وڭتۇستىك – ينۆەستيتسيا ءۇشىن تارتىمدى ايماق

ينۆەستيتسيا جانە دامۋ ءمينيسترى اسەت يسەكەشەۆ باستاعان جۇمىس توبى وڭتۇستىك قازاقستان وبلىسىنا جۇمىس ساپارىمەن كەلىپ, يندۋستريالاندىرۋ جانە «نۇرلى جول» باعدارلامالارىنىڭ قالاي جۇزەگە اسىرىلىپ جاتقان جاعدايىمەن تانىستى. بۇرىنعى فوسفور زاۋىتى اۋماعىندا قۇرىلعان «وڭتۇستىك» يندۋستريالىق ايماعى – ءىرى ءوندىرىس ورىندارى شو­عىرلانعان, ەلىمىزدى شيكىزاتقا تاۋەل­دىلىكتەن قۇتقارىپ, وركەنيەتتى ەلدەر كوشىنە قوساتىن, قۋاتتى قازاقستاننىڭ بولاشاعىنا جاسالىپ جاتقان ناقتى قادام. وسىنداعى جۇمىستاردى وبلىس اكىمىنىڭ ورىنباسارى س.تۇياقباەۆ پەن يندۋستريالىق ايماق باسقارما ديرەكتورى م.تۇرابەكوۆ بايانداپ بەردى. ماسەلەن, 337 گەكتار اۋماقتى الىپ جاتقان ايماقتا 71 ءىرى جوبا قولعا الىنعان. سونىڭ 39-ى جۇمىسىن جولعا قويعان. يندۋستريالاندىرۋ باعدارلاماسى بويىنشا تابىستى جۇمىس جاساپ جاتقان وسى كاسىپورىندارعا 95,1 ملرد تەڭگە ينۆەستيتسيا تارتىلىپتى. ينۆەستيتسيا جانە دامۋ ءمينيسترى اۋدان, قالالاردا دا اشىلىپ جاتقان يندۋستريالىق ايماقتاردىڭ جاي-كۇيىمەن تانىستى. ماسەلەن, ۇلى جىبەك جولىنىڭ بويىنداعى تۇركىستان قالاسىندا 13 جوباعا 15,1 ملرد تەڭگە سالىنعان. وسى قارجىداعى بيۋدجەتتىڭ ۇلەسى 907 ملن تەڭگە عانا. ياعني, وڭتۇستىكتىڭ قالا, اۋداندارى يندۋستريالاندىرۋ باعدارلاماسىندا تابىستى جۇمىستارىن جالعاستىرىپ كەلەدى. ءمينيستردىڭ بولعان كەزەكتى نىسانى – «راحات-شىمكەنت» جشس. بۇل جوبانى زاماناۋي ەۋروپالىق تەحنولوگيالاردى قولدانا وتىرىپ ىسكە اسىرعان – كورەيالىق «Lotte» ترانسۇلتتىق كومپانياسى. بۇل كاسىپورىن جىلىنا 8 مىڭ توننا كونديتەر ونىمدەرىن شىعارادى. مۇندا 150 ادام جۇمىسقا ورنالاستىرىلعان. بۇل جوباعا جۇمسالعان رەينۆەستيتسيا 3 ملرد 200 ملن تەڭگەنى قۇرايدى. – كاسىپورىنداعى جاڭا وندىرىستىك قۋاتتاردى ىسكە قوسۋ دسۇ اياسىندا باسەكەگە قابىلەتتى جاڭا ءونىم شىعارۋعا, سونداي-اق, ەل جۇرتشىلىعىنىڭ كونديتەر بۇيىمدارعا دەگەن سۇرانىسىن قاناعاتتاندىرۋعا مۇمكىندىك اشادى, – دەپ اتاپ كورسەتتى مينيستر. وبلىستا يندۋستريالىق دامۋ كور­سەتكىشتەرىنىڭ بارلىق سالاسىندا ءوسۋ بار. بۇل تۋرالى وبلىس اكىمى ب.اتامقۇلوۆپەن بىرلەسىپ جۇمىس كەڭەسىن وتكىزگەن ينۆەستيتسيا جانە دامۋ ءمينيسترى ايتتى. «وڭتۇستىك قازاقستان وبلىسى بەلسەندى جۇمىس ىستەۋدە. شاعىن جانە ورتا بيزنەس تە جاقسى دامىپ كەلەدى. 200-دەن استام جوبا بار. ءبىر بولىگى پايدالانۋعا بەرىلگەن, ءبىر بولىگى ىسكە قوسىلۋدا, ينفراقۇرىلىم دا دامۋدا. وبلىستى توقىما كلاستەرىنىڭ ءبىر ورتالىعى رەتىندە كورەمىز. مۇندا اۋىل شارۋاشىلىعىن, تاماق ونەركاسىبىن, ماشينا جاساۋ ونەركاسىبىن دامىتۋ ءۇشىن زور الەۋەت بار. پرەزيدەنت اتاپ وتكەندەي, وڭتۇستىك قازاقستان وبلىسى شيكىزات سەكتورىنا تاۋەلدى بولۋدان قالدى», دەپ اتاپ ءوتتى اسەت يسەكەشەۆ. قورىتا ايتساق, وڭتۇستىك قازاقستان وبلىسى مەملەكەت باسشىسىنىڭ يندۋستريالاندىرۋ جانە «نۇرلى جول» باعدارلامالارىن جۇزەگە اسىرۋدا كەۋدە قاتاردا كەلەدى. باقتيار تايجان, «ەگەمەن قازاقستان» وڭتۇستىك قازاقستان وبلىسى