حرومتاۋ كاسىپورىندار اراسىندا سپارتاكيادا وتكىزدى

اقتوبە. 25 مامىر.  حرومتاۋ قالاسىندا ەلىمىز تاۋەلسىزدىگىنىڭ 25 جىلدىعىنا ارنالعان ەۋرازيالىق توپقا كىرەتىن (ERG) «قازحروم»تۇك» اق  XIII سپورتتىق ويىندارى ءوتتى. بۇل تۋرالى egemen.kz ءتىلشىسى حابارلادى. ءۇش كۇن ارالىعىندا كومپانيانىڭ بارلىق فيليالدارى, وتاندىق تاۋ-كەن كەشەنىنىڭ ءىرى كاسىپورىندارى – ءدوڭ تاۋ-كەن بايىتۋ كومبيناتى, «كازمارگانەتس» كەن باسقارماسى, اقتوبە جانە اقسۋ فەرروقورىتپا زاۋىتتارىنىڭ شامامەن 300 ۇزدىك سپورتشىسى جارىستىڭ ۆولەيبول, شاعىن فۋتبول, ۇستەل تەننيسى, شاحمات, كىر سپورتى, باسكەتبول, گورودكي جانە دارتس تۇرلەرىنەن ءوزارا سىنعا ءتۇستى. وسى ءۇش كۇندە ءدوڭ تاۋ-كەن بايىتۋ كومبيناتىنىڭ دەنە شىنىقتىرۋ-ساۋىقتىرۋ كەشەنىنىڭ سپورتتىق الاڭى كاسىپورىن جۇمىسشىلارىنىڭ عانا ەمەس, قالا تۇرعىندارىنىڭ دا نازارىن اۋداردى, ولار ءوز كوماندالارىنىڭ شاشباۋىن كوتەرىپ, جانكۇيەر بولدى. سپارتاكيادانىڭ شارتى بويىنشا سپورتتىڭ ەكى تۇرىنەن – گورودكي جانە دارتستان وتكەن سىندارعا  مىندەتتى تۇردە كاسىپورىن باسشىلارى جانە كاسىپوداق جەتەكشىلەرى قاتىستى. «وسىنداي اۋقىمدى سپارتاكيادانىڭ ءبىزدىڭ حرومتاۋ قالاسىندا وتكىزىلىپ جاتقانى وتە سۇيسىنەرلىك. جانە بۇل ءوز ناتيجەسىن بەرەدى. مىسالعا, اقسۋ فەرروقورتىپا زاۋىتىنىڭ «مەتاللۋرگ» سپورت ءۇيىنىڭ تاربيەلەنۋشىلەرى قازاقستاندا جانە ودان تىسقارى جەرلەردە وتكىزىلگەن جارىستاردا بيىك تۇعىردان كورىنىپ ءجۇر. ءدوڭ تاۋ-كەن بايىتۋ كومبيناتىنىڭ ۆولەيبول كومانداسى سۋپەرليگادا وينايدى, اقتوبە فەرروقورىتپا زاۋىتىنىڭ جاس گاندبولشىلارى  بىرنەشە رەت الەم چەمپيونى اتاعىن يەلەندى. «قازحروم» سپارتاكياداسى – ءبىزدىڭ ۇجىمنىڭ  بىرىگۋىنە كومەكتەسەتىن يگى داستۇرلەردىڭ ءبىرى, دەدى «قازحروم» تۇك» اق پرەزيدەنتى ۆيكتور تيل. سپارتاكيادا قورىتىندىسى بويىنشا ەكى جىل قاتارىنان اقتوبە فەرروقورىتپا زاۋىتىنىڭ جۇمىسشىلارى ءبىرىنشى ورىندى جەڭىپ الدى. ەكىنشى ورىندى ءدوڭ تاۋ كەن بايىتۋ كومبيناتىنىڭ سپورتشىلارى, ءۇشىنشى ورىندى اقسۋ فەرروقورىتپا زاۋىتىنىڭ كومانداسى يەلەندى. بارلىق جەڭىمپازدار جانە جۇلدەگەرلەر مەدالدارمەن, كۋبوكتارمەن, ديپلومدارمەن جانە اقشالاي سىيلىقتارمەن ماراپاتتالدى. بىراق «قازحروم» جۇمىسشىلارى ءۇشىن بيىلعى سپورتتىق جارىستار وسىمەن اياقتالمايدى. تامىز ايىندا كومپانيا قۇراماسى اقسۋ فەرروقورىتپا زاۋىتى بازاسىندا وتكىزىلەتىن ەۋرازيالىق توپتىڭ العاشقى سپارتاكياداسىنا قاتىسادى. ساتىبالدى ءساۋىرباي. دەرەك, فوتو: egemen.kz