ماتەماتيكتەر فۋتبول ناتيجەلەرىن بولجايتىن قۇرىلعى ويلاپ تاپتى

استانا. 2 ماۋسىم. اۆسترياداعى ينسبرۋك ۋنيۆەرسيتەتىنىڭ زەرتتەۋشىلەرى فۋتبولدان 2016 جىلعى ەۋروپا چەمپيوناتى ناتيجەلەرىن بولجاۋعا مۇمكىندىك بەرەتىن ستاتيستيكالىق مودەل ويلاپ شىعاردى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. ساراپتاۋ ناتيجەلەرى ءدۇبىرلى دودادا فرانتسيا مەن گەرمانيا قۇراما كوماندالارىنىڭ جەڭىسكە جەتۋ مۇمكىندىكتەرى جوعارى ەكەنىن كورسەتتى. عالىمدار وزدەرىنىڭ بولجامىن جاساردا 19 بۋكمەكەردىڭ مالىمەتتەرىنە سۇيەنگەن. ولاردى ناقتىلىعى ازىرگە ايتىلمايتىن كۇردەلى ستاتيستيكالىق مودەلدەرگە قولداندى. وسىعان دەيىنگى ستاتيستيكالىق مودەلدەردىڭ سەنىمدىلىگى سوڭعى ەكى ەۋروپا چەمپيوناتى مەن الەم چەمپيوناتىندا دالەلدەندى. الايدا, عالىمدار ولاردىڭ دايىنداعان قۇرىلعىلارىنىڭ ماتچ قورىتىندىسىن 100 پايىزدىق ناقتىلىقپەن بولجاي الۋى ەكىتالاي ەكەنىن ايتتى. ايتا كەتەيىك, بيىل ەۋروپا چەمپيوناتى 10 ماۋسىم مەن 10 شىلدە ارالىعىندا فرانتسيادا وتەدى. ايان ءابدۋالي. دەرەك, فوتو: ريا «نوۆوستي».