ارمان قۋىپ كەلگەن قىز

الماتىدا دزيۋدودان وتكەن الەم گران-پري جارىسىنىڭ العاشقى كۇنى قازاقستان سپورتشىلارىنىڭ قورجىنىن 1 التىن, 2 كۇمىس جانە 1 قولا مەدالمەن تولتىرىپ تاستادى. تاتاميدە جاسىنداي جارقىلداعان, ۇنەمى شابۋىل وتىندە بولاتىن گالبادراح وتگونتسەتسەگ اقتىق ايقاستا ءوڭتۇس­تىك كورەيانىڭ ۇكى­لە­گەن ءۇمىتى ۆو دجەنگ كيونگتى جەڭدى. گالبادراح بيىلعى قاتىسقان ال­تى حالىقارالىق ءتۋرنيردىڭ بىردە-بىرىندە جۇلدەسىز قالعان جوق. گران-پري باسەكەسىندە وسىمەن ءتورتىنشى رەت جەڭىمپاز بولدى. الماتىدا وتكەن جارىسقا قا­زاقستان دزيۋدو قۇراماسىنىڭ باس باپكەرى ەرمەك يمان­باەۆ وليمپيادا جولداماسىن الىپ قويعان ەلدوس سمەتوۆ پەن ماكسيم راكوۆتى سالعان جوق. بىراق ريو-دە-جانەيرو وليمپياداسىندا قارسىلاستارىن شاق كەلتىرمەيدى دەپ جۇرگەن داستان ىقىباەۆ, ءازيز قالقامان ۇلى جانە ەرجان شىنكەەۆ جۇلدەسىز قالدى. قىزدار قۇراماسىنداعى ەڭ تاجىريبەلىسى گۇل­جان ىقسانوۆا وليمپيادا جول­داماسىنا قول سوزىم قالعاندا ءسۇرىندى. بۇل جاعداي, ارينە, ايەل­دەر قۇرا­ما­سىنىڭ باس باپكەرى جاكەن سالاماتوۆقا اۋىر ءتيدى. – ءبىز بۇل جارىستان ۇلكەن ءۇمىت كۇتىپ ەدىك, – دەدى ول. – تاجىريبەلى گۇلجاننان بولەك, تاشكەنتتە ءوت­كەن ازيا چەمپيوناتىندا التىننان ولجا سالىپ, حالىقارالىق دزيۋدو فەدەراتسياسى تاراپىنان وليمپيادا كۆوتاسىنا يە بولعان ماريان ورداباەۆا بۇعان دەيىن ءىرى جارىستاردا جەڭىسكە جەتپەگەن ۆەنەسۋەلا دزيۋدوشىسىنان جەڭىلىپ قالدى. ال وتگونتسەتسەگ گالبادراح گران-پري باسەكەلەرىندە قارسىلاستارىن قوعاداي جاپىردى. ريو-دە-جانەيرودا ول تاماشا ونەر كورسەتەدى دەپ ويلايمىن. گالبادراح قازىر الەمدىك رەيتينگتە ءۇشىنشى ورىنعا شىقتى. حالىقارالىق جارىستاردا باس­تى قارسىلاستارىن تۇگەلگە جۋىق ۇتتى. ارينە, الدىن الا ءبارىن كەسىپ-ءپىشىپ ايتۋ قيىن, بىراق, مەن وتگونتسەتسەگكە سەنەمىن. بۇرىنعى موڭعوليا قۇراما­سىنىڭ مۇشەسى, بۇگىندە قازاقستان بايراعى استىندا جەڭىس تويىن تويلاپ جۇرگەن گالبادراحقا سەنىپ وتىرعاندار كوپ.  وڭتۇستىك قازاقستان وبلىستىق سپورت جانە دەنە تاربيەسى باسقارماسىنىڭ باسشىسى الىبەك نۇرتاەۆ ءمۇم­كىندىگىنشە گالبادراحتىڭ قاتىسقان تۋرنيرلەرىنە باردى. – 2015 جىلى قازاقستان دزيۋدو فەدەراتسياسى مەن موڭعوليا دزيۋدو فەدەراتسياسى بىرلەسكەن وقۋ-جاتتىعۋ وتكىزگەن كەزدە بالۋاندار الماسۋ جونىندە دە مەموراندۋم تۇزىلگەن بولاتىن, – دەيدى ول. – وتگونتسەتسەگ 48 كيلو سالماقتا تەك موڭعوليا قۇراماسىنىڭ ءنومىرى ءبىرىنشى دزيۋدوشىسى عانا ەمەس, الەمدىك رەيتينگتە كوش باستاپ تۇرعان ۋرانتسەتسەگ مۋنحباتتىڭ كولەڭكەسىندە قالىپ, وليمپياداعا بارۋدان ءۇمىتىن ۇزگەن. ەكىجاقتى كەلىسىمنەن كەيىن وتگونتسەتسەگ جەكە جاتتىقتىرۋشىسى ەكەۋى قازاقستان قۇراماسىنا اۋىسۋعا نيەت ءبىلدىردى. ءوز ەلىندە مۇمكىندىگى جوق مىقتى سپورتشىلاردى وزگە ەلدىڭ الۋى بارلىق مەملەكەتتەرگە ءتان جاعداي. جەكە باپكەرىنىڭ ەڭبەكقورلىعى, تالاپشىلدىعى, ءوز جۇمىسىنا شەكسىز بەرىلگەندىگى مەنى قاتتى تاڭعالدىردى. ول كۇندەلىك جۇرگىزىپ, وتگونتسەتسەگتىڭ ءار ساعاتىن ەسەپكە الادى. جاتتىعۋداعى جۇك­تە­مەلەرىن بۇگە-شىگەسىنە دەيىن جازىپ, قورىتىندىسىن شىعارادى. ءوز جەرىندە مۋنحباتتىڭ كولەڭ­كەسىندە قالعاندىقتان, ىزدەگەنىن قازاقستاننان تاپقان گالبادراحتىڭ بۇرىنعى جەڭىستەرى تۋرالى ايتار بولساق, ول الەم كۋبوگىنىڭ 2011 جىلعى قولا, 2012 جىلعى كۇمىس جۇلدەگەرى. «ۇلكەن دۋلىعا» ءتۋرنيرىنىڭ ەكى مارتە كۇمىس مەدالىن ەنشىلەگەن. 2013 جىلى ەۋروپا كۋبوگىنىڭ كۇمىس جۇلدەسىن العان. 2012-2014 جىلدار ارالىعىندا گران-پري باسەكەسىندە بەس رەت «قولاعا» قول جەتكىزگەن. وتگونتسەتسەگ 2014 جىلى استانادا وتكەن جارىس­تا باس جۇلدەنى جەڭىپ الدى. فرانتسياداعى «ۇلكەن دۋلى­عا» حالىق­ارالىق تۋرنيرىندە وت­گونتسەتسەگ بارلىق ەسەسىن ءبىر-اق قايتاردى. ول  اقتىق سىنعا دەيىن ەشكىمدى بەت قاراتپاعان. ال فينالدا ءوزىن تاسادا ۇستاپ كەلگەن جەرلەسى ۋرانتسەتسەگ مۋنباحپەن بەلدەسۋگە شىقتى. كەشەگى سىرالعى قارسىلاستار بارىن سالعان. ەكەۋىن دە نامىس وتى جاندىرىپ بارادى. نە بەل, نە بەلبەۋ كەتەتىن ايقاس. ءسال دامىلداۋ, ءبىر ءسات شەگىنۋدى بىلمەيتىن ءبىزدىڭ قىز الىمدى بولدى. تورەشى گالبادراحتىڭ قولىن كوتەرگەندە, موڭعوليا قۇراماسى دزيۋدوشى قىزدارىنىڭ ءبىرى ەڭىرەپ جىلاپ جىبەردى. ال ساف التىندى ءوز قولدارىنان ۇزاتقان باپكەرلەردىڭ تىلدەرىن قىرشىپ العانى انىق. گالبادراحتىڭ دا كوزىنەن لاعىل جاس ءۇزىلىپ, ايداي بەتىنەن تومەن سىرعاناعان. ويى سان تاراۋ عوي. قازاقستان قۇراماسىنا وتپەگەندە, ارمانداي بولىپ الىستان قول بۇلعاعان ريو-دە-جانەيروعا بارار ما ەدى, بارماس پا ەدى؟!  باقتيار تايجان, «ەگەمەن قازاقستان» شىمكەنت