ۆينچەنتسو نيبالي - «دجيرو د’ يتاليا» جەڭىمپازى

«استانا» ۆەلوكومانداسىنىڭ كاپيتانى ۆينچەنتسو نيبالي جەكسەنبى كۇنى «دجيرو د’يتاليا» كوپكۇندىگىنىڭ جەڭىمپازى اتاندى. وسى ارقىلى ول حالىقارالىق ۆەلوسيپەدشىلەر وداعىنىڭ الەمدىك تۋرى رەيتينگىسىندە 4-ءشى ساتىعا كوتەرىلدى. قازاقستان ۆەلوشاباندوز­دارى­نىڭ ليدەرى بۇرناعى كۇنى جارىستىڭ سوڭعى كەزەڭىن 6-شى بولىپ اياق­تاعانىمەن, سونىڭ الدىنداعى 20-شى كەزەڭدەگى العا سۋىرىلىپ شىققانداعى ارتىق­شىلىعىن ساقتاپ قالدى. بۇل ونى جەڭىسكە جەتكىزدى. وسىنىڭ ءناتي­جەسىندە الەمدىك رەيتينگىدە 231 ۇپاي­مەن 42 ساتى ىلگەرى جىلجىپ, 46-ورىننان 4-ورىنعا ءبىر-اق سەكىردى. يتاليانىڭ تاۋلى-تاستى جوندارىمەن جورتۋدا نيبالي شاپقان ۇستىنە ورلەدى. ونىڭ قارقىنى مارە سىزىعى جاقىنداعان سايىن ارتا ءتۇستى. جارىستىڭ 20-شى كەزەڭىنەن كەيىن كوش تىزگىنىن قولىنا تيگىزگەسىن, سول ۇزدىك كور­سەتكىشىنەن ايىرىلا قويمادى. ۆەلوشاباندوز بۇعان دەيىنگى كەزەڭدەردە كوش باستاپ كەلە جاتقان Orica GreenEDGE كومانداسىنىڭ سپورتشىسى ەستەبان چاۆەستى 52 سە­كۋندقا ارتقا تاس­تاپ كەتتى. ال, جارىستىڭ 20-شى كە­زەڭىندە «كاتيۋشا» كومانداسىنىڭ ۆەلوشاباندوزى رەين تاارامياە جەڭىسكە جەتتى. ەكىنشى ورىندا دارۆين اتاپۋما (BMC Racing), ءۇشىنشى بولىپ اقش سپورتشىسى دجوزەف دومبروۆسكي (Cannondale) كەلدى. اتالعان كوپكۇندىكتىڭ سوڭعى سايىسى ءداستۇر بويىنشا «دوستىق كەزەڭى» دەپ اتالىپ, بارلىق ۆەلوسپورتشىلار مارە سىزىعىن بىرگە كەسىپ ءوتتى. سوندىقتان نيبالي «دجيرو د’يتاليا» گراند-تۋرىنىڭ 2016 جىلعى جەڭىمپاز بولدى. تەگى يتاليالىق ۆەلوشاباندوز ءوزىنىڭ سپورتشىلىق مانسابىندا وسىمەن ەكىنشى رەت «دجيرونىڭ» جەڭىمپازى بولىپ وتىر. بۇعان دەيىن ول 2013 جىلى وسى كوپكۇندىكتە الدىنا جان سالماپ ەدى. ال 2014 جىلى «تۋر دە فرانستى» ۇتتى. وسىنىڭ ارقاسىندا «تۋر دە فرانس», «دجيرو د’يتاليا» جانە «ۆۋەلتا يسپانيا» اتتى ءۇش گراند-تۋردا دا جەڭىسكە جەتكەن تاريحتاعى التىنشى ۆەلوشاباندوز اتاندى. ال 2015 جىلى يتاليا بىرىنشىلىگىندە ەكى رەت توپ جاردى. ول سول چەمپيوناتتا لەنيانو مەن سۋپەرگا تاۋلارىنىڭ اراسىنداعى 219 شاقىرىمدى العاشقى بولىپ باعىندىردى. سونداي-اق, وسى جىلدىڭ اقپان ايىندا وتكەن «ومان تۋرى» ۆەلوكوپكۇندىگىندە 130 شاقىرىمدى 2:25:25 ءجۇرىپ ءوتىپ, جارىس قورىتىندىسى بويىنشا جەڭىمپاز بولدى. ەندى ۆينچەنتسو نيبالي جايلى قىسقاشا توقتالىپ وتسەك, ول 1984 جىلى يتاليانىڭ مەسسينا قالاسىندا تۋعان. «اكۋلا» دەگەن لاقاپ اتقا يە سپورتشى. 2013 جىلدان بەرى «استانا» ۆەلو­كو­مانداسىنىڭ ساپىندا ونەر كور­سەتىپ كەلەدى. تالعات رايىمبەك, «ەگەمەن قازاقستان»