مەيىرىمدى مەدبيكە

سىرقاتتانعاندا قا­سى­ڭىزدان تابىلاتىن, قى­سىلعاندا قول ۇشىن بەرەتىن مەديتسينا قىز­مەت­كەرلەرىنىڭ ءبىرى – مەدبيكە. ادەتتە, ناۋ­قاستانىپ قالعان جان­دارعا ايالى الاقانىمەن, جىلى قاباعىمەن قۋانىش سىيلايتىن مەدبيكەلەر ءجو­نىندە كوپ ايتىلا بەرمەيدى. سولاردىڭ ءبىرى – وسكەمەن قالاسىنداعى مە­ديتسينالىق جەدەل جاردەم ستانساسىنىڭ باس مەدبيكەسى گالينا جالباكوۆا. 1980 جىلى وسكەمەن قالاسىنداعى مە­ديتسينالىق ۋچيليششەنى فەلدشەر مامان­دىعى بويىنشا تامامداعان جالىندى جاس العاشقى ەڭبەك جولىن جەدەل جاردەم كولىگىندە قىزمەت ەتۋدەن باستاعان ەكەن. كوپ ۇزاماي تۇرمىس قۇرىپ, دەكرەتتىك دەمالىس­تان ورالعان ول قالاداعى مەديتسينالىق مەكەمەلەردە كىشى مەدبيكە بولىپ جۇمىس ىستەي باستادى. جاۋاپكەرشىلىگى مول, العىر, كەز كەلگەن ناۋقاستىڭ ءپاس كوڭىلىن شايداي اشاتىن مەدبيكەنىڭ ماتتاقامدىعى كوزگە شالىنباي قالعان جوق. 1997 جىلى گلۋبوكوە اۋداندىق اۋرۋحاناسىنىڭ باس مەدبيكەسى بولىپ تاعايىندالدى. ال 2012 جىلدان باستاپ وبلىس ورتالىعىنداعى مەديتسينالىق جەدەل جاردەم ستانساسىندا ەڭ­بەك ەتىپ كەلە جاتقان گالينا كادەروۆنانىڭ باس مەدبيكەلىك, ياعني ۇيىمداستىرۋشىلىق ءوتىلى 20 جىلدى قۇراسا, جالپى مەديتسينالىق ەڭبەك جولىنا 36 جىل تولىپتى. وسى جىلداردىڭ ىشىندە قان­شاما ادامنىڭ تاعدىرى, دەنساۋلىعى, وعان اراشا تۇسكەن سىن ساتتەر مەن ماڭداي تەر, العىس جاتىر! ارىپتەستەرى گالينانى بىلىكتى مامان رەتىندە جوعارى باعالايدى. قوعامدىق جۇمىستارعا بەلسەنە اتسالىسىپ تۇراتىنى تاعى بار. ايتالىق, 2000-2004 جىلدارى گلۋبوكوە اۋداندىق ءماسليحاتىنىڭ دەپۋتاتى اتاندى. اۋدان دەڭگەيىندە جەرگىلىكتى حالىقتىڭ دەنساۋلىعىن نىعايتۋ ماسەلەلەرىن شەشۋگە اتسالىستى. سونىمەن بىرگە, سوڭعى ءۇش جىل كولەمىندە شىعىس قازاقستان وبلىستىق دەنساۋلىق ساقتاۋ باسقارماسىندا ورتا مەديتسينالىق قىزمەتكەرلەرمەن جۇمىس بويىنشا شتاتتان تىس باس مامان بولىپ ەڭبەك ەتىپ كەلەدى. مەدبيكەلىك قىزمەتتەگى مەنەدجەرلىك بويىنشا باي تاجىريبە جيناقتاعان كەيىپكەرىمىزدىڭ ۇجىمدا, ءارىپ­تەستەرى اراسىندا وزىندىك ورنى بار. ءوزىن-ءوزى ۇنەمى جەتىلدىرىپ جۇرەتىن گالينا كادەروۆنا 2014 جىلى «دەنساۋلىق ساقتاۋ سالاسىنداعى بىلىكتىلىگىن راستاۋ مەن كاسىبي دايارلىعىن باعالاۋ بويىنشا سيمۋلياتسيالىق ورتالىق مامانى» تاقىرىبىندا وقۋدان ءوتتى. ودان كەيىنگى ەكى جىلدا وڭىردەگى مەدبيكەلەر­دىڭ بىلىكتىلىگىن كوتەرۋگە ءوزى دە ۇلكەن ۇلەس قوسا باستادى. 