دەپۋتاتتىق توپتىڭ وتىرىسى

«بۇگىنگى تاڭدا «ماڭگىلىك ەل» پاتريوتتىق اكتىسىنىڭ ورىندالۋىنا مونيتورينگ جۇرگىزۋدىڭ باستى ينستيتۋتى رەتىندە اسسامبلەيانىڭ الدىندا جاڭا كەڭىستىكتەر اشىلادى» – كونستيتۋتسيالىق كەڭەستىڭ قازاقستان رەس­پۋب­ليكاسىنداعى كونس­تيتۋتسيالىق زاڭدىلىقتىڭ جاي-كۇيى تۋرالى جول­دا­ۋىنداعى وسى تۇجىرىم بىرە­گەي قوعام­دىق-مەملەكەتتىك ينستيتۋت – قازاقستان حالقى اس­سام­بلەياسىنىڭ ناقتى ءمىن­دەتتەرىن ايقىندايدى. اسسامبلەيانىڭ ءماجى­لىس­تەگى دەپۋتاتتىق توبىنىڭ كە­شە وتكەن كەزەكتى وتىرىسىندا قارالعان نەگىزگى ماسەلە ءبىلىم جانە عىلىم مينيسترلىگىنىڭ مەكتەپتە ءبىلىم بەرۋدىڭ وقۋ باعدارلامالارىنا ءجا­نە عىلىمي-زەرتتەۋلەرگە «ماڭگىلىك ەل» جالپىۇلتتىق يدەياسىنىڭ قۇندىلىقتارىن ەنگىزۋ جونىندەگى جۇمىسى بولدى. ءبىلىم جانە عىلىم ءمينيسترى ەرلان ساعاديەۆ وسى ماڭىزدى ماسەلە جونىندەگى ءوز ويلارىن ورتاعا سالدى, قازىرگى تاڭدا بۇل تاقىرىپ بويىنشا تەرەڭ عىلىمي ىزدەنىستەر جاسالىپ جاتقانىن, جىل سوڭىنا دەيىن ناقتى تۇجىرىمداما ايقىندالىپ, ودان سوڭ جالپىۇلتتىق يدەيانىڭ مەكتەپتەگى باعدارلامالاردا كورىنىس تابۋى تۋرالى ۇسى­نىستار پارلامەنتتەگى دەپۋتتاتتىق توپتىڭ قارا­ۋىنا ەنگىزىلەتىنىن ايتتى, دە­پۋتاتتاردىڭ كوپتەگەن سۇراق­تارىنا جاۋاپ بەردى. ءماجىلىس توراعاسىنىڭ ورىنباسارى ۆ.بوجكو مينيسترلىكتىڭ اۋەلى ىرگەلى ماسەلەنىڭ ءمان-جايىن جان-جاقتى تالقىلاۋ, ناقتى شەشىمدەردى سودان كەيىن عانا قابىلداۋ جونىندەگى ۇستانىمىنا قولداۋ ءبىلدىردى. ماجىلىستەگى قازاقستان حال­قى اسسامبلەياسى دەپۋتات­تىق توبىنىڭ جەتەكشىسى ساۋىتبەك ابدراحمانوۆ «ماڭگىلىك ەل» پاتريوتتىق اكتىسىن ناسيحاتتاۋ بويىنشا الدا تۇرعان مىندەتتەر تۋرالى حابارلاما جاسادى. حالىق قالاۋلىلارى قۋا­نىش سۇلتانوۆ, سەرگەي دياچەنكو, اباي تاسبولاتوۆ, انار جايىلعانوۆا ءجارىسسوز كەزىندە دەپۋتاتتىق توپتىڭ ماجىلىستەگى پارتياارالىق ۇنقاتىسۋدىڭ بىرەگەي الاڭقايىنا اينالىپ كەلە جاتقانىن رازىلىقپەن اتاپ ءوتىپ, ەلدەگى قوعامدىق كەلىسىم مەن جالپىۇلتتىق بىرلىك سالاسىنداعى مەملەكەتتىك سايا­ساتتى ازىرلەۋ, جۇزەگە اسىرۋ تۇرعىسىنان پارلامەنتاريلەر اتقارار جۇمىس اۋقىمدى ەكەنىن ايتتى. «ەگەمەن-اقپارات»