335 مەديتسينالىق نىسان سوڭعى بەس جىلدا سالىندى
بۇرىندارى وڭتۇستىك قازاقستان وبلىسىندا رەسپۋبليكالىق ورتا كورسەتكىشپەن شاققاندا دەنساۋلىق سالاسى اقساپ تۇراتىن. الايدا, سوڭعى جىلدارى وڭتۇستىك كوپتەگەن كورسەتكىش بويىنشا جوعارى ناتيجەلەرگە جەتە باستادى.
سالىستىرمالى تۇردە ايتار بولساق, ءنارەستەلەردىڭ ءولىم-ءجىتىمى 2001 جىلى مىڭ سابيگە شاققاندا 16,7-دەن 2015 جىلى 11-گە دەيىن تومەندەگەن. انالار ءولىمى 2011 جىلى مىڭ ادامعا شاققاندا 19,4 بولسا, بىلتىر 11,4-كە دەيىن ازايعان. قان اينالىمى جۇيەسىنىڭ اۋرۋلارى 14 پايىزعا, قۇرت اۋرۋىنان بولاتىن ءولىم-ءجىتىم 2,1 ەسە ازايعان. ال قاتەرلى ىسىكتەن بولاتىن ءولىم-ءجىتىم قازاقستان بويىنشا 89,9 بولسا, وڭتۇستىكتە 58,7-ءى قۇراپ, ەڭ تومەنگى كورسەتكىش بولىپ تۇر.
وڭتۇستىك مەديتسيناسى مەملەكەتتىك قولداۋدىڭ ارقاسىندا مەديتسينا سالاسىنداعى وزىق تەحنولوگيانىڭ جەمىسىن كوردى. سوڭعى بەس جىلدا 335 مەديتسينالىق نىسان سالىنعاندىعى الىس اۋىلداردا دا دەنساۋلىق جاعىنان احۋالدىڭ وڭالعاندىعىن كورسەتەدى. جاقىندا وبلىستىق دەنساۋلىق ساقتاۋ باسقارماسىنىڭ باسشىسى سەيتجامال پاكەەۆكە جولىعىپ, ءبىراز ساۋالدارىمىزعا جاۋاپ العان ەدىك. سوڭعى جىلدارى حالىق سانى التى پايىزعا وسكەن. ورتاشا ءومىر ءسۇرۋ ۇزاقتىعى وبلىستا 72,6 جاسقا دەيىن ارتقان. ءولىم-ءجىتىم ايتارلىقتاي ازايعان. جىل سايىن ومىرگە 75 مىڭنان استام بالا كەلەدى. شوتقا سالىپ جىبەرسەڭىز, رەسپۋبليكاداعى ومىرگە كەلەتىن ءاربىر بەسىنشى شاقالاق التىن قۇرساق وڭتۇستىكتىڭ ۇلەسىندە.
قازاقستان رەسپۋبليكاسىنىڭ دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسى اياقتالدى. باعدارلامانى جۇزەگە اسىرۋ كەزەڭىندە 2011 جىلدان 2015 جىلعا دەيىنگى ارالىقتا وبلىستىڭ دەنساۋلىق ساقتاۋ سالاسى ماقساتتى ينديكاتورلارىنا قول جەتكىزدى.
2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن جانە «100 ناقتى قادام» ۇلت جوسپارىن جۇزەگە اسىرۋ ماقساتىندا دەنساۋلىق ساقتاۋ جۇيەسىن دامىتۋدىڭ باستى باعىتى باستاپقى جانە جەدەل مەديتسينالىق كومەكتى دامىتۋ, مەديتسينالىق ءبىلىمدى مودەرنيزاتسيالاۋ, مەملەكەت-جەكەمەنشىك كاسىپورىندارى مەن ينفراقۇرىلىمداردى, سونىمەن بىرگە, كورپوراتيۆتىك باسقارۋدى دامىتۋ, ءمىندەتتى الەۋمەتتىك مەديتسينالىق ساقتاندىرۋدى ەنگىزۋ, قوعامدىق دەنساۋلىق قىزمەتىن قۇرۋ بولىپ تابىلادى.
وبلىستىڭ جالپى دەنساۋلىق ساقتاۋ سالاسىنىڭ بيۋدجەتى 2016 جىلى 108 ملرد. 380 مىڭ تەڭگەنى قۇرادى. مەديتسينا ۇيىمدارىنىڭ ماتەريالدىق-تەحنيكالىق جابدىقتالۋى – 1634,8 ملن. تەڭگە.
دەنساۋلىق ساقتاۋدىڭ نەگىزگى مىندەتى حالىققا كورسەتىلەتىن مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ بولىپ تابىلادى. حالىققا ءۇش دەڭگەيلى مەديتسينالىق كومەك كورسەتۋ ۇيىمداستىرىلدى. اتاپ ايتقاندا, پەريناتالدىق ورتالىقتار, وبلىستىق كلينيكالىق اۋرۋحانا جانە شىمكەنت قالالىق جەدەل مەديتسينالىق كومەك كورسەتۋ اۋرۋحاناسى جانىندا 2 ينسۋلت ورتالىعى قۇرىلدى. انا مەن بالا دەنساۋلىعىن قورعاۋ, مامانداندىرىلعان حيرۋرگيالىق جانە رەابليتاتسيالىق كومەك قىزمەتتەرى باسىمدىقتى دامۋعا بەت الدى. ىشكى اۋديت جۇيەسى ەندىرىلىپ جەتىلدىرىلدى, بارلىق مەديتسينالىق ۇيىمدارىندا پاتسيەنتتى قولداۋ تەلەفوندارى جۇمىس ىستەيدى, Call-ورتالىعى اشىلدى.
حالىقتىڭ ەپيدەميولوگيالىق سالاماتتىلىعى ۆاكتسينامەن باسقارىلاتىن ينفەكتسيالارعا قارسى ەگۋمەن 95 پايىز قامتۋ, اسا قاۋىپتى ءجانە ماۋسىمدىق ينفەكتسيالاردان قورعايتىن ىندەتكە قارسى ءىس-شارالاردى كۇشەيتۋ ەسەبىنەن قامتاماسىز ەتىلدى. 2015 جىلى ءجاسوسپىرىمدەر اراسىندا قىزىلشاعا قارسى قوسىمشا يممۋنداۋ شارالارى وتكىزىلدى.
وبلىس حالقىن 2016 جىلى تەگىن مەديتسينالىق كومەكتىڭ كەپىلدەندىرىلگەن كولەمى شەڭبەرىندە امبۋلاتوريالىق دەڭگەيدە ءدارى-ءدارمەكپەن قامتاماسىز ەتۋ ءۇشىن وبلىستىق بيۋدجەتتەن 6 ملرد. 234 ملن. تەڭگە, رەسپۋبليكالىق بيۋدجەتتەن 10 ملرد. 700 ملن. تەڭگە ءبولىندى. مەديتسينالىق كورسەتىلىمدەرىنە قاراي, جاڭادان انىقتالعان جانە ديسپانسەرلىك ەسەپتە تۇراتىن ناۋقاستار تەگىن مەديتسينالىق كومەكتىڭ كەپىلدەندىرىلگەن كولەمى اياسىندا ۇزدىكسىز ءدارى-ءدارمەكپەن قامتاماسىز ەتىلەدى.
نەگىزگى كورسەتكىشتەردى وسىلاي جىلىكتەگەن وبلىستىڭ باس ءدارىگەرى قوردالانعان ماسەلەلەردى ءتيىمدى شەشۋگە وبلىس اكىمى بەيبىت اتامقۇلوۆتىڭ ايرىقشا اتسالىسىپ وتىرعاندىعىن ايتادى. ماسەلەن, بۇگىنگى كۇنى مەديتسينالىق كومەكتى ىقپالداستىرۋ ۇستانىمى نەگىزىندە وبلىستىق اكىمدىك جانىنان ءۇيلەستىرۋ كەڭەستەرى قۇرىلدى جانە 6 نەگىزگى نوزولوگيا بويىنشا ء(جىتى ينسۋلت, ونكولوگيالىق اۋرۋلار, ءجىتى ميوكارد ينفاركتى, جاراقات, بوساندىرۋ جانە بالالىق, تۋبەركۋلەز) وڭىرلىك جول كارتالارى ءازىرلەنىپ, ونى وبلىس اكىمىنىڭ ورىنباسارى بەكىتتى.
اتقارىلعان جۇمىستار ناتيجەسىندە وبلىس حالقىنىڭ ءومىر ءسۇرۋ ۇزاقتىعى ارتىپ كەلەدى, 2011 جىلمەن سالىستىرعاندا, ءومىر ءسۇرۋ ۇزاقتىعى 2,74 جاسقا ۇلعايدى. بۇرىندارى جاپونيا سياقتى وركەنيەتتى ەلدەردەگى ادامداردىڭ ءومىر ءسۇرۋ مەرزىمىنىڭ ۇزاقتىعىنا ءسۇيسىنىپ, ءبىزدىڭ ەل قاشان سونداي بولادى دەپ ەدىك.
قازىر سول جاپون, وڭتۇستىك كورەيا سياقتى مىقتى مەملەكەتتەردەگى وزىق مەديتسينا تەحنولوگياسى وبلىس ورتالىقتارىنا جەتتى. شەتەلدە وتە قىمباتقا تۇسەتىن اعزا اۋىستىرۋدىڭ قيىن وتالارى ءوز ءوڭىرىمىزدە دە جاسالاتىن بولدى. مەملەكەت باسشىسىنىڭ ۇزاق مەرزىمگە قابىلداعان باعدارلامالارى وڭىردە وسىنداي تابىسقا يە بولىپ جاتىر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
