سولتۇستىك قازاقستانعا رۋمىنيادان ينۆەستورلار كەلدى

پەتروپاۆل. 26 مامىر. سولتۇستىك قازاقستان وبلىسى اكىمىنىڭ ورىنباسارى مۇحتار مانكەەۆ رۋمىنيا دەلەگاتسياسىمەن كەزدەسىپ, ينۆەستيتسيالىق الەۋەتتى دامىتۋ جايلى اڭگىمەلەستى. بۇل تۋرالى وبلىستىق اكىمدىكتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. بىرقاتار اگروونەركاسىپ كەشەندەرىنىڭ جۇمىس تاجىريبەسىمەن تانىسقان شەتەلدىك كاسىپكەرلەر قازاقستاندا تارتىمدى ينۆەستيتسيالىق احۋال قالىپتاسقانىن اتاپ ءوتتى. ءوز كەزەگىندە مۇحتار مانكەەۆ اۋىل شارۋاشىلىعى سالاسى وبلىس ەكونوميكاسىنىڭ نەگىزىن قۇرايتىنىن, ءداندى داقىلدار القابىنىڭ كولەمى 4,8 ميلليون گەكتار ەكەنىن جەتكىزدى. بۇل رۋمىنياداعى بارلىق ەگىستىكتىڭ تەڭ جارتىسىن قۇرايدى. ەلىمىزدە جينالاتىن استىقتىڭ ۇشتەن ءبىرى وبلىسقا تيەسىلى. رۋمىنيا دەلەگاتسياسىنىڭ جەتەكشىسى «مامبەتوۆ جانە ك», «ابي-جەر», «تايىنشا-استىق» شارۋاشىلىقتارىنىڭ ەگىستىك القاپتارىن ارالاعانىن, مەملەكەت تاراپىنان شارۋالارعا ويداعىداي قولداۋ كورسەتىلىپ وتىرعانىن ايتتى. وبلىس اكىمىنىڭ ورىنباسارى ينۆەستيتسيا تارتۋ بويىنشا 25 مەملەكەتتىڭ وكىلدەرىمەن كەللىسسوزدەرگە قول جەتكىزىلگەنىن تىلگە تيەك ەتتى. ەكى تاراپ ينۆەستيتسيالىق قاراجات قۇيۋ ماسەلەلەرى بويىنشا كەلىسىمدەرگە قول قويدى. ءومىر ەسقالي. دەرەك, فوتو: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.