چەمپيوندار ليگاسىنىڭ ەكىنشى ىرىكتەۋ كەزەڭىندە «استانا» ءوز الاڭىندا ليتۆانىڭ «جالگيريس» كومانداسىن قابىلدادى.
جانكۇيەرلەر بۇل كەشتە تارتىستى باسەكەنىڭ كۋاسى بولدى. قوس قاقپاعا ۇيىمداستىرىلعان الما كەزەك شابۋىلدار قاۋىپتى اياقتالىپ جاتتى.
«استانا» ويىندى شيراق باستادى. جۇيەلى ويىن كورسەتىپ, شابۋىلدارعا ءجيى شىعىپ تۇردى. ال «جالگيريس» ويىنشىلارى كەزدەسۋدىڭ بۇل بولىگىندە نەگىزىنەن قورعانۋمەن بولدى. نەناد ەريچتىڭ قاقپاسىن ءبىر-ەكى رەت نىساناعا الىپ كورگەنمەن, دەگەندەرىنە جەتە المادى.
ەسەسىنە الاڭ يەلەرى كەزەكتى شابۋىلىندا ەسەپ باسىن اشتى.
بۇرىشتامادان پاتريك ءتۆۋماسيدىڭ اۋەلەتكەن دوبىنا العاش بولىپ جەتكەن مارين انيچيچ ءوز كومانداسىن وسىلايشا العا شىعاردى.
وسىدان سوڭ بىرقاتار قاۋىپتى ءسات ورىن العانمەن, العاشقى تايم 1:0 ەسەبىمەن قالدى.
ويىننىڭ ەكىنشى بولىگىندە جاتتىقتىرۋشىدان جاڭا نۇسقاۋلار العان «جالگيريس» ويىنشىلارى باستاپقى مينۋتتاردا الاڭ يەلەرىنىڭ ادىمىن اشتىرمادى. جاڭادان ءوربىپ كەلە جاتقان شابۋىلدارىنا تويتارىس بەرىپ, دوپقا تالاس كەزىندە باسىمدىعىن كورسەتتى.
جەرگىلىكتى كوماندانىڭ كاپيتانى تاڭات نوسەرباەۆ جاراقاتىنا بايلانىستى الاڭنان كەتۋىنە ءماجبۇر بولدى. مىنە, وسىدان كەيىن قوناقتار قارقىنىن ودان سايىن ۇدەتتى. ناتيجەسىندە 57-مينۋتتا ەليۆەلتونىڭ سوققىسىنان كەيىن تارازى باسى تەڭەستى.
تەڭ ەسەپ «استانا» ءۇشىن ءتيىمسىز ەدى. سەبەبى, ەسەپ وزگەرىسسىز قالسا, كەلەسى ىرىكتەۋ كەزەڭىندە «جالگيريس» ونەر كورسەتەدى. وسىنى قاپەرىندە ساقتاعان الاڭ يەلەرى بارىن سالىپ شابۋىلدادى.
قوناقتار ۋاقىت سوزۋ ءۇشىن ءبارىن جاسادى. ادەتتەگىدەي, دوپقا تالاس كەزىندەگى جاعدايدا سيمۋلياتسياعا جول بەرگەن كەزدەرى دە بولدى.
بىراق «استانا» ءتىپتى, چەمپيوندار ليگاسىنىڭ فينالىندا ونەر كورسەتكەن «اتلەتيكو» كومانداسىنا دا «استانا ارەنا» ستاديونىندا ەسە جىبەرىپ كورمەگەن. بۇل ماتچتا دا سوڭعى مينۋتتارعا دەيىن مۇمكىندىكتەرىن ءمۇلت جىبەرمەۋگە تىرىستى.
ناتيجەسىندە, نەگىزگى 90 مينۋت اياقتالعاننان كەيىن قوسىمشا بەرىلگەن 3 مينۋتتىڭ 2-مينۋتىندا جەڭىستى گولدى سوقتى. تارتىستى ساتتەردىڭ بىرىندە مارين انيچيچ ءوزىنىڭ ەكىنشى دوبىن «جالگيريس» قاقپاسىنا توعىتتى.
دەر كەزىندە شابۋىلعا ارالاسقان مارين انيچيچ ەكى گولدىڭ اۆتورى اتانىپ, ءوز كومانداسىن وسىلايشا كەلەسى كەزەڭگە الىپ شىقتى.
«جانكۇيەرلەر
– كوماندانىڭ ون ەكىنشى ويىنشىسى» دەپ بوسقا ايتىلماعان بولسا كەرەك. ولاردىڭ كەرەمەت قولداۋى «استانانىڭ» كەلەسى كەزەڭگە وتۋىنە ۇلكەن سەپتىگىن تيگىزدى.
بۇگىن «سەلتيك» (شوتلانديا) پەن «لينكولن» (گيبرالتار) اراسىندا جاۋاپتى كەزدەسۋ وتەدى. بۇل ويىندا قاجەتتى ناتيجەگە قول جەتكىزگەن كوماندا «استانانىڭ» كەلەسى قارسىلاسى اتانادى. ايتا كەتەرلىگى, العاشقى ويىندا «لينكولن» 1:0 ەسەبىمەن جەڭىسكە جەتكەن بولاتىن.
ايان ءابدۋالي
فوتو: ەرلان وماروۆ
