باي ەلمەن بايلانىستى نىعايتقان ءتيىمدى

كەشە ءسىم-دە قازاقستان رەسپۋبليكاسىنىڭ كاتارداعى توتەنشە جانە وكىلەتتى ەلشىسى اسقار شوقىباەۆتىڭ جۋرناليستەرگە ارنالعان بريفينگى بولدى. وندا ەلشى كاتار ەلى تۋرالى تولىمدى اقپاراتتار بەرۋمەن قاتار, قازاقستان مەن كاتار اراسىنداعى ساياسي, ەكونوميكالىق جانە مادەني بايلانىستارعا توقتالىپ ءوتتى. كاتار پارسى شىعاناعى ايماعىنداعى عانا ەمەس, الەمدەگى جوعارى دامىعان ەلدەردىڭ ءبىرى. تابيعي گاز وندىرۋدەن جانە ونىڭ قورى جاعىنان الەمدە ءۇشىنشى ورىن الادى. سونداي-اق, مۇناي مەن مۇناي ونىمدەرىنىڭ الەمدەگى ەڭ ۇلكەن ەكسپورتەرلەرىنىڭ قاتارىنا جاتادى. جان باسىنا شاققانداعى ءىجو كولەمى جونىنەن الەمدە ءبىرىنشى ورىن (100 مىڭ دوللارعا جۋىق) الادى. ەلدىڭ وسىنداي جەتىستىكتەرى بارىن ايتا كەلىپ, ەلشى كاتاردىڭ اسا ءىرى ەكونوميكالىق ارىپتەستەرى كىمدەر ەكەنىن دە اتاپ ءوتتى. ەلدە وندىرىلەتىن بارلىق مۇناي ءونىمىنىڭ 54 پايىزى جاپونياعا تاسىمالدانادى ەكەن. ودان كەيىنگى ورىنداردا سينگاپۋر, وڭتۇستىك كورەيا ەلدەرى تۇر. ەكى ەلدىڭ دە يمپورتقا شىعاراتىن تاۋارلارى بىركەلكى بولعاندىقتان, كاتاردىڭ قازاقستانمەن اراداعى ساۋدا-ەكونوميكالىق بايلانىسىنىڭ كولەمى شاعىن. 2015 جىلى ول بار بولعانى 463,5 مىڭ اقش دوللارىنا تەڭ بولعان. كاتاردىڭ استاناعا بولگەن گرانتىنا سالىنعان «نۇر-استانا» مەشىتى ەكى ەلدىڭ اراسىنداعى جىلى قارىم-قاتىناستىڭ سيمۆولى سەكىلدى بولىپ تۇرادى. ەلباسى نۇرسۇلتان نازارباەۆتىڭ كاتارعا 2015 جىلعى رەسمي ساپارى بارىسىندا استانادا شەيح تاميم اتىنداعى مەكتەپ سالۋ ءۇشىن 13 ملن. دوللار بولىنەتىندىگى تۋرالى كەلىسىم بولعان. سونىمەن قاتار, كاتار تاراپى قازاقستاننان قوي ەتىن, كوكونىستەر مەن جەمىستەر جانە ت.ب. ءونىم تۇرلەرىن ساتىپ الۋعا مۇددەلى ەكەنىن جەتكىزگەن. جاقسىباي سامرات, «ەگەمەن قازاقستان»