حح حالىقتىق سپورت ويىندارىندا ۇلىستار دا ۇلىقتالدى

شىعىس وڭىرىندە ەل تاۋەلسىزدىگىنىڭ 25 جىلدىعىنا ارنالعان حح حالىقتىق سپورت ويىندارى ءوتتى. ءبىر اپتاعا سوزىلعان ءداستۇرلى سپورت مەرەكەسىندە ءوڭىردىڭ بارلىق قالالارى مەن اۋداندارىنان 19 كوماندا قاتىسىپ, ولار سپورتتىڭ 16 ءتۇرى بويىنشا سىنعا ءتۇستى. بيىل سپورت ويىندارىنىڭ باعدارلاماسىنا وليمپيادالىق سپورت تۇرلەرىن قولداۋ ماقساتىندا دزيۋدو مەن ەركىن كۇرەس قوسىلدى. بۇل سپارتاكيادانىڭ سونىلىعى سوندا, ەلىمىزدە تۇراتىن كوپتەگەن ەتنوستىڭ ۇلتتىق سپورت تۇرلەرىنەن دە جارىستار ۇيىمداستىرىلدى. اتاپ ايتقاندا, قازاقتىڭ «اسىق اتۋ», ورىستىڭ «لاپتا», «گورودكي», «چەحوردا», تاتاردىڭ «كۋراش», پولياكتىڭ «بالىقشى مەن بالىق», بەلورۋستىڭ «پوتياگ» سىندى 15 ءتۇرلى ۇلتتىق ويىن سايىسى جانكۇيەرلەر كوڭىلىن كوتەردى. حح حالىقتىق سپورت ويىندارى «ۆوستوك» ستاديونىندا سالتاناتتى تۇردە اشىلدى. – قازاقستان دۇنيەجۇزىنە بەيبىت باستامالارىمەن, ەكونوميكالىق تابىسىمەن جانە سپورتتاعى ايتۋلى جەڭىستەرىمەن تانىلعان ەل, – دەپ ويىنداردىڭ اشىلۋىمەن قۇتتىقتاعان وبلىس اكىمى دانيال احمەتوۆ ءداستۇرلى ويىندار – ايماق جۇرتشىلىعى اسىعا كۇتەتىن سپورت مەرەكەسى عانا ەمەس, سالاماتتى ءومىر سالتىن قالىپتاستىرۋدىڭ ۇلگىسى ەكەنىن اتاپ ايتتى. ءوڭىر باسشىسىنىڭ ايتۋىنشا, بۇگىندە وبلىس كولەمىندە 3232 سپورتتىق قۇرىلىم, 35 سپورت مەكتەبى جۇمىس ىستەيدى. بيىل سەمەي قالاسىندا سپورتتاعى دارىندى بالالارعا ارنالعان ينتەرنات پەن وبلىستىق جەكپە-جەك ورتالىعى اشىلماق. شىعىسقازاقستاندىق سپورتشىلار حالىقارالىق جانە رەسپۋبليكالىق جارىستاردا 319 مەدالعا, ونىڭ ىشىندە 130 التىن, 119 كۇمىس, 70 قولا مەدالعا يە بولدى. ءوڭىر تاريحىندا تۇڭعىش رەت «التاي» ۆولەيبول كلۋبىنىڭ ەرلەر مەن ايەلدەر كومانداسى ەل چەمپيونى اتانىپ, ازيا كلۋبتارىنىڭ بىرىنشىلىگىندە ەل نامىسىن قورعاۋعا جولداما الدى. جەرلەستەرىمىز ريو-دە-جا­نەي­­رودا وتەتىن جازعى وليم­پيا­دا ويىندارىنىڭ 5 جولداماسىن ۇتىپ الدى. ويىنداردىڭ اشىلۋ سالتاناتى ەستە قالارلىقتاي ەرەكشە ۇيىمداستىرىلعانىن ايتقان ءلازىم. ستاديوندا قاتىسۋشىلار شەرۋى ساپ تۇزەپ, سپورتشىلار مەن تورەشىلەر انت قابىلدادى, بۇلدىرشىندەر مەن وقۋشىلاردىڭ قاتىسۋىمەن ءتۇرلى تاقىرىپتاعى كورىنىستەر قويىلدى. ستاديون الاڭىندا «سپورت», «تاۋەلسىزدىكتىڭ 25 جى­لى», «بەيبىتشىلىك» يدەيالارى ايقىن كورىنىس تاپقان ساحنالىق قويىلىمدار سپورتشىلاردىڭ دا, جانكۇيەرلەردىڭ دە رۋحىن جاني تۇسكەندەي اسەر قالدىرعانى راس. سونداي-اق, ايگىلى شاڭعىشى, قازاقستان رەسپۋبليكاسىنىڭ ەڭبەك سىڭىرگەن سپورت شەبەرى الەكسەي پولتورانين «دەنەشىنىقتىرۋ, سپورت جانە ءتۋريزمدى دامىتۋدا سىڭىرگەن ەڭبەگى ءۇشىن» قۇرمەت