ەلباسى اۋىل شارۋاشىلىعى ءمينيسترىن قابىلدادى

[caption id="attachment_52215" align="aligncenter" width="640"] akorda.kz[/caption] مەملەكەت باسشىسى پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆتى قابىلدادى. Akorda.kz-ءتىڭ حابارلاۋىنشا, كەزدەسۋدە ا.مىرزاحمەتوۆ پرەزيدەنتكە ەلىمىزدىڭ اگروونەركاسىپ كەشەنىنىڭ نەگىزگى دامۋ كورسەتكىشتەرى, كوكتەمگى ەگىس ناۋقانىنىڭ قورىتىندىلارى, سونداي-اق كۇزگى جيىن-تەرىن جۇمىستارىنا دايىندىق بارىسى تۋرالى باياندادى. نۇرسۇلتان نازارباەۆ جيىن-تەرىن ناۋقانىنا ساپالى دايىندالۋ جانە وتكىزۋ ءۇشىن قولايلى جاعداي جاساۋ قاجەتتىگىن اتاپ ءوتتى. مەملەكەت باسشىسى اۋىل شارۋاشىلىعىنداعى ەڭبەك ونىمدىلىگىن, سالانىڭ ەكسپورتتىق الەۋەتىن ۇلعايتۋدىڭ جانە اۋىل تۇرعىندارىنىڭ جۇمىسپەن قامتىلۋىن ارتتىرۋدىڭ ماڭىزدىلىعىنا توقتالدى. ا.مىرزاحمەتوۆ بيىل اۋىل شارۋاشىلىعىندا ەگىس القاپتارى بىلتىرعى دەڭگەيمەن سالىستىرعاندا 448 مىڭ گەكتارعا ارتىپ, 21,6 ملن گەكتارعا جەتكەنىن مالىمدەدى. جيىن-تەرىن جۇمىستارىنا دايىندىق اياسىندا ۇكىمەت ءتيىستى شارالار قابىلدادى, سونىڭ ىشىندە اگرارلىق كاسىپورىندار جالپى قۇنى 60 ميلليارد تەڭگەگە نەسيەلەندىرىلدى, اۋىل شارۋاشىلىعى ءونىمىن وندىرۋشىلەر ءۇشىن جانار-جاعارماي قۇنىن ارزانداتۋ ماسەلەسى قامتاماسىز ەتىلدى. ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى. ايدار ورىسباەۆ