سۋبۇرقاق رەتتەۋشى

ءبىزدىڭ ورامنىڭ تۇرعىندارى جۇمىس ورىندارىنا ورتالىق ساياباق ارقىلى وتەدى. وزگە كوشەلەردەگى كورشىلەرىمىز دە وسى جول­دى قالاپ تۇراتىنىن بايقايمىز. بۇل تۇسىنىكتى. جاڭا كۇندى كوكوراي بەلدى كەشىپ ءوتىپ باستاعان قانداي جاقسى!.. ساياباقتىڭ جاساۋى ۇنەمى جارقىراپ تۇرادى. اسىرەسە, سۋبۇرقاقتارمەن سىر جا­رىستىرىپ, قيال تەربەتكەنگە نە جەت­سىن. بۇل باقتا ولار تورتەۋ. ءبىر-بىرىنە ۇق­سامايدى. ورنالاستىرىلۋى, بەزەندىرىلۋى, قاينار بۇلاقتاي كوككە اتىلعان ءمولدىر سۋدىڭ كولەمى, ادەمى ىرعاقتاعى تەربەلىسى, بىلدىر-بىلدىر بال ءۇنى وزىنە تارتىپ, ەلىكتىرىپ الادى. جادىراپ قالاسىڭ. كۇنى بويى وسى عاجاپ كورىنىستىڭ ءارى تانبايدى. ۇلكەن مەن كىشى تۇگەل ءماز. دۋ-دۋمان استە تار­قامايدى. بۇل جەرگە كوگەرشىندەر دە قۇمار. سۋ جارىقتىق اق جايما بولىپ اسپانعا اتىل­عاندا اراسىنان كەمپىرقوساق وينايدى. بالالار ءۇشىن بۇدان ارتىق الاقاي قۋا­نىش جوق شىعار. كوبىسى قۇشاعىن جايىپ, سول كەمپىرقوساقتىڭ اياسىنا ەنىپ بارا جات­قانداعى سۋرەتتى ايتساڭىزشى! جاس جۇبايلاردىڭ گۇلجازيرا ءجۇزى شىرايلانىپ, اقساقالداردىڭ جاراسىمدى كەڭەسىنە كەنەلەسىڭ. سۇلۋلىققا ەلىتىپ وتىرىپ, وسى كورىنىس­تەردى جاسايتىن كىمدەر دەگەن وي ورالادى قاپەلىمدە. ەرتەرەك تۇرىپ, دەنە جازىپ جۇگىرە قالساڭىز, سۋبۇرقاقتارعا, جان بەرەتىن بالاڭ جىگىتتى كورەر ەدىڭىز. جان-ءتانى الدىنداعى امالىنا اۋ­عان ونى اڭگىمەگە تارتۋ دا قيانات سياقتى. جا­­­قىندا ونىڭ ءساتى ءتۇستى. ەكىندى كەزىندە ماڭدايىنداعى تەرىن ءسۇرتىپ تۇرعان سايابىر شاققا تاپ كەلدىم. اتى-ءجونى الماز ءسالىموۆ ەكەن. كوكشەنىڭ قاراعاش اۋىلىنان. ورتا مەكتەپتى ءبىتىرىپ, وبلىس ورتالىعىنداعى جوعارى تەحنيكالىق كوللەدجدىڭ قۇرىلىس بولىمىنە ءتۇسىپتى. قازىر ءتورتىنشى كۋرستا. – اينالايىن, بۇل كاسىپكە قالاي كەلدىڭ؟ – دەيمىن جايلاپ قانا. – مەن سۋبۇرقاقتى ءبىرىنشى رەت وسىندا كوردىم, – دەدى اقىرىن. ءجۇزى جانىپ بارىپ, كوزى جايناي قال­عانىنا قايرانمىن. جىگەرلى جاندارعا قو­سىپ, قۋاندىم. – ۇنەمى وسى جەرگە كەلگىم كەلەدى دە تۇرادى, – دەپ جالعاستىردى ءسوزىن الماز. – بىلتىر مامىر ايىندا رۋسلان تولەنتاەۆ دەگەن اعاي سوزگە تارتتى. ءبىراز جاعدايلاردى سۇراستىرا كەلىپ, «فونتانشى بولعىڭ كەلە مە؟ قالاساڭ, جازعى كانيكۋلىڭدا بىزبەن بىرگە جۇمىس ىستەۋىڭە بولادى», – دەدى. بىردەن كەلىستىم. ارعى جاعىن بۇگىپ قالدى. جورامال­داۋدىڭ دا قاجەتى جوق. ارينە, اكە-شەشەسى اۋەلدە قارسى بولعان. جازعى ۋاقىتتا جال­عىز بالاسىنىڭ جانىندا جۇرگەنىن قالايدى عوي. ءارى مالدىڭ ءشوبىن, قىستىڭ وتىنىن قامدايتىن شاق. «فونتانشى بولامىن دەگەنى نەسى» دەگەندەي... شىندىعىندا, سۋبۇرقاق رەتتەۋشى وڭاي جۇمىس ەمەس. الماز ءوزىنىڭ جانىنداعى ءۇش ارىپتەسىمەن كوكشەتاۋدىڭ كورىكتى جەرىندەگى جەتى فونتانعا قىزمەت كورسەتەدى. قالا­لىق تۇرعىن ءۇي-كوممۋنالدىق قىزمەت مە­كەمەسىنىڭ باسشىسى لاشىنتاي دۇيسەنوۆ پەن بەلگىلى مامان مارات ايجارىقوۆتىڭ قامقورلىق تۇرعىسىنداعى تالابى دا قانات بىتىرگەندەي. ولاردان كوپ ۇيرەنگەنى كورىنىپ-اق تۇر. جەتى سۋبۇرقاقتىڭ ەكەۋى قىلشاقتى وزەنىنىڭ قالاعا كىرەبەرىس اڭعارىندا, بىرەۋى قوپا كولىنىڭ دوستىق ءۇيى ايلا­عىنداعى مۇيىسىندە ورنالاسقان. سۋ ءىشىن­دەگى سۋبۇرقاق. بارلىق سۋبۇرقاق ءتۇرلى-ءتۇستى رەڭكپەن اتقىلاپ, جانعا جايلى مۋزى­كا اۋەنىمەن ىرعالادى. كۇردەلى جۇمىس. ورتالىق ساياباقتىڭ جاۋاپكەرشىلىگى ءبىر توبە. ساۋىردەن باستاپ جوندەۋ جۇمىستارى جۇرگىزىلەدى. نىسان الابىن كۇندەلىكتى تازالاۋ, سۋ «شاڭسورعىشىنان» وتكىزۋ, گيد­رو­­­وقشاۋلاۋ, حلورلاۋ, سۇزگىلەر مەن سورعىشتاردى, شۇمەكتەردى رەتتەۋ, قيال كوگىندەگى سۋ ورنەگىن اشەكەيلەپ تىزبەلەۋ كاسىبي شەبەرلىك پەن شىعارماشىلىق شابىت قاينارىن قاجەتسىنەدى. بۇعان قو­سىمشا, ابىلاي حان ەسكەرتكىشى جا­نىنداعى فونتاننان 170 تەكشە مەتر سۋ اتقىلاسا, سۋ ىشىندەگىلەر 40 مەترلىك بيىك­تىككە دەيىن شاپشيتىنىن ايتا كەتسەك دەيمىز. مىنە, وسىنى الماز سياقتىلار جاسايدى. قوشتاسۋدىڭ ۇستىندە كادۋىلگى «ال­داعى ارمانىڭ قانداي؟» دەگەندى قويىپ قالعانبىز. «قۇرىلىسشىمىن عوي. اۋى­لىما فونتان سالىپ بەرۋ ويىم بار», – دەدى قاراعاشتىڭ ۇلانى. باقبەرگەن امالبەك, «ەگەمەن قازاقستان» كوكشەتاۋ