بەلگىسىمەن ماراپاتتالدى. اشىلۋ سالتاناتىنىڭ سوڭىندا ۆولەيبولدان ەلىمىزدىڭ ۇلتتىق قۇراماسىنىڭ مۇشەلەرى, «التاي» ۆولەيبول كلۋبىنىڭ ويىنشىلارى دامير اكىموۆ پەن يننا ماتۆەەۆا ويىن الاۋىن جاقتى. ويىن الاۋى جار­قىراي جانعان ساتتەن-اق بارقىت اسپانعا جامىراعان جۇل­دىزداي مەرەكەلىك وتشاشۋلار شاشىلدى. حالىقتىق ويىنداردىڭ العاش­قى جۇلدەلەرىن جەڭىل اتلەتشىلەر ساراپقا سالدى. و.رىپاكوۆا اتىن­داعى جەڭىل اتلەتيكا مانەجىندە ۇزىندىققا سەكىرۋدەن جانە ءتۇرلى قاشىقتىققا جۇگىرۋدەن جارىس­تار ءوتتى. مۇندا قىزدار اراسىندا ۇزىندىققا سەكىرۋدەن رەكوردتىق 4,93 مەترگە قارعىعان وسكەمەندىك پولينا پوكلادوۆاعا تەڭ كەلەر ەشكىم بولمادى. ريودا وتەتىن وليم­پيادا جولداماسىنا يە بولعان ريددەرلىك يرينا سمولنيكوۆا 2 مىڭ مەترگە جۇگىرۋدەن الدىنا جان سالمادى. جەكپە-جەك سارايىن­دا وتكەن ەركىن كۇرەستە ەڭ كوپ مەدالعا سەمەيلىك بالۋاندار قول جەتكىزگەنىن ايتا كەتكەن ءلازىم. ولار بەس سالماق دارەجەسىنىڭ تورتەۋىندە جۇلدەگەرلەر قاتارىنان كورىندى. مەنوۆنوە اتشابارىندا وتكەن كوكپار سايىسىندا 40 كيلولىق سەركەنى قۇر تۋلاقتاي تارتىسقان بىلەكتى دە تاقىمدى كوكپارشىلار ونەرىندە تارباعاتايلىقتاردىڭ شەبەرلىگى ايقىن اڭعارىلدى. قانشا دەگەنمەن, رەسپۋبليكادا دا ولجا سالىپ جۇرگەن وبلىستىڭ كوكپاردان 13 دۇركىن چەمپيونى اتانعان كومانداسى عوي. تاربا­عاتايلىقتار بيىل تاعى جەڭىس تۇعىرىنان كورىندى. بورودۋليحا مەن كوكپەكتى اۋداندارىنىڭ دا كوكپارشىلارى وسال ەمەس ەكەن. حالىقتىق ويىنداردىڭ شا­رىق­تاۋ شەگى – الامان بايگە. 25 شاقىرىمدىق بايگەدە سەمەيدىڭ «ۆودوپاد» ەسىمدى سايگ ۇلىگى كومبەگە جەكە-دارا كەلدى. تۇلپاردىڭ يە­سى سايات ىقىلاسوۆ ارعىماقتى باپ­تاعان ەڭبەگى وتەلگەنىنە قۋا­نىشتى ەكەنىن جەتكىزدى. ال كاتون­قاراعايلىق «سۇڭقار» ەكىنشى بولىپ كەلسە, كۇرشىمدىك «ميلان» اتتى جۇيرىك ءۇشىنشى بولىپ كومبەنى اتتادى. «ميلان» سورەدەن شىققان العاشقى ساتتە سۋىرىلىپ, الدىنا قارا سالماعان ەدى. سونداي-اق, اتشابار اۋماعىندا اقشاڭقان كيىز ۇيلەردىڭ كورمەسى ءوتتى. ارقايسىسى ءار تاقىرىپقا بەيىم­دەلگەن كيىز ۇيلەردىڭ كەرە­مەتى كوپ ەكەن. ماسەلەن, شەموناي­حالىقتار دوستىقتى ناسيحاتتاعان كيىز ۇيىمەن ەرەكشەلەنىپ, وزدەرى دە ءتۇرلى ۇلىستىڭ تىلىندە امانداسىپ جاتتى. كوكپەكتى اۋدانى بولسا, قازاقتىڭ سالقام ءداۋىرىن بەينەلەپ, حاندارى جارلىق شاشا سويلەگەندە, باتىرلارى ارۋاق­تانا ءۇن قوسىپ تۇردى. ۇلتتىق قول­ونەر بۇيىمدارىنىڭ ۇزدىك نۇس­قالارىن قويعان كيىز ۇيلەردە اباي اۋدانىنىڭ اقبوز ۇيلەرى ۇلى اقىننىڭ مۇرالارى, كىتاپتارى جيناقتالعان كىتاپحاناسىمەن ەرەكشەلەندى. بيىلعى سپورت ويىندارىندا جالپىكوماندالىق جۇلدەلەر بولعان جوق. دۋمان اناش, «ەگەمەن قازاقستان» وسكەمەن