گەرمانيا سىرتقى ىستەر ءمينيسترى ناتو جاتتىعۋىن سىنعا الدى

گەرمانيا سىرتقى ىستەر ءمينيسترى فرانك-ۆالتەر شتاينمايەر ناتو-نىڭ بالتىق ەلدەرى تەرريتورياسىندا وتكىزىپ جاتقان Saber Strike حالىقارالىق جاتتىعۋلارىن سىنعا الدى. نەمىس مەملەكەتى سىرتقى ۆەدومستۆوسىنىڭ باسشىسى Bild am Sonntag گازەتىنە بەرگەن سۇحباتىندا باتىس ءۇشىن رەسەيمەن جاقسى قارىم-قاتىناستا بولۋدىڭ ءمانى زور ەكەنىن اتاپ ءوتتى. رەسەي فەدەراتسياسىمەن تەكەتىرەسكە تۇسكەننەن گورى ىنتىماقتا بولعاننىڭ ءبارىمىز ءۇشىن پايداسى زور, دەپ سانايدى ول. «ءبىزدىڭ قازىرگى تاڭدا جاساۋعا بولمايتىن تىرلىگىمىز – قارۋ-جاراقتى قايتا-قايتا جارقىلداتىپ, سوعىس ۇرانىن دابىلداتىپ, جاعدايدى بۇرىنعىدان بەتەر ۋشىقتىرا تۇسپەۋ», دەدى ديپلومات. ول سونىمەن قاتار اليانستىڭ شىعىس شەكارادا «تانكىلەر شەرۋىن» جاساۋى قاۋىپسىزدىكتى كۇشەيتە تۇسپەيتىنىن ايتتى. شتاينمايەردىڭ اتاپ وتۋىنشە, قورقىتىپ-ۇركىتۋ ساياساتىمەن قاۋىپسىزدىكتى قالىپتاستىرۋدىڭ بەرىك ىرگەتاسىن ەشكىم دە جاساي المايدى. ونىڭ پىكىرىنشە, رەسەيدى مىندەتتى تۇردە «حالىقارالىق ارىپتەستىك جاۋاپكەرشىلىككە تارتۋ كەرەك». اتاپ وتە كەتەيىك, Saber Strike وقۋ-جاتتىعۋى قازىرگى كۇندەرى بالتىق جاعالاۋى ەلدەرىندە ءوتىپ جاتىر. وعان ناتو مەن سولتۇستىك اتلانت الياسىنا ارىپتەس 13 ەلدەن 10 مىڭعا جۋىق اسكەري قىزمەتكەر قاتىسۋدا. مۇرات ايتقوجا. مانبە, فوتو: politonline.ru.