كوكجال باراق – كۇرشىم تورىندە

اسقاق التايدىڭ كۇن­گەي باۋىرىن مار­قاكول, زايسان, بۇقتىرما تولقىندارى شايىپ جاتقان كۇرشىم وڭىرىندە كوڭىل تورىنەن ورىن العان كورىكتى دۋمان ءوتتى. وسى جەرگە ەسىمى تاڭىلعان قالماقتىڭ كۇرسىن باتىرىن جەكپە-جەكتە جەڭىپ, ەل مەن جەردى ساقتاۋدا تالاي جورىقتاردا قان كەشكەن باتىر بابا كوكجال باراقتىڭ 315 جىلدىق تويى بولدى. ۇلان-اسىر مەرەكەگە كۇرشىمدىكتەر جان-جاقتى ازىرلەنگەن ەكەن. بۇقتىرمادان پاروممەن وتكەن مەيمانداردى قۇشاق جايا قارسى العان باتىر ۇرپاقتارى ايگىلى كوكجارلى كوكجال باراق باتىردى ۇلىقتاۋعا ارنالعان ءىس-شارالار لەگىن باستاپ كەتتى. الدىمەن اۋداندىق مادەنيەت ۇيىندە «نۇر وتان» پارتياسىنىڭ « ۇلى دالا ەلى» پارتيالىق جوباسى اياسىندا عىلىمي-تاجىريبەلىك كونفەرەنتسيا ۇيىمداستىرىلدى. جيىندا «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ قۇتتىقتاۋ ءسوز سويلەپ, باتىردىڭ ۇرپاعى, تەرەكتىبۇلاق ورتا مەكتەبىنىڭ مۇعالىمى تاناش قايىرباەۆ, «با­راق باتىر» قورىنىڭ قۇرىلتايشىسى تولەگەن كىناسىلوۆ, بەلگىلى تاريحشى سوۆەتحان قاليعوجين جانە باسقا دا قوناقتار باتىردىڭ ەل تاۋەلسىزدىگى جولىنداعى ارپالىسقا تولى ءومىرى تۋرالى تۇ­ششىمدى باياندامالار جاسادى. كۇرشىمدىكتەر ايتىستى ساعىنىپ قالعان ەكەن. رەسپۋبليكانىڭ ءار تۇكپىرىنەن, بايان-ءول­گەي ايماعىنان كەلگەن ايتىسكەرلەر ونەرىن حالىق ءتورت ساعات بويى تابانداپ تىڭدادى. ارقا-جارقا اعايىن ءساتتى ءسوز ورامدارىنا سۇيسىنە دۋىلداسىپ, اقىندارعا زور قوشەمەت كورسەتتى. ايتىستىڭ باس جۇلدەسىن قىزىلوردالىق مەيىربەك سۇلتانحان جەڭىپ الىپ, جارتى ميلليون تەڭگە سىياقىعا يە بولدى. كەلەسى كۇنى اۋدان ور­­تالىعىنا كىرەبە­رىس­تەگى بيىك قىر باسىندا كوكجال باراقتىڭ قو­لادان قۇيىلعان ەسكەرت­كىشى سالتاناتتى تۇردە اشىلدى. جان-جاعى اباتتاندىرىلعان ساۋلەتتى ەسكەرتكىش الىستان ايبىندانا كوز تارتادى. باتىر رۋحىنا ارنالىپ اس بەرىلگەننەن كەيىن سارىولەڭ اۋىلىنىڭ تۇسىنداعى بايگە توبەدە ۇلتتىق ويىندار سايىسى توي كورىگىن قىزدىرا ءتۇستى. بوز كىلەمدەگى باسەكەدە ءۇشىنشى ورىنعا يە بولعان مەرەكە تۇراشوۆ وزىنە بەرىلگەن سىياقىنى ارباعا تاڭىلسا دا, كۇرەستى جان-تانىمەن تاماشالاعان مۇمكىندىگى شەكتەۋلى با­لاعا ۇسىنعانىندا جي­ىلعان جۇرت «بارەكەلدى» دەستى. بۇل بەلدەسۋدە 2014 جىلعى «قازاقستان بارىسى» مۇحيت تۇرسىنوۆ باس جۇلدەنى جەڭىپ الدى. ال 32 قىلقۇيرىق قاتىسقان 15 شاقىرىمدىق بايگەدە تارباعاتايلىق قايرات قۇنسافيننىڭ اتى, 25 شاقىرىمدىق جەرگىلىكتى جابى جىلقىلار ارا­سىنداعى الامان ءباي­گەدە كۇرشىم اۋدانى قاينار اۋىلىنىڭ تۇر­عىنى داۋلەتحان بيە­كەنوۆتىڭ تۇلپارى, وسى قاشىقتىقتاعى تازا قاندى سايگ ۇلىكتەر سايىسىندا قارويلىق (كۇرشىم) جومارت سايبولاتوۆتىڭ بايگەسى قارا ءۇزىپ كەلدى. اۋىزدىعىمەن الىسقان ارعىماقتاردىڭ يەلەرى ءبىر-ءبىر تەمىر تۇلپاردان ەنشىلەدى. سونداي-اق, بايگە توبە باسىندا جور­­عا جارىس, قىز قۋ, تەڭ­گە ءىلۋ, كوكپار سىندى ۇلتتىق ويىنداردان دا قان قىزدىرعان جارىستار ءوتىپ, باتىر بابا ەرلىگىنە تاعزىم ەتكەن ەل-جۇرت ەرەكشە كوڭىل كۇيمەن تار­قاستى. دۋمان اناش, «ەگەمەن قازاقستان» شىعىس قازاقستان وبلىسى, كۇرشىم اۋدانى