سىر بويىنىڭ سامبوشىلارى – ازيا چەمپيونى

تۇرىكمەنستاننىڭ اشحاباد قالاسىندا سامبودان جاس­وسپى­رىم­دەر, جاستار جانە ەرەسەكتەر اراسىندا ازيا چەمپيوناتى ءوتتى. وسى سىندا وتانداستارىمىز ەكى التىن, ءبىر كۇمىس جانە ەكى قولا مەدال جەڭىپ الدى. چەمپيوناتتا قۇرمەت تۇ­عى­رىنىڭ بيىك ساتىسىنا كوتەرىلگەن بەس ساڭلاعىمىزدىڭ بارلىعى سىر بويىنىڭ سپورتشىلارى بولدى. بۇل باسەكەدە اۋىر سالماقتا ماقسات يساقابىلوۆقا (100 كگ) تەڭ كەلەتىن ەشكىم بولمادى. ول ەرەسەكتەر اراسىندا وتكەن بەلدەسۋدە بارلىق قارسىلاستارىنىڭ جاۋرىنىن جەرگە تيگىزىپ, ازيا چەمپيونى اتاندى.  قازاقستان قۇراماسىنداعى جاستار جاعى دا باس جۇلدەدەن تىس قالمادى. وندا سوڭعى كەزدەرى كوپشىلىكتىڭ كوزايىمىنا اينالىپ جۇرگەن قىزىمىز ءجانيا ماحمۇدوۆا (68 كگ) جاستار اراسىندا ازيا چەمپيو­نى اتاعىن جەڭىپ الدى. ءجانيا كىلەمدە قارسىلاستارىنان ايلاسىن اسىرىپ, كوپتەن بەرى كۇتكەن جەڭىسىنە جەتتى. جارىستا جاسوسپىرىمدەر اراسىندا وتكەن بەلدەسۋلەر دە تارتىستى ءوتتى. بۇل سىندا قازاق بالۋاندارىنىڭ التىن مەدال الۋعا مۇمكىندىكتەرى بار ەدى. مىسالى, 60 كيلو سالماقتا كىلەمگە شىعىپ جۇرگەن دامير ابدەكوۆ سوڭىنا دەيىن چەمپيوندىق اتاققا تالاستى. ونىڭ چەمپيوناتقا جاقسى دايىندالىپ كەلگەنى دە كورىنىپ تۇردى. الايدا, باپ پەن باق دەگەن قاتار جۇرمەسە التىن جۇلدەنى الۋ وڭاي ەمەس.  دامير فينالدا ويلاماعان جەردەن قارسىلاسىنا ەسە جىبەرىپ الدى. ءسويتىپ, كۇمىس مەدالدى قاناعات تۇتتى. قىزدار اراسىندا 75 كيلودا ءلايلا ارىستانبەك ءۇشىنشى ورىن الدى.  بۇل قىزىمىز ءۇشىن جارتىلاي فينالعا شىعىپ, قولا مەدالدى جەڭىپ الۋ ۇلكەن جەتىستىك. سول سياقتى ايەلدەر اراسىندا 56 كيلودا سىنعا تۇسكەن جانسايا مۇرات ءۇشىنشى ورىندى يەلەندى. جارىستا ەكەۋى قولا جۇلدەگەر بولعانىمەن جاقسى قىرىنان كورىندى. داستان كەنجالين, «ەگەمەن قازاقستان»