«بەلەس» باعىندىرعان بەلەستەر

تىلدىك قورىمىزدا ماعىناسى مول, ايتۋعا دا وڭاي, يكەمدى ءارى ءان ىرعاعىنداي ەستىلەتىن بەلەس دەگەن بەدەرلى ءسوز بار. بۇل تۋرا ماعىناسىندا جەردىڭ جازىقتىعىن ەمەس, جوتالىلىعىن بىلدىرسە, اۋىسپالى ماعىناسىندا بيىكتەردى باعىندىرۋ, كەدەرگىلەردى جەڭۋ جانە جوعارى دەڭگەيگە جەتۋ تۇرعىسىندا قولدانىلادى. ورال وڭىرىندە بەلەس دەگەن اۋىل بار. بۇل ەلدى  مەكەن وبلىس ورتالىعىنان 20 شاقىرىم قاشىقتىقتا. ءدال وسى تۇستاعى «بەلەس اگرو» جشس ۇن كومبيناتى دا اۋىل اتاۋ­ىنا سايكەستەندىرىلگەن. مۇندا بۇدان التى جىل بۇرىن ۇن تارتۋ سالاسىنىڭ الەمدىك كوشباسشىسى «Buhler» شۆەيتسار-گەرمان فيرماسىنىڭ قۇرال-جابدىقتارى ورناتىلعان ەدى. سەرىكتەستىكتىڭ تاعى ءبىر قۇرىلىمى – ديىرمەن كومبيناتى دا وسى قۇرامعا كىرەدى. تاۋەلسىزدىككە قول جەتكىزگەن كەزگە دەيىن, ءتىپتى سودان كەيىنگى وتپەلى كەزەڭدە ەلىمىزدىڭ اۋىل شارۋاشىلىعى سالاسى شيكىزاتتىڭ شىلاۋىنان ارىلا الماي كەلدى. ال بۇگىنگى كورىنىس مۇلدەم باسقاشا. اتالعان سالادا شيكىزاتتى وڭدىرۋمەن بىرگە, ونى وڭدەۋ ۇلەسى جىلدان-جىلعا ارتىپ كەلەدى. بۇل پىكىرىمىزگە «بەلەس اگرو» جشس-ءنىڭ وڭدەۋ وندىرىسىندەگى جەتىستىكتەرى دا تولىق ايعاق. سوڭعى التى جىلدىڭ ىشىندە اگرو­حولدينگتىڭ كونۆەيەرلەرىندە شيكىزاتتىق ءونىمدى وڭدەۋ ىسىندە تۇبەگەيلى وزگەرىستەر جاسالدى. سەرىكتەستىك قۇرى­لىمى تامىرىن تەرەڭگە جايىپ, اۋقىمىن الدەقايدا ۇلعايتا ءتۇستى. سوعان سايكەس اتالعان جشس «بەلەس» كومپانيالار توبى بولىپ قايتا قۇرىلدى. بۇعان تەك ۇن عانا ەمەس, سونىمەن بىرگە, استىق ونىمدەرىنىڭ وزگە دە كوپتەگەن تۇرلەرىن وڭدەۋ باعىتتارى ەنگىزىلدى. بۇگىنگى اڭگىمەمىزدىڭ باستى تاقىرىبى كادىمگى اپپاق ۇن بولعاندىقتان ءبىرىنشى كەزەكتە وسى ماسەلەگە تەرەڭىرەك ۇڭىلگەندى ءجون كورەمىز. تاعى دا قايتالاپ ايتقاندا, شۆەيتسار-گەرمان قوندىرعىسى قويىلعان اگروحولدينگ ونىمدەرى قاتاڭ ەۋروپالىق ستاندارتتاردىڭ بارىنە تولىقتاي جاۋاپ بەرە الادى. وتاندىق كاسىپورىن ءوزىنىڭ تولىق قۋاتىنا كوشىپ, ءدان جانە جوعارى, ءبىرىنشى جانە ەكىنشى سورتتى ۇن ونىمدەرىن ۇزدىكسىز شىعارىپ كەلەدى. ونىڭ ءبارى «بەلەس» ساۋدا بەلگىسى بويىنشا 10, 20 جانە 50 كيلولىق ارنايى قوراپتارمەن تۇتىنۋشىلارعا جەتكىزىلىپ ءجۇر. ەگەر ولار ءبىر, ەكى نەمەسە بەس كيلولىق ۇن تۇرلەرىن ساتىپ الۋدى قولايلى كورسە, مۇنداي سۇرا­نىستار دا تولىعىمەن وتەلەدى. قالاعان پاكەتتەرىڭىزدى الا بەرىڭىز. بۇگىنگى كۇنى «بەلەستە» «پرازدنيچنايا», «كرەستيانسكايا», «دوماشنيايا», «كازاح­ستانسكايا», «كلاسسيك» جانە «ەكسترا» اتتى ۇننىڭ التى ءتۇرى جاڭا تەحنولوگيا بويىنشا زاۋىت كونۆەيەرىنەن دۇكەن سورەلەرىنە جول تارتۋدا. ءبارىنىڭ اتاسى ءبىر ۇن ەمەس پە دەي تۇرساق تا, اتالعان ۇن تۇرلەرىنىڭ ارقايسىسىنىڭ تەك وزىنە عانا ءتان ەرەكشەلىگى بار ەكەنى جانە ءار­قايسىسى ايرىقشا رەتسەپت بويىنشا شىعارىلاتىنى دا ءوز الدىنا ءبىر بولەك اڭگىمە. سونىمەن بىرگە, «بەلەس» كومپانيالار توبىنىڭ دامۋ جوسپارلارىنا سايكەس ۇن قوسپالارىنىڭ جەلىلەرى دە ورناتىلعان. بۇل وندىرىستىك جاڭاشىلدىق شىعارىلعان ءونىمدى تۇتىنۋشىعا شاعىن قوراپشا تۇرىندە ۇسىنۋعا مۇمكىندىك بەرەدى. سوعان سايكەس قازىرگى كەزدە تۇرعىندار مەن تۇتىنۋشىلار تاراپىنان ماكارون جانە روجكي بۇيىمدارىنا دەگەن سۇرانىس ارتا تۇسۋدە. «بەلەستىڭ» جاڭاشىل جەتەكشىلەرى بۇل ماسەلەنىڭ شەشىمىن تابۋ ءۇشىن وندىرىسكە يتاليالىق «PAVAN S.p.A» فيرماسىنىڭ قوندىرعىلارىن ەنگىزگەن. قازىر بۇل وندىرىستىك جۇيە ءتورت ءجۇز گرامدىق, ەكى جانە بەس كيلولىق وراماداعى ماكارون بۇيىمدارىنىڭ ون التى ءتۇرىن وندىرەدى. قوندىرعىلار قۋاتى ساعاتىنا 750 كيلو ءونىم وندىرۋگە ەسەپتەلگەن. بۇل ونىمدەر بۇرىنعى ورال ۇن-جارما كومبيناتى ىزىندە جاڭعىرتىلعان جاڭا جەلىدە شىعارىلادى. سوندىقتان, مۇنىڭ تاعى ءبىر قۇرامداس بولىگى جارما ونىمدەرى بولىپ تابىلادى. – قايتكەندە دە ءبىزدىڭ باستى ماق­ساتىمىز باسەكەگە قابىلەتتى ساپالى ازىق-ت ۇلىك ونىمدەرىن ءوندىرۋ بولىپ قالا بەرمەك. بۇل ماسەلەدە شەتەلدىك ماماندارمەن كەڭەسىپ, ءوزارا ءىس-تاجىريبە الماسىپ تۇرعاننىڭ ەشقانداي ارتىقشىلىعى بولمايدى. سوعان سايكەس ءبىزدىڭ وندىرىستىك ۇجىمعا يتاليا ەلىنىڭ ماماندارى ءجيى اتباسىن بۇرىپ تۇرادى. ولاردىڭ ءونىم ساپاسىن كوتەرۋ جونىندەگى پايدالى كەڭەستەرىنە قۇلاق اسقاننان كەم بولمايتىنىمىز كامىل. يتاليا بۇكىل الەمگە ءوزىنىڭ ۇلتتىق تاعامى – سپاگەتتيىمەن تانىمال. دەگەنمەن, تاياۋ ارادا قازاقستاندىق وندىرۋشىلەر شىعارعان ءونىمنىڭ بۇل ءتۇرى يتاليالىقتاردان كەم سوعا قويماس دەگەن ويدامىن, – دەدى «بەلەس» كومپانيالار توبىنىڭ جەتەكشىسى مۇرات جاكىباەۆ. «بەلەستە» استىق ونىمدەرىن دايىنداۋ تەحنولوگياسى ءداننىڭ كاسىپورىنعا تۇسكەن كەزىنەن باستاپ قولدانىلادى. وسىلايشا ءونىمدى تازارتۋ مەن تولىقتاي وڭدەۋ جۇمىستارى كەزەڭ-كەزەڭىمەن اتقارىلا بەرەدى. مۇندا حالىقارالىق ستاندارت نورمالارى ەنگىزىلگەن. ۇن ءوندىرۋ جونىندە «بەلەستە» قولدانىلاتىن تەحنولوگيا – تۇتاستاي العانداعى قازاقستاندىق ءدان يندۋسترياسىنىڭ بۇگىنگى جەتكەن بيىگى مەن كورىنىسىن ايقىنداي الادى. ونىڭ باستى وزگەشەلىگى, جوعارىدا ايتىلعانداي, باستاپقى شيكىزاتتىڭ ارنايى ءتاسىل بويىنشا ازىرلەنگەن تازارتۋ مەن تولىقتاي وڭدەۋدىڭ بىرنەشە كەزەڭىنەن وتكىزىلەتىندىگىندە. وسىلايشا بۇگىنگى تاڭدا «بەلەستىڭ» بەرەكەلى ونىمدەرى تمد-نىڭ كوپتەگەن مەملەكەتتەرىنە, سونىڭ ىشىندە رەسەي مەن وزبەكستانعا, تاجىكستان مەن قىرعىزستانعا جول تارتىپ ءجۇر. قىسقاسى, قازاقستاندىق ونىمدەرگە دەگەن سۇرانىس جوعارى. وسىنى ەسكەرگەن كومپانيا جەتەكشىلەرى تاۋلىگىنە 150 توننا ءدان وڭدەپ, 120 توننا ۇن شىعاراتىن ءوندىرىس كولەمىن بۇدان ءارى ءوسىرۋدى كوزدەپ وتىر. مۇنداعى بارلىق وندىرىستىك جەلىلەر تولىقتاي اۆتوماتتاندىرىلعان. ۇن تارتۋ مەن شىعارۋ ءوندىرىسى پۋلتتەرىندە ارناۋلى ماماندىقتارى بار ءتورت-اق ادام جۇمىس ىستەيدى. ال جالپى العاندا, بۇگىندە ازىق-ت ۇلىك ونىمدەرىن شىعارۋعا باعىتتالعان وتاندىق كاسىپورىندا 126 ادام ەڭبەك كورىگىن قىزدىرا تۇسۋدە. ونىڭ سەكسەن التىسى – باتىسقازاقستاندىق اۋىل تۇرعىندارى. «بەلەس» كومپانيالار توبىنا كىرەتىن تاعى ءبىر ىرگەلى كاسىپورىن تەرەكتى اۋدانى اۋماعىنداعى كۇنباعىس ماي زاۋ­ى­تى. اشىعىن ايتقاندا, بۇدان 7-8 جىل بۇرىن اشىلعان بۇل كاسىپورىننىڭ باعى و باستان جانباي-اق قويعان-دى. وسى كە­زەڭ ارالىعىندا زاۋىت جارتى قۋاتىمەن جۇمىس ىستەۋ كورسەتكىشىنە دە جەتە المادى. تەك كەيىنگى كەزدە «بەلەس» حولدينگىنە قوسىلعاننان كەيىن عانا مۇندا ۇشى-قيىرى جوق اۋقىمدى جاڭعىرتۋ جۇمىستارى باس­تالىپ كەتتى. قازىر بۇل ۇدەرىس اياقتالۋ قارساڭىندا. تەرەكتى اۋدانى اۋماعىنداعى تەحنو­لوگيالىق جەلىلەر بۇعان دەيىن تەك كۇن­باعىس مايىن وڭدەۋگە عانا لايىقتالعان ەدى. ەندىگى جەردە بۇدان وزگە ءونىم تۇرلەرىن وڭدەۋگە دە كەڭ جول اشىلعان. مۇمكىندىكتەر كەڭەيگەن. وسىلايشا زاۋىتتىڭ مامان-جۇمىسشىلارى شيكىزات رەتىندە راپس, سافلور, زىعىر, قىشا جانە سويا سەكىلدى مايلى داقىلداردى دا تەرەڭ وڭدەۋدەن وتكىزۋدى ۇيعارعان. مۇنىڭ ءبارى قالدىقسىز, ءارى ەنەرگيا ۇنەمدەگىش تەحنولوگيالارعا ارقا سۇيەيدى. ماي زاۋىتىنا ەكولوگيالىق تۇرعىدان تازا ونىمدەر ءتان بولادى دەپ كۇتىلۋدە. جاڭا تەحنولوگيا دەمەكشى, مۇندا ونىڭ كومەگىمەن سالقىن قىسىم رەجىمىندە شىعارىلعان ونىمدەر ءوزىنىڭ ءاۋ باستاعى قۇنارى مەن تابيعي ەلەمەنتتەرىن جوعالتپايتىن كورىنەدى. مۇنى كومپانيا ماماندارى ايتتى. مىنە, «بەلەس» كومپانيالار توبىنىڭ جەتەكشىسى, باتىس قازاقستان وبلىستىق ءماسليحاتىنىڭ دەپۋتاتى مۇرات جاكىباەۆ وسى ايتىلعانداي جاڭالىققا جانى ءۇيىر, شىن مانىندەگى تابىستى تۇلعا, مەرەيلى مەنەدجەر, تولىمدى تەحنولوگ. تەمىر قۇسايىن, «ەگەمەن قازاقستان» باتىس قازاقستان وبلىسى