قىتايدا ەرەكشە اۆتوبۋستىڭ تانىستىرىلىمى ءوتتى (ۆيدەو)

استانا. 25 مامىر. قىتاي استاناسى بەيجىڭدە High-Tech Expo حالىقارالىق كورمەسىندە جەرگىلىكتى ينجەنەر ماماندارى ويلاپ تاپقان ەرەكشە TEB (Transit Elevated Bus) اۆتوبۋسىنىڭ تانىستىرىلىمى ءوتتى. بۇل تۋرالى rosbalt.ru سايتىنا سىلتەمە جاساعان egemen.kz ءتىلشىسى حابارلادى. TEB اۆتوبۋسى پورتالدى كرانعا ۇقساستىرىلعان. ول ارنايى قويىلعان رەلس جولدارىمەن قوزعالادى. سونىمەن قاتار, قوعامدىق كولىكتىڭ ەرەكشە تۇسى, كولىك كەپتەلىسىندە تۇرىپ قالماي, اۆتوموبيلدەردىڭ ۇستىنەن وتۋگە قاۋقارلى. جوبانىڭ باستى ينجەنەرى باي ءتسۋميننىڭ ايتۋىنشا, TEB اۆتوبۋسىنىڭ قىزمەتى جاعىنان مەترو مەن مونورەلستەردەن كەم تۇسپەيدى جانە ارزانداۋ بولادى. اۆتوبۋستىڭ ەنى – 8 مەتر, بيىكتىگى – 4,6 مەتر, ال ۇزىندىعى – 32 مەتردى قۇرايدى. مۇنداي اۆتوبۋستىڭ استىنان اۆتوموبيلگە ارنالعان ەكى جول وتۋگە بولادى. ازىرگە بۇل جوبانىڭ قاشان جۇزەگە اساتىنى بەلگىسىز. الايدا, وسى جىلدىڭ ەكىنشى جارتىسىندا حەبەي پروۆينتسياسىندا سىناقتان وتكىزىلۋ جوسپارلانۋدا. ايان ءابدۋالي. دەرەك, فوتو: rosbalt.ru.