قاراسورا دەسەڭ جۇرتتىڭ ەسىنە ساۋ ادامنىڭ ءوزىن ەسىرىك حالگە تۇسىرەتىن ەسىرتكى تۇسەرى كادىك. ونىڭ كەيبىر ءتۇرىنىڭ قۇرامىندا ەسىرتكى بولمايتىندىعىن ەكىنىڭ ءبىرى جانە بىلە بەرمەيدى.
«وڭتۇستىك» ارنايى ەكونوميكالىق ايماعى ماڭىندا جايقالىپ ءوسىپ تۇرعان 20 گەكتار قاراسورادان كادىمگى قاعاز دايىندالادى.
«Kagaz Shahary SEZ» سەرىكتەستىگى نارىقتاعى ورنىن تابۋ ءۇشىن قاعاز وندىرىسىنە كەرەك شيكىزاتتى الدى قىتاي, سوڭى رەسەي, سوناۋ فينليانديادان دا تاسىپ كورىپتى. وفيستىك تەحنيكالارعا كەرەك قاعازدار وسىنداي قيىندىقتارمەن دايىندالىپ كەلگەن. الايدا, شەتەلدەن اربالاپ تاسىپ شىعىنعا تۇسكەننەن ءوز ەلىڭنەن دوربالاپ تاسۋدىڭ قانداي مۇمكىندىكتەرى بار, سونى زەرتتەپ كورگەن.
وڭتۇستىكتىڭ ىسكەر جىگىتتەرى كادىمگى ماقتانىڭ قوزاپاياسىنان, سىردىڭ جاعاسىن تەڭىزدەي تەربەتىپ تۇراتىن نار قامىستان ءوندىرىسكە قاجەتتى قۇرىلىس ماتەريالدارىن جاساپ جاتىر. ولاردان قاعاز ءونىمىن جاساۋدىڭ ماشاقاتىنان بولەك وزىندىك قيىندىقتارى كوپ. ءبارىن ەكشەپ ويلاسا كەلە تەحنيكالىق قاراسوراعا توقتاعان.
– ءبىز قاعاز وندىرىسىنە قوزاپايا, قامىستان بولەك بيداي سابانىن دا پايدالانىپ كوردىك, – دەيدى «Kagaz Shahary SEZ» سەرىكتەستىگى ديرەكتورىنىڭ ورىنباسارى باۋىرجان ماناتوۆ. – ولار ءبىز كۇتكەندەگىدەي ناتيجە بەرمەگەننەن كەيىن قاراسورانى كوردىك. ونىڭ قۇرامىندا 72 پايىز جابىسقىش, يىلگىش تسەلليۋلوزا بار. ال, ول ماقتادا 48 پايىز, اعاشتا 24 پايىز عانا. تەحنيكالىق قاراسورانىڭ تۇقىمىن ۋكراينادان اكەلدىك. ەگەر ول جەرسىنىپ كەتسە, ەگىس كولەمى ۇلعايتىلادى.
قاراسورانىڭ ءوندىرىس ورىندارى شوعىرلانعان «وڭتۇستىك» اەا جانىندا وسىرىلۋىنە كەلسەك, مۇندا ماقتا كلاستەرى مەن توقىما ءوندىرىسى جۇمىس جاسايدى. ال, قۇرامىندا ەسىرتكىسى جوق قاراسوراڭىزدان وندىرىسكە قاجەتتى 25 مىڭ ءتۇرلى زات الۋعا بولادى. ياعني, قاي جاعىنان دا ۇتىلمايسىز. ءدارى-دارمەك شىعارۋعا دا پايدالاناسىز, مال بورداقىلاۋعا دا جارامدى. توقىما وندىرىسىنەن بولەك تاعام جاساۋعا دا قاجەتتى قوسپالار الىنادى.
شيكىزاتتى شەتەلدەن اكەلۋ قاي كاسىپورىنعا بولسا دا وتە ءتيىمسىز. قايتا-قايتا جالاۋلاتىپ اشىلعان «ازيا-كەراميكس» زاۋىتى دا قاجەتتى شيكىزات شەتەلدەن تاسىمالدانعاندىقتان تۇرالاپ تىنعان-دى. قاعاز ءوندىرىسىنىڭ ەلىمىز ءۇشىن وتە قاجەتتىگى داۋ تۋدىرمايدى. ىسكەر جىگىتتەر وسىنىڭ ءبارىن جەتى ولشەپ, ءبىر كەسىپ وتىر. بۇگىندە بەلۋاردان اسقان قاراسورا وسە كەلە بيىكتىگى ءتورت مەترگە دەيىن جەتەدى ەكەن. شاۋىپ ال دا وندىرىسكە سال. قاي سالاعا دا جاراي بەرەتىندىگىن ايتتىق.
ەبىن تاپقانعا امال كوپ قوي. ءبىر جىگىت بالىق وسىرەتىن توعان سالماق بولىپ, تاجىريبە الماققا قىتايعا بارىپتى. كەلگەن سوڭ: «قالاي ەكەن؟» دەپ سۇراعاندارعا: «قىتايدا بالىق جۇزبەيدى ەكەن», دەپتى. «قالايشا؟» دەپ تاڭدانادى عوي ءبارى. «توعانعا سىيماعاننان كەيىن جۇزە المايدى دا. ءبارى سۋدان باسىن شىعارىپ دەمالىپ تۇرادى ەكەن». ءسال ءازىل قوسىلسا دا, استارىندا شىندىعى بار. ادامى قۇمىرسقادان دا كوپ قىتايدىڭ وندىرىستىك قۋاتى دا جويقىن. مۇندايدا, ەل اقشاسى وزگە مەملەكەتتىڭ داۋلەتىنە قىزمەت ەتپەس ءۇشىن وندىرىسكە كەرەكتىڭ دەنى وزىڭنەن شىققانى جاقسى.
قازاقتىڭ الداعىنى كورەتىن ىسكەر جىگىتتەرى تاۋەكەلدىڭ قايىعىنا وسىلاي مىنگەن. ەندى ولار ەگىستىك كولەمىن مولايتۋ ەسەبىنەن شيكىزاتتى كوبەيتىپ زاۋىت سالماق نيەتتە.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
