ۋكراينا ءبىرىنشى بولىپ قوشتاستى

*دودا فۋتبولدان فرانتسيادا ءوتىپ جاتقان ەۋروپا چەمپيوناتىنىڭ توپتىق كەزەڭىندە وينايتىن ءالى ءبىر ويىنى بار ەكەنىنە قاراماستان, ۋكراينا قۇراماسىنىڭ بۋدان ارعى جارىس جولىن جالعاستىرا المايتىنى بەلگىلى بولدى. بۇعان بۇرناعى كۇنى ۋكراينانىڭ سولتۇستىك يرلانديادان 0:2 ەسەبىمەن ۇتىلۋىنان بولەك, گەرمانيا مەن پولشانىڭ ۇپاي بولىسكەندەرى دە اسەر ەتتى. وسى كۇنى انگليا مەن ۋەلس اراسىندا وتكەن ءۇشىنشى ويىندا اعىلشىندار سوڭعى مينۋتتاردا جەڭىس دوبىن سالىپ, ءوز وتانداستارىن اۋپىرىمدەپ ارەڭ ۇتتى. انگليا قۇراماسىنىڭ باس جاتتىق­تىرۋشىسى روي حودجسون ۋەلس كومانداسىمەن ويىنعا ءتۋرنيردى اشقان رەسەيلىكتەرمەن كەزدەسۋدەگى قۇرامىن ەشبىر وزگەرتپەي شىعاردى. مۇنداعى بولعان جالعىز وزگەرىس: ماتچتىڭ باسىنان بۇرىشتامانى وتكەن جولعىداي حارري كەين ەمەس, ۋەين رۋني بەرە باستادى. بىراق البيون «ارىس­تاندارى» ەسەپتى ستاندارتتى جاعدايدان ەمەس, الاڭداعى ويىننىڭ اۋانى بارىسىنان اشۋعا ءتيىستى بولدى. وسىنداي تاكتيكا ۇستانعان كوماندا باستاپقى كەزدەردەن. ادام لاللانانىڭ سول قاناتتاعى راحيم ستەريلينگكە زىمىراتىپ دوپ جىبەرۋى ارقىلى العا قاراي جاپپاي لاپ قويدى. سول پارمەندەرىمەن ولار قارسى قاقپا الدىنا تەز-اق جەتىپ باردى. بىراق راحيم­نىڭ بىرنەشە مەتر جەردەن ۇرعان دوبى قاقپانىڭ ماڭدايشاسىنان جوعارى كەتتى. ءبىر بايقالعانى, ۆالليلىك­تەر اعىلشىن­داردىڭ بۇلايشا وزدەرىن بىردەن قىسپاققا ال­عاندارىنا ونشالىقتى قاي­مىعا قويعان جوق. ولار 26-مي­نۋتتا ءوز قاقپالارىنا دوپ كىرىپ كەتە جازداعاندا دا قاتتى ابىرجىمادى. ءبىر كەزدە سوعان دەيىن كولەڭكەدە قال­عانداي بولىپ جۇرگەن گارەت بەيل ءدۇر سىلكىندى. سول-اق ەكەن كوپ ۇزاماي اعىلشىنداردىڭ كوبەسى سوگىلىپ جۇرە بەردى. 42-مينۋتتا قاقپا الاڭى سىرتىنان بەلگىلەنگەن ايىپ دوبىن گارەت كەنەت رونالدۋدىڭ ستيلىندەگىدەي جۇگىرىسپەن كەلىپ, قاتتى سوعىپ جىبەردى. شىڭىلداي ۇشقان دوپ كۇنى بويى مۇلگىپ تۇرعان دجو حارتتىڭ سول جاق قولىن جاناي ءوتىپ, تورعا بارىپ توپ ەتە قالدى. وسىدان كەيىن جانۇشىرعان «ارىس­­تاندار» تەك 56-مينۋتتا عانا ەسەپتى تەڭەستىرە الدى. ويىن بۇدان ءارى دە وسى ىرعاقپەن ءوتىپ جاتتى. نەگىزىنەن اعىلشىندار شابۋىل جاساپ, ۆالليلىكتەر قارسى جورىق