+41

ماڭعىستاۋدا كۇن كۇيىپ تۇر. ونسىز دا قاڭسىپ تۇرعان دالانىڭ اپشىسىن ودان سايىن قۋىرعان شىلدە قاھارىنا ءمىنىپ تۇر. ءجونى دە بار, ويتكەنى حالىق ۇعىمىنداعى «قىرىق كۇن شىلدە» باستالعالى دا ون كۇن. ماماندار تۇرعىندارعا ولكەدە قاتتى ىستىق بولۋى مۇمكىندىگىن, سول سەبەپتى ساق بولۋ قاجەتتىگىن الدىن الا ەسكەرتتى. سينوپتيكتەردىڭ ايتۋىنشا, قازىر ماڭعىستاۋدىڭ بىرقاتار وڭىرلەرىندە, اسىرەسە, بەينەۋ, قاراقيا جانە ماڭعىستاۋ اۋدان­دارىندا تەمپەراتۋرا +41 گرادۋسقا جەتكەن. جۇرتشىلىق كۇن ۇياسىنا باتقان كەش پەن ءتۇن­دى اسىعا كۇتىپ, كەڭ تىنىس­تاپ الۋ­عا اسىعاتىن بولسا, قازىر ماڭ­عىستاۋدا ءتۇننىڭ ءوزى اپتاپ بولىپ تۇر. ماماندار تۇنگى مەزگىلدىڭ +25-28 گرادۋستى كورسەتىپ تۇر­عان­دىعىن ايتۋدا. بۇل جاعداي ءوڭىر­دە جوعارى قان قىسىمىمەن اۋىراتىندار ءۇشىن جانە جۇرەگىندە اقاۋى بار جان­دار ءۇشىن وڭاي بولماي تۇر. ءبىر كۇن­دە اۋرۋحانالارعا بىرنەشە ادام ءتۇسىپ, دارىگەرلەر قاربالاسقا تۇسۋدە. وڭتۇستىك-شىعىستان سەكۋندىنا 7-12 مەتر جىلدامدىقپەن سوققان جەل قۇرعاق اۋانى ۇرلەپ, اڭىزاققا ۇلاسۋدا. ماماندار بۇل جاعدايدىڭ, ياعني +40 گرادۋستان اسقان ىستىقتىڭ شىلدە ايىنىڭ سوڭىنا دەيىن جالعاسۋى مۇمكىن ەكەندىگىن ايتۋدا. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى