توقال العىسى كەلەتىندەردىڭ ءوز سايتى بار
مۇسىلمان اعايىننىڭ ەكىنشى ء(ۇشىنشى, ءتورتىنشى) ايەل الۋ جولىن جەڭىلدەتەتىن سايت اشىلىپ, جۇمىس ىستەپ جاتىر. مۇسىلمانى باسىم بولا باستاعان ۇلىبريتانيا جەرىندە.
قازىرگە دەيىن سەرۆيس قىزمەتىن 35 مىڭنان استام ادام پايدالانىپ ۇلگەرىپتى. سايتتىڭ نەگىزىن قالاۋشى 33 جاستاعى ازاد چايۆالا وزگە كونفەسسيا وكىلدەرىنە ارنالعان Polygamy.com دەگەن جوبانى دا ىسكە قوسىپتى. مۇندا 7 مىڭ پايدالانۋشى تىركەلگەن. يدەيا اۆتورىن بريتانيادا كوپ ايەل الۋدى ناسيحاتتاۋدى 7 جىل تۇرمەدە وتىرۋمەن جازالايتىن زاڭى دا توقتاتپاعان.
«ءولدى» دەگەن باتىرىڭ ءوزى كەلگەن ۇيىنە
قىتايدىڭ ما تسيسيان ەسىمدى ازاماتى ءوزىن «جەرلەپ» قويعاسىن, ءۇش جىلدان كەيىن ۇيىنە كەلگەن. اقىل-ەسى كەمدەۋ جىگىت بۇدان جەتى جىل بۇرىن ءۇشتى-كۇيلى جوعالىپ كەتكەن.
2012 جىلى سوت-مەديتسينا ساراپشىلارىنىڭ ايعاعىمەن ول كولىك قاعىپ ولتىرىلگەن دەپ سانالىپ, ىزدەۋدەگىلەر تىزىمىنەن شىعارىلعان. تۋعان-تۋىستارى سوسىن سىرتىنان جانازا شىعارادى. سويتسە, ما وسى جىلداردىڭ بارىندە جەرگىلىكتى جابىق مەكەمەلەردىڭ بىرىندە جۇمىس ىستەپتى. ەگەر كەنەت جۇمىستان شىعارىپ جىبەرمەسە, ءالى سوندا جۇرە بەرەتىن ءتۇرى بولىپتى. قازىر جەرگىلىكتى بيلىك ونىڭ ورنىنا كىمنىڭ جەرلەنگەنىن انىقتاۋ ۇستىندە.
باقانىڭ ءمولدىرى دە بولادى ەكەن
رەسەيدىڭ سۆەردلوۆ وبلىسىنىڭ زوولوگتارى كراسنوۋرالسك قالاسى ماڭىنان باقانىڭ بۇرىن كورىپ جۇرگەندەردەن وزگەشە ەكى ءتۇرىن تاپتى.
ولاردىڭ ءبىرىنىڭ اياقتارىندا تاعى ءبىر قوسىمشا ساۋساق بولسا, ەكىنشىسىندە مۇلدەم پيگمەنت جوقتىقتان ىشكى قۇرىلىسىنا دەيىن تۇگەل كورىنىپ تۇراتىنداي ءمولدىر ەكەن. ورال فەدەرالدى ۋنيۆەرسيتەتى جاراتىلىستانۋ عىلىمدارى ينستيتۋتى زوولوگيا كافەدراسىنىڭ مەڭگەرۋشىسى ۆلاديمير ۆەرشينين بۇل انوماليالىق قۇبىلىسقا وسىنداعى بۇرىنعى حيميا كومبيناتىنىڭ ەشقانداي قاتىسى جوق ەكەنىن اشىپ ايتتى.
ايەلىنىڭ كوزىنە ءشوپ سالعان سوتتالادى
الەمدە مۇنداي دا ەل بار. بۇرىن وڭتۇستىك كورەيا سونداي ەدى. وتكەن جىلعى اقپاندا ودان شىقتى. ەندى ونىڭ ورنىن كامەرۋن باستى.
قازىر ەل پارلامەنتىندە وسىعان سايكەس تالقىلاۋ جۇرۋدە. «نەكەدەن تىس بالالارى بار ەركەكتەر جازالانۋى ءتيىس, ويتكەنى, بۇل ونىڭ ايەلىنە ادال بولماعانىن ايعاقتايدى», – دەگەن تۇسىندىرمە بەرەدى زاڭ شىعارۋشىلار. ال مۇنداعى بۇرىننان بار نورماعا سايكەس, نەكەدەن تىس جاعدايداعى قاتىناسقا بارعان ايەلدەر قازىر ەكى ايدان التى ايعا دەيىن تۇرمەگە وتىرعىزىلىپ جاتىر.
جاپوندار مىسىق بەينەلى قاۋىن جەۋگە كىرىستى
جاپونيانىڭ حوككايدو ارالىنداعى فۋرانو ايماعىندا كەسكىنى كەرەمەت قانا ەمەس, سونىمەن قاتار, سىرتىندا Hello Kitty مىسىق بالاسىنىڭ سۋرەتى سالىنعان قاۋىن ءوسىرۋ قولعا الىندى.
قاۋىن پىسۋگە ءبىر اي قالعاندا ونىڭ قابىعىندا سول ءراسىمنىڭ سىزىقتارى پايدا بولادى, مەزگىلى جەتكەنىندە ول مىسىققا اينالادى. فەرمەرلەر سونىڭ ىشىندە ادەمى بولىپ كورىنگەندەرىن عانا ساتۋعا شىعارادى. ال قاۋىنداردىڭ ءبارىنىڭ ءپىشىمى دوڭگەلەك, سالماعى 1,8 كگ بولۋعا ءتيىس. ولاردىڭ باعاسى 5500 يەن, ياعني 52 دوللار تۇرادى.
ءبىر سەلفي جەتى جىگىتتى جەر جاستاندىردى
ءۇندىستاندا جەتى ستۋدەنت ارالارىنداعى بىرەۋىنىڭ گانگ وزەنىندەگى كوپىر ۇستىندە اسەرلى سەلفي جاساماق ارەكەتى كەزىندە سۋعا كەتىپ قالدى.
وقيعا ۋتتار-پرادەش شتاتىنداعى كاپۋر قالاسىندا ورىن العان. سەگىز جىگىتتەن قۇرالعان توپ قاتتى جاڭبىر جاۋىپ تۇرعان كەزدە وزەن جاعاسىنا كەلگەن. ولاردىڭ ءبىرى فوتوعا ءتۇسۋ ءۇشىن بوگەتتىڭ ۇستىنە كوتەرىلگەندە, اياعى تايىپ كەتىپ, وزەن ارناسىنا قۇلايدى. ونى قۇتقارماق بولىپ ۇمتىلعان التى جولداسى دا اعىستىڭ قاتتىلىعىنان سۋعا كەتەدى. ءتىرى قالعان جالعىز جىگىت سوسىن قۇتقارۋشىلارعا تەلەفون شالادى...
ۇيلەنبەي جاتىپ اجىراسىپ كەتتى
ساۋد ارابياسىندا ۇيلەنۋ تويىنان سوڭ ساناۋلى ساعات وتكەندە العان قالىڭدىعىنىڭ ءالى بەتىن اشىپ ۇلگەرمەگەن كۇيەۋ جىگىتتىڭ ونىمەن اجىراسۋ تۋرالى ارىز جازعان وقيعاسى تىركەلدى.
توي سالتاناتى بىتكەن سوڭ جاڭا قوسىلعان جۇپ وزدەرى الدىن الا دايىنداپ قويعان مەيمانحانا نومىرىنە كەلگەن, بىراق ايەلى كۇيەۋىنە ىقىلاس ءبىلدىرۋ ورنىنا ۇيالى تەلەفونىمەن بولىپ كەتكەن. ول ءبىرىنشى نەكە تۇنىنە شاقىرعان كۇيەۋىنە سمس ارقىلى «ءتىل قاتقان». سويتسە, قۇتتىقتاۋشى دوستارىنا جاۋاپ قايىرىپ وتىرىپتى. سوسىن كۇيەۋىنىڭ: «ساعان مەن كەرەكپىن بە, دوستارىڭ كەرەك پە؟» دەگەن سۇراعىنا ول ويلانباستان: «دوستارىم» دەپ جاۋاپ بەرىپتى.
اقپارات اگەنتتىكتەرىنىڭ ماتەريالدارى نەگىزىندە دايىندالدى