ۇيىمداستىرىپ, جانكۇيەرلەردى ەلىكتىردى دە وتىردى. قورعانىستا وتە مىعىم بولعان ۋەلس ماتچتى وسىلاي تەڭ اياقتايتىنداي بولىپ كورىنىپ تۇرعان. تەك سوڭعى مينۋتتاردا دانيەل ءستارريدجدىڭ جەكە بەلسەندىلىگىنىڭ ارقاسىندا عانا اعىلشىندار كۇتپەگەن جەردەن العا شىعىپ كەتتى – 2:1! ماماندار گەرمانيا مەن پولشا كەزدەسۋى اياقتالعان بويدا بۇل ەكى جاساق تەڭ ويناۋ ارقىلى ۋكراينانى تۋرنيردەن ىعىستىرىپ شىعارىپ جىبەردى دەگەن تۇجىرىم ايتتى. شىنىندا دا اتالعان قۇرامالاردىڭ 0:0 ەسەبىمەن تەڭ تۇسۋلەرى سوڭعى ويىندا ۋكراينداردى پولشانى قانداي ەسەپپەن جەڭسە دە, العا شىعا المايتىنداي ەتىپ كەتتى. سەبەبى, بۇل ەكى كوماندادا قازىردىڭ وزىندە ءتورت-تورتتەن ۇپاي بار. ال وسى كۇنى ۋكراينانى 2:0 ەتىپ جەڭگەن سولتۇستىك ير­لانديانىڭ قورجىنىندا 3 ۇپاي تۇر. دەمەك, كەلەسى ويىندا بۇلار نەمىستەردەن جەڭىلىپ, ۋكرايندار 3 ۇپاي الىپ, ونىمەن تەڭەسكەن كۇندە دە ەكەۋىنىڭ ءوزارا كەزدەسۋلەرىنىڭ ناتيجەسى بويىنشا ونىڭ الدىنا تۇسە المايدى. ال گەرمانيا مەن پول­شا اراسىنداعى ويىندا قار­سى­لاستاردىڭ گول سوعاتىن ءمۇم­كىندىكتەرى ونشالىقتى كوپ بول­عان جوق. ءبىرىنشى تۋردا 3 ۇپايدان الىپ قويعان ەكى كوماندا بۇل ماتچتا وتە ساقتىق كورسەتتى. ولار­دى بۇل جولى تەڭ ويىن ابدەن قاناعاتتاندىرار ەدى. سول ارقىلى دا كەلەسى كەزەڭگە شىعۋعا بولاتىنىن ولار جاقسى ءبىلدى, ۋكراينا – سولتۇستىك يرلانديا باسەكەسىنە كەلسەك, بۇلاردىڭ الدىڭعىسى گەرمانيامەن وتكەن ءبىرىنشى ويىنعا قاراعاندا, ءبىراز ەنجار كورىندى. بىراق يرلاندىقتاردىڭ دا ولاردان اسىپ بارا جاتقانى شامالى ەدى. ولار تەك بولعان مۇمكىندىكتەردى وتە جاقسى پايدالانا ءبىلدى. بەت قاتتالىپ جاتقاندا: كەشە تۇندە يتاليا – شۆەتسيا, چەحيا – حورۆاتيا, يسپانيا – تۇركيا قۇرامالارى اراسىندا كەزدەسۋلەر ءوتتى. شۆەتسيادان 1:0 ەسەبىمەن باسىم تۇسكەن يتاليا كومانداسى ەكى تۋردان كەيىن 6 ۇپاي جيناپ, جارىستىڭ 1/8 فينالىنا جولداما السا, حورۆاتيا مەن چەحيا فۋتبولشىلارى ءوزارا جەڭىمپازدى انىقتاي المادى, ەسەپ – 2:2. ال يسپاندىقتار تۇرىك ارىپتەستەرىنە ەش مۇمكىندىك بەرمەي, 3:0 ەسەبىمەن ويسىراتا جەڭىسكە جەتتى. وسىلايشا, پيرەنەي تۇبەگىنىڭ اياقدوپ شەبەرلەرى دە ءتۋرنيردىڭ كەلەسى كەزەڭىنە قادام باستى. سەرىك ءپىرنازار, «ەگەمەن قازاقستان»