2004 جىلى س.امانجولوۆ اتىن­داعى شىعىس قازاقستان مەملەكەتتىك ۋنيۆەرسيتەتىندە «تاجىريبەلىك پسيحولوگيا» ماماندىعى بو­يىنشا جوعارى ءبىلىم العان بىلىكتى مامان مەدبيكەلىك ىستە ادام جانىن تۇسىنە ءبىلۋدىڭ ەرەكشە ماڭىزدى ەكەنىن ايتادى. – قازىر كوپتەگەن جاستار مەديتسينالىق ورتا وقۋ ورىندارىن ءبىتىرىپ, قاتارىمىزعا قوسىلىپ جاتىر. جاس بۋىنمەن بايلانىس جىلدان جىلعا نىعايىپ كەلەدى. وسكەمەن قالاسىنداعى مەديتسينا كوللەدجىمەن تىعىز قارىم-قاتىناستامىز. ولار مەدبيكە ءىسى بويىنشا استانا, الماتى قالالارىندا بىلىكتىلىكتەرىن تەكسەرەدى. بىلتىر سەمەي قالاسىنداعى وڭىرلىك ونكولوگيا ورتالىعى, وسكەمەن قالاسىنداعى №1 قالالىق اۋرۋحانا بازاسىندا عىلىمي كونفەرەنتسيالار وتكىزدىك. جاس ماماندار اراسىندا ءتۇرلى بايقاۋلار ۇيىمداستىرامىز. جالپى, قازىرگى كەزدە مەدبيكە دارىگەر تاعايىنداعان ەمدى ورىنداپ قانا قويمايدى. جوعارى مەدبيكە ءىسى بويىنشا بىلىكتىلىك العان مامان دارىگەردىڭ نەگىزگى كومەكشىسى بولىپ تابىلادى. «جاسىنا قاراي ىزەت, ەڭبەگىنە قاراي قۇرمەت» دەگەن ءسوز بار. گالينا جالباكوۆانى 2014 جىلى قازاقستان مەديتسينا قىزمەتكەرلەرىنىڭ ۇلتتىق قاۋىمداستىعى «مەيىرىم» مەدالىمەن ماراپاتتادى. دەنساۋلىق ساقتاۋ مينيسترلىگى جانە سالالىق باسقارما مەن مەكەمەلەردەن العان ماراپاتتارى دا جەتەرلىك. ەڭ باستىسى, ول ەكى بالا ماپەلەپ ءوسىر­گەن انا. ۇلكەن ۇلى رينات قازىر ەر جەتىپ, قوعام­نان ءوز ورنىن تاپسا, قىزى كريستينا اناسىنىڭ جولىن جالعاپ, سەمەيدىڭ مەديتسينالىق اكادەمياسىنىڭ 4-كۋرسىن اياقتادى. مەدي­تسيناعا بەت بۇرۋىنا اكە ىق­پالىنىڭ بولعانىنا وكىنبەيتىنىن ايتقان گالينا ءوز كەزەگىندە قىزىنىڭ دا وقۋدا وزات, ورتاسىندا بەلسەندى جاس ەكەنىن ماقتانىش تۇتاتىنىن جەتكىزدى. ساباقتاستىق دەگەن دە وسى ەمەس پە! دۋمان اناش, «ەگەمەن قازاقستان» وسكەمەن