كەشە بايلانىس جانە اقپارات قىزمەتكەرلەرى كۇنى قارساڭىندا «نۇر وتان» پارتياسىنىڭ ورتالىق اپپاراتىندا جۋرناليستەر اراسىنداعى ءداستۇرلى «نۇر سۇڭقار» رەسپۋبليكالىق بايقاۋىنىڭ جەڭىمپازدارىن ماراپاتتاۋ سالتاناتى بولىپ ءوتتى.
پارلامەنت ءماجىلىسىنىڭ دەپۋتاتى قۋانىش سۇلتانوۆ توراعالىق ەتكەن ارنايى قۇرىلعان كوميسسيا ءبىر اي كولەمىندە بايقاۋعا ءتۇرلى جانرداعى, اتاپ ايتقاندا, وچەرك, سۇحبات, ماقالا, تەلەۆيزيالىق جانە راديوباعدارلامالار, جۋرناليستىك زەرتتەۋ, سونداي-اق, جاريالانىمدار مەن باعدارلامالار تسيكلى بويىنشا ماتەريالدار قابىلدادى. كوميسسيا قۇرامىنا ەلىمىزدىڭ بۇقارالىق اقپارات قۇرالدارىنىڭ ەڭ بەدەلدى وكىلدەرى كىرگەن.
بايقاۋعا قاتىسۋ ءۇشىن جۋرناليستەردىڭ ەلباسى, «نۇر وتان» پارتياسىنىڭ توراعاسى ن.ءا.نازارباەۆتىڭ الدىعا قويعان مىندەتتەرى مەن تاپسىرمالارىنىڭ جۇزەگە اسۋ بارىسىنا, «قازاقستان-2050» ستراتەگياسىنىڭ باسىمدىقتارىنا, «نۇر وتان» پارتياسى دوكتريناسىنىڭ قاعيدالارىنا جانە پارتيا باستامالارىنا ارنالعان جۇمىستارى قابىلداندى.
ءسويتىپ, «نۇر سۇڭقار» بايقاۋىنا رەسپۋبليكالىق جانە ايماقتىق بۇقارالىق اقپارات قۇرالدارىنان 230-دان استام ءوتىنىش كەلىپ ءتۇستى. ولاردىڭ ىشىنەن 83 جۇمىس ىرىكتەۋدەن ءوتتى.
قورىتىندى كەزەڭ بويىنشا, «الەم. ءححى عاسىر» مانيفەسىن جۇزەگە اسىرۋعا قوسقان ۇلەسى ءۇشىن» اتالىمى بويىنشا سىيلىققا «كازاحستانسكايا پراۆدا» رەسپۋبليكالىق گازەتى» اق باسقارما توراعاسىنىڭ ورىنباسارى تاتيانا كوستينا يە بولدى.
«نۇر وتان» پارتياسىنىڭ جۇمىسى جونىندەگى ەڭ ۇزدىك ماتەريالعا ارنالعان سىيلىق «24.kz» تەلەارناسىنداعى «سۇحبات» باعدارلاماسىنىڭ اۆتورى جانە ءجۇرگىزۋشىسى ەرلان يگىسىنوۆكە بەرىلدى.
ۇزدىك تەلەۆيزيالىق جۋرناليستەرگە بەرىلەتىن «ەرەكشە پىكىر» اتالىمىنا بىردەن ەكى ۇمىتكەر لايىق دەپ تانىلدى. ولار – «حابار» اگەنتتىگى ساراپتامالىق باعدارلامالار ءبولىمىنىڭ ءتىلشىسى ايگۇل ءادىلوۆا مەن «قازاقستان» تەلەارناسىنىڭ ارناۋلى ءتىلشىسى ءالىمجان يساباي.
«ءسوز شەبەرى» اتالىمى بويىنشا ۇزدىك جۋرناليست رەتىندە «ايقىن» گازەتىنىڭ رەداكتورى بەيسەن تاجىباەۆ جەڭىمپاز اتاندى. «قوعام ءۇنى» اتالىمىندا ۇزدىك راديوجۋرناليست اتاعى «وردا FM» راديوسىنىڭ ديكتورى ەرلان سيسەنوۆكە بەرىلدى.
«ايماق ايناسى» اتالىمى بويىنشا جەڭىس «ەگەمەن قازاقستان» گازەتىنىڭ جامبىل وبلىسىنداعى مەنشىكتى ءتىلشىسى ورالحان داۋىتوۆكە بۇيىردى. «شىمكەنت كەلبەتى», «ءوڭتۇستىك قازاقستان», رەسپۋبليكالىق «ءتۇركىستان», «جاس الاش» گازەتتەرىندە جۇمىس ىستەگەن ورالحان ءداۋىتوۆتىڭ جۋرناليستيكا سالاسىندا ەڭبەك ەتىپ كەلە جاتقانىنا جيىرما جىلدىڭ ءجۇزى بولدى. وسى ۋاقىت ىشىندە قالامى جۇيرىك ارىپتەسىمىز تالاي ماسەلە كوتەرىپ, تۇششىمدى دۇنيەلەرىمەن وقىرماندى ءتانتى ەتتى. بىرنەشە جىلدان بەرى «ەگەمەن قازاقستان» گازەتىندە جەمىستى ەڭبەك ەتىپ كەلەدى.
اقپارات اگەنتتىگىنىڭ ۇزدىك جۋرناليسىنە بەرىلەتىن «مەديا-پروفي» اتالىمىنا NUR.kz سايتىنىڭ ءتىلشىسى يۋليا ابراموۆا لايىق دەپ تانىلدى. «كوزقاراس» اتالىمى بويىنشا ۇزدىك بلوگەرلەر رەتىندە شولپان ءالي مەن قانات اۋەسباي جەڭىسكە جەتتى.
جەڭىمپاز جۇلدەگەرلەرگە 500 مىڭ مەن 1 ميلليون تەڭگەدەن اقشالاي سىيلىق تابىس ەتىلدى. «نۇر سۇڭقار» – پارتيا مەن باق وكىلدەرى اراسىنداعى ارىپتەستىكتى ءجانە ىنتىماقتاستىقتى دامىتۋدى كوزدەيتىن قازاقستاننىڭ بارلىق جۋرناليسىنە ارنالعان ءداستۇرلى اشىق بايقاۋ.
راۋشان تاۋىرحانقىزى,
جۋرناليست
