پەتروپاۆل. 2 ماۋسىم. سولتۇستىك قازاقستان وبلىسىنىڭ اكىمى ەرىك سۇلتانوۆ جەتىم بالالارعا ارنالعان ينتەرنات ءۇيىنىڭ تاربيەلەنۋشىلەرىمەن كەزدەسىپ, ارنايى سىياقى بەردى. بۇل تۋرالى وبلىستىق ءبىلىم باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
بيىل وڭىردە اسىراۋشىسىنان ايىرىلعان 30 بالا مەكتەپ ءبىتىردى. تۇلەكتەردىڭ الدىندا ءسوز العان ەرىك حامزا ۇلى بۇگىندە ەلىمىزدە ساپالى ءبىلىم الۋعا بارلىق جاعداي جاسالعانىن اتاپ ءوتتى. ونىڭ ايتۋىنشا, سوڭعى ەكى جىلدا وبلىستا جاڭا پاتەر كىلتىن ينتەرناتتىڭ 95 تۇلەگى العان.
«2015-2016 جىلدارى 95 پاتەر ءبولىندى. بۇل الەۋمەتتىك كومەكتى جالعاستىرا بەرەمىز. بيىل ول ءتورت ەسەگە وسەدى», – دەدى وبلىس اكىمى.
تالىمگەرلەر دە جۇرەكجاردى تىلەكتەرىن ايتتى. ولاردىڭ كوپشىلىگى وقۋشىلارعا بىرنەشە جىلدان بەرى قارجىلاي, مورالدىق قولداۋ كورسەتىپ كەلەدى. سولاردىڭ ءبىرى وبلىستىق ىسكەر ايەلدەر قاۋىمداستىعىنىڭ ءتورايىمى باقىتجان ساميەۆا ستوماتولوگ-دارىگەر بولۋدى ارماندايتىن البينا قاپاروۆانى شەفتىك قامقورلىققا العان. .
كەزدەسۋ سوڭىندا ايماق باسشىسى بارلىق تۇلەكتەرگە اقشالاي سىيلىق تاپسىردى.
ءومىر ەسقالي.
دەرەك, فوتو: سولتۇستىك قازاقستان وبلىستىق ءبىلىم باسقارماسىنىڭ ءباسپاسوز قىزمەتى.
