىپتەسىنەن كاسسانى قابىلداپ العان. ال, ساعات 21.00-دە سپورت ويىنىنا 100 000 تەڭگە اقشا تىگىپتى. بىراق ۇتىلىپ قالادى. قارجىنى قايتارۋ ماقساتىمەن تاعى دا 100 000 تەڭگەنى تىگەدى. بۇل جولى دا جولى بولمايدى. قۇمارپازدىق پەن ىزانىڭ جەتەگىندەگى قىز ءوزىن-ءوزى باقىلاۋدى قويىپ, ءۇستىن-ءۇستىن 15 (!) ستاۆكا جاساپتى. وكىنىشتىسى, ول وسىنىڭ بارىندە ۇتىلعان. اتالعان دەرەك بويىنشا قر قك 195-بابىنىڭ 4-بولىمىمەن قىلمىستىق ءىس قوزعالىپ, تەرگەۋ امالدارى جۇرگىزىلۋدە. باقبەرگەن امالبەك, «ەگەمەن قازاقستان» اقمولا وبلىسى