كوكشەتاۋدا ءبىر ەركەك ازاماتتىق ايەلىن ۇرىپ ءولتىردى

كوكشەتاۋدا ءبىر ەر كىسى بىرگە تۇرىپ جاتقان ايەلىن ۇرىپ ءولتىردى. وقيعا 14 شىلدە كۇنى كەشقۇرىم ورىن العان. اقمولا وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنشە, سول كۇنى «جەدەل جاردەم» فەلدشەرى كوكشەتاۋ قالاسىنداعى ۇيلەردىڭ بىرىنەن 31 جاستاعى ايەلدىڭ ءمايىتى تابىلعانىن جەتكىزگەن. مەديتسينالىق ساراپتامانىڭ انىقتاۋى بويىنشا, ءولىم سىرتتان جاسالعان قاتتى سوققىلاردىڭ اسەرىنەن قارىن مەن اعزالاردىڭ ىشكى جاعىنان اققان قاننىڭ قان توقتاماۋى سالدارىنان ورىن العان. مارقۇمنىڭ بەت-جۇزىنەن سوققىلاردىڭ ءىزى تابىلعان. پوليتسيا ايەلدىڭ ازاماتتىق كۇيەۋىمەن جانە 3 جاسار باالسىمەن بىرگە تۇرعانىن انىقتادى. قۇقىق قورعاۋشىلار كورشىلەرىنەن سۇراستىرا كەلىپ, بۇل قاندى وقيعاعا كەلىنشەك كۇيەۋىنىڭ تىكەلەي قاتىسى بولۋى مۇمكىن ەكەنى تۋرالى بولجامدى العا تارتتى. وسىنىڭ ناتيجەسىندە ەر كىسى قاماۋعا الىندى. تەرگەۋ بارىسىندا ەر كىسى سول كۇنى بولعان وقيعانى تۇگەل ايتىپ بەردى. ءوزىنىڭ ايتۋىنشا, ەر كىسى جۇمىستان كەلگەسىن ءۇيدىڭ شاشىلىپ جاتقانى ءۇشىن ازاماتتىق ايەلىنە ەسكەرتۋ جاسايدى. ايەلىنەن جاۋاپ الا الماعاسىن, دوسىنىڭ ۇيىنە كەتىپ قالىپ, سوندا كۇنى بويى اراق ىشەدى. ال ۇيگە كەلگەندە, باياعى كورىنىستىڭ وزگەرمەگەنىن, ءۇيدىڭ شاشىلعان قالپىندا جاتقانىن بايقايدى. سول كەزدە ول ايەىلىنىڭ ءىشى مەن بەتىنەن ۇرادى. كەيىن ايەلدىڭ اۋىر حالدە جاتقانىن بايقاعاسىن, «جەدەل جاردەم» شاقىرتادى. بىراق كەلىپ جەتكەن مەديكتەر ونىڭ ءولىپ قالعانىن ەستىرتەدى. پوليتسيا اتالعان وقيعاعا وراي قىلمىستىق ءىس قوزعادى. كۇدىكتى قاماۋعا الىندى. قاراۋسىز قالعان ءۇش جاسار بالا كامەلەتكە تولماعانداردى بەيىمدەۋ ورتالىعىنا ورنالاستىرىلدى. باقبەرگەن امالبەك