كەڭەسكە دايىندىق جايى قارالدى

سىرتقى ىستەر ءمينيسترى ەرلان ىدىرىسوۆ تۇركىتىلدەس مەملەكەتتەردىڭ ىنتىماقتاستىق كەڭەسىنىڭ (تمىك) باس حاتشىسى راميل گاسانوۆپەن كەزدەسۋ وتكىزدى. كەزدەسۋ بارىسىندا قازاقستاننىڭ تمىك-مەن ءوزارا ارەكەتتەستىك ماسەلەلەرى, اعىمداعى جىلدىڭ كۇزىندە قىرعىزستاندا وتەتىن ۇيىمعا مۇشە-مەملەكەتتەر باسشىلارى كەڭەسىنىڭ وتىرىسىنا دايىندىق جايى تالقىلاندى. ر.گاسانوۆ تۇركى كەڭەسىنىڭ جىل باسىنان باستاپ جاساعان جۇمىسى مەن تاياۋ اراداعى ۋاقىتقا ارنالعان جوسپارلارى تۋرالى ايتىپ بەردى. ول استاناعا تمىك-گە مۇشە-مەملەكەتتەردىڭ جاس ديپلوماتتارىنا ارنالعان بىرلەسكەن كۋرستاردىڭ 3-ءشى باعدارلاماسىنىڭ تىنداۋشىلارىنا سەرتيفيكاتتار بەرۋ سالتاناتىنا قاتىسۋ ءۇشىن كەلگەنىن ايتتى. «اتالعان باعدارلاما ىنتىماقتاستىقتى دامىتۋعا جانە تمىك-گە مۇشە-مەملەكەتتەر سىرتقى ساياسات ۆەدومستۆولارىن جاقىنداستىرۋعا باعىتتالعان, سونداي-اق, مەملەكەتتەر باسشىلارىنىڭ ۋاعدالاستىقتارىن ىسكە اسىرۋداعى تاجىريبەلىك قادام بولىپ تابىلادى», – دەدى ر.گاسانوۆ. ءوز كەزەگىندە, ە.ىدىرىسوۆ تمىك حاتشىلىعىنىڭ ۇيىمنىڭ الداعى سامميتىنە دايىندىعىنا قاتىستى جانە تۇركى كەڭەسى ەلدەرى اراسىنداعى ىنتىماقتاستىق ماسەلەلەرىن ۇيلەستىرۋ ىسىندەگى جالپى قىزمەتىن جوعارى باعالادى. تۇركىتىلدەس مەملەكەتتەردىڭ ىنتىماقتاستىق كەڭەسى نەمەسە تۇركى كەڭەسى – قازاقستان پرەزيدەنتى نۇرسۇلتان نازارباەۆتىڭ باستاماسىمەن 2009 جىلعى قازان ايىندا قۇرىلعان حالىقارالىق ۇيىم. تمىك مۇشەلەرى: ازەربايجان, قازاقستان, قىرعىزستان جانە تۇركيا بولىپ تابىلادى. ۇيىم حاتشىلىعى ىستانبۇل قالاسىندا ورنالاسقان. «ەگەمەن-اقپارات»