• 18 ماۋسىم, 2016

وليمپيادا: جۇزگە جۋىق ءۇمىت

221 رەت

كورسەتىلدى

2 مين

وقۋ ءۇشىن

Egemen Qazaqstan

* ءدۇبىر برازيليانىڭ ريو-دە-جانەيرو قالاسىندا جازعى وليمپيا ويىندارى وتەتىن ۋاقىت جاقىنداعان سايىن قازاقستان قۇراماسى دا وعان قاتىساتىن سپورتشىلار سانىن ارتتىرىپ كەلەدى. قازىرگى تاڭدا ويىندارعا جولداما جەڭىپ العان سپورتشىلارىمىزدىڭ سانى 98-گە جەتتى. مۇنىڭ ىشىندە جەڭىل اتلەتتەردىڭ ۇلەسى بارىنەن كوپ. ولار ازىرگە 20 ليتسەنزياعا يەلىك ەتىپ وتىر. بايداركا مەن كانوەدا ەسكەك ەسۋ جارىسىندا 11 ساڭلاعىمىز جارىسادى. بۇدان ءارى بوكسشى جىگىتتەرىمىز بەن اۋىر اتلەتتەرىمىز 10 ادامدىق قۇراممەن سايىس الاڭىنا شىعادى. بۇلاردان بولەك, ەركىن كۇرەس شەبەرلەرى – 5, ايەلدەر كۇرەسى مەن مىلتىق اتۋدىڭ اربىرىندە 4-تەن جولداما بار. سول سياقتى تەننيسشىلەر, گرەك-ريم كۇرەسىنىڭ شەبەرلەرى, تاەكۆوندوشىلار مەن دزيۋدوشى جىگىتتەر – ءۇش-ۇشتەن, دزيۋدوشى جانە بوكسشى قىزدار, ۆەلوشاباندوزدار, ساداق اتۋشىلار, اكادەميالىق ەسۋشىلەر مەن سۋدا جۇزۋشىلەر ەكى-ەكىدەن جولداما العان. تاعى سينحروندى ءجۇزۋ, قازىرگى زامانعى بەسسايىس, ستەند اتۋ, ۆەلوترەك, سەمسەرلەسۋ, ۇستەل تەننيسى, كوركەم گيمناستيكا, ەسۋ سلالومى, باتۋتتا سەكىرۋ جانە ايدىندا ءجۇزۋ سەكىلدى سپورت تۇرلەرىنەن ءبىر-ءبىر وكىلدەن وليمپياداعا بارعالى تۇر. بالۋاندار قۇرامى انىقتالدى ەلىمىزدىڭ كۇرەس تۇرلەرىنەن وليمپياداعا باراتىن قۇرامالارى قۇرامدارى انىقتالدى. قازاقستان كۇرەس فەدەراتسياسىنىڭ باسشىلىعى ريو-دە-جانەيرو كىلەمىندە ەل نامىسىن قورعايتىن بالۋاندار ەسىمدەرىن جاريالادى. گرەك-ريم كۇرەسى كومانداسىنىڭ ساپىندا المات كەبىسباەۆ (59 كگ), دوسجان قارتىقوۆ (75) جانە نۇرماحان تىناليەۆ (130) بار. ەركىن كۇرەس جاساعىن ارتاس سانا (57), عالىمجان وسەرباەۆ (74), اسلان كاحيدزە (86), مامەد يبراگيموۆ (97) جانە داۋلەت شابانباي (125) قۇرايدى. ايەلدەر كۇرەسى بويىنشا بوز كىلەمگە جۇلدىز ەشىموۆا (48), ەكاتەرينا لاريونوۆا (63), ەلميرا سىزدىقوۆا (69) جانە گۇزەل مانيۋروۆا (75) شىعادى. ايتا كەتەتىن جايت, كۇرەستە وليمپيالىق ليتسەنزيالار كومانداعا بەرىلەدى. سوندىقتان ولاردا قول جەتكەن سالماقتار بويىنشا كىمدەردىڭ باراتىنىن جاتتىقتىرۋشىلار كەڭەسى شەشەدى. وليمپيادادا كۇرەس تۇرلەرىنەن مەدالداردى ساراپقا سالۋ جارىستارى 14-21 تامىز كۇندەرى وتەدى.