جاس مامان اۋىلعا بارۋ ءۇشىن وعان جاعداي جاساۋ كەرەك

كەشە س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە مەملەكەت باسشىسى نۇرسۇلتان نازارباەۆتىڭ جولداۋىندا كورىنىس تاپقان اۋىل شارۋاشىلىعىندا اگرارلىق عىلىمدى دامىتۋ جانە كادرلاردى دايارلاۋ ماسەلەلەرى بويىنشا پارلامەنت سەناتى دەپۋتاتتارىنىڭ عالىم-اگرارشىلارمەن كەزدەسۋى ءوتتى. اۋىل شارۋاشىلىعى سالاسىندا بىلىكتى ماماندار دايارلاۋ ماسەلەسىنە بايلانىستى بىرقاتار سۇراقتار كوتەرىلگەن ماڭىزدى كەزدەسۋدە اۋىل شارۋاشىلىعى ۆيتسە-ءمينيسترى ەرمەك كوشەرباەۆ ءسوز سويلەپ,  پارلامەنت سەناتى تاراپىنان اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتى دامىتۋ كوميتەتىنىڭ توراعاسى سەرگەي پلوتنيكوۆ پەن بىرقاتار وكىلدەر  وي-پىكىرلەرىن ورتاعا سالدى. سونىمەن قاتار, قاتۋ  رەكتورى اقىلبەك كۇرىشباەۆ كەلگەن قوناقتاردى وقۋ ورنىنىڭ جاي-كۇيىمەن تانىستىردى. بۇل رەتتە, ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتىنە  قوش كەلدىڭىزدەر, دەي وتىرىپ,   ۋنيۆەرسيتەت رەكتورى  سوڭعى جىلدارى  ەلىمىزدە پارلامەنت جانە ۇكىمەتتىڭ بىرلەسۋىمەن ءبىلىم جانە عىلىم سالاسىن رەفورمالاۋ باعىتىندا ايتارلىقتاي جۇمىستار اتقارىلىپ كەلە جاتقانىن جەتكىزدى. ونىڭ ايتۋىنا قاراعاندا, بۇل باعىتتا اتالعان وقۋ ورنى  جوسپارلى تۇردە الەم بويىنشا ۇزدىك دەپ تانىلعان باتىس ۋنيۆەرسيتەتتەرى جۇيەسىمەن بىرگە ىلگەرىلەۋدە. سونداي-اق,  مەملەكەتىمىزدە تۇڭعىش اۆتونومدى وقۋ ورنى مارتەبەسىن يەلەنگەن, ءبىلىم بەرۋ جۇيەسى الەمدىك عىلىم-ءبىلىم كەڭىستىگىمەن بىرىكتىرىلگەن, زاماناۋي زەرتتەۋ ۋنيۆەرسيتەتى – نازارباەۆ ۋنيۆەرسيتەتتىڭ تاجىريبەسى باسشىلىققا الىنۋدا. وسى ورايدا ا.كۇرىشباەۆ ەلباسى اتالعان ۋنيۆەرسيتەتتى الەمدەگى جەتەكشى جوعارى وقۋ ورىندارى ۇلگىسىندە قۇرا وتىرىپ, قازاقستاننىڭ بولاشاق عىلىمى مەن ءبىلىمىن دامىتۋدىڭ باعىت-باعدارىن كورسەتىپ بەرگەنىن جانە سول ۇلگىدە  قاتۋ-ءدىڭ رەفورمالاۋ ساتىسىن باستاعانىن كولدەنەڭ تارتتى. قازىرگى تاڭدا بىلىكتى كادرلار دايارلاۋ ماسەلەسى ەلباسىنىڭ ۇدايى نازارىندا تۇرعان باسىم باعىتتاردىڭ ءبىرى,  اسىرەسە, ەكونوميكانىڭ ماڭىزدى سالاسى سانالاتىن اۋىل شارۋاشىلىعىندا كاسىبي  ماماندار دايارلاۋ بۇگىنگى كۇننىڭ باستى تالابى بولىپ وتىر. سوندىقتان دا وسىنداي وزەكتى تاقىرىپتار تالقىلانعان ماڭىزى ايرىقشا كەزدەسۋلەردىڭ كوپتەگەن ءىس-شارالاردى قولعا الۋعا مۇمكىندىك جاسايتىنىن العا تارتقان اگرارلىق ماسەلەلەر,  تابيعاتتى پايدالانۋ جانە اۋىلدىق اۋماقتى دامىتۋ كوميتەتىنىڭ مۇشەسى راشيت اكىموۆ كۇنى بۇگىنگە دەيىن  ءۇشىنشى رەت وتكىزىلىپ وتىرعان باسقوسۋ وسى سالاداعى بىرقاتار ماسەلەلەردىڭ ءتۇيىنىن اعىتۋعا سەپتىگىن تيگىزەرىنە سەنىم ءبىلدىردى. العاشقىدا اۋىل شارۋاشىلىعى سالاسىنداعى باسىم باعىتتار باعدارى ساراپقا سالىنعان دوڭگەلەك ۇستەل باسىندا بىرنەشە ماسەلەلەر قارالعان بولسا, ودان كەيىن پارلامەنت تىڭداۋى ءوتتى.  بۇگىن, مىنە, اۋىل شارۋاشىلىعى ۆيتسە- ءمينيسترىنىڭ  قاتىسۋىمەن تاعى دا كەزدەسۋ بولىپ وتىر, دەدى ر.اكىموۆ.  ونىڭ ايتۋىنا قاراعاندا, وسى كەزدەسۋ بارىسىندا ۋنيۆەرسيتەتتىڭ اۋىل شارۋاشىلىعى كادرلارىن دايىندايتىن ماماندارىنىڭ ماتەريالدىق-تەحنيكالىق مۇمكىندىكتەرىن جانە ءدارىس وقۋ ۇدەرىستەرىمەن تانىسۋ ماقساتى كوزدەلگەن. ەرتەدەن كەلە جاتقان جوعارى وقۋ ورنىنان كۇنى بۇگىنگە دەيىن كوپتەگەن جاس تۇلەپ ۇشتى. بىراق قازىرگى تاڭدا اۋىل شارۋاشىلىعى سالاسىنىڭ  ماماندارى جەرگىلىكتى جەرلەردە جەتىسپەيدى. وعان ناقتىلاي سەبەپتەر دە جوق ەمەس, جاستاردىڭ ءومىر ءسۇرۋ ستاندارتتارى وزگەرگەن, سوندىقتان مامانداردى اۋىلدارعا تارتۋ ءۇشىن جاقسى جاعدايلار جاسالۋى قاجەت. سونىمەن قاتار, كادرلار دايىنداۋ بارىسىندا وقۋ مەن تاجىريبەنىڭ قاتار ءجۇرۋى ۇلكەن ناتيجە بەرەتىنى ەسكە سالىندى. جانە دە اۋىلداردا  كادرلاردىڭ جەتىسپەۋىنە بايلانىستى دەپۋتاتتىق ساۋال جولدانىپ, وسى ماسەلەدە مامانداردى اۋىلعا تارتۋ ءۇشىن ىنتالاندىرۋ شارالارى قولعا الىنۋ قاجەتتىگىنە نازار اۋدارىلدى. ەلميرا ماتىباەۆا, «ەگەمەن قازاقستان»