مەملەكەت باسشىسى مادەنيەت جانە سپورت ءمينيسترىن قابىلدادى

[caption id="attachment_52218" align="aligncenter" width="640"] akorda.kz[/caption] ەلباسى مادەنيەت جانە سپورت ءمينيسترى ارىستانبەك مۇحامەدي ۇلىن قابىلدادى. Akorda.kz-ءتىڭ مالىمەتى بويىنشا, كەزدەسۋ بارىسىندا مينيسترلىك قىزمەتىنىڭ نەگىزگى باعىتتارى, سونىڭ ىشىندە ءدىن سالاسىنداعى زاڭنامالاردى ودان ءارى جەتىلدىرۋ شارالارى تالقىلاندى. قازاقستان پرەزيدەنتى مينيسترلىكتىڭ ءدىن سالاسىنداعى تۇراقتىلىقتى قامتاماسىز ەتۋدەگى جۇمىس تيىمدىلىگىن ارتتىرۋ قاجەتتىگىن اتاپ ءوتتى. نۇرسۇلتان نازارباەۆ سونداي-اق مادەنيەت سالاسىن جان-جاقتى دامىتۋدىڭ, ەل ازاماتتارىنىڭ پاتريوتتىق رۋحىن نىعايتۋدىڭ ماڭىزدىلىعىنا نازار اۋداردى. ا.مۇحامەدي ۇلى قازىرگى ۋاقىتتا ءدىني قىزمەت پەن ءدىني بىرلەستىكتەر تۋرالى زاڭناماعا جۇيەلى وزگەرىستەر ەنگىزۋ جونىندە جۇمىستار جۇرگىزىلىپ جاتقانىن ءمالىم ەتتى. سونىمەن قاتار, مادەنيەت جانە سپورت ءمينيسترى مەملەكەت باسشىسىنا ەل تاۋەلسىزدىگىنىڭ 25 جىلدىعىن وتكىزۋ جونىندەگى ءىس-شارالار جوسپارىن جۇزەگە اسىرۋدىڭ الدىن الا قورىتىندىلارى مەن قازاقستان سپورتشىلارىنىڭ الداعى ريو-دە-جانەيرودا وتەتىن وليمپيادا ويىندارىنا دايىندىعىنىڭ بارىسى تۋرالى باياندادى. ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى. ايدار ورىسباەۆ