قۇرالايدىڭ سالقىنى

حالقىمىز ءار جىلداعى مامىردىڭ 20-25 جۇلدىزى ارالىعىن وسى شاعىن حاباردىڭ تاقىرىبىنا شىعارىپ وتىرعانىمىزداي كيىك لاعىن ورگىزەتىن كەز دەپ سانايدى. ارينە, بۇل حالىقتىق كۇنتىز­بەنىڭ دالدىگى مەن ناقتىلىعىنا ءارى اقي­قاتتىعىنا ەشكىم كۇمان كەلتىرە المايدى. وسى تۇرعىدا «دالا ارۋىنىڭ» قازىرگى جاي-كۇيى ءجو­نىندە بىرەر اۋىز ءسوز قوزعاعاندى ءجون كوردىك. اتاپ ايتقاندا, بۇل اقبوكەندەردىڭ اقجايىق ايما­عىنداعى بۇگىنگى سانىنا بايلانىستى, ياعني ءار جىل سايىن ءساۋىر ايىنىڭ سوڭعى اپتالارىنىڭ بىرىندە رەسپۋبليكانىڭ بارلىق وڭىرلەرىندە كيىكتەردىڭ ناقتى سانىن ەسەپتەۋ ءۇردىسى ەنگىزىلگەن. بۇل اسا جاۋاپتى ءىس-شارا اۋە ساناعى دەپ اتالادى. ياعني كيىك­تەر ساناعى قازىرگى كەزدە جەردە ەمەس كوكتە تىكۇشاقتىڭ كومەگى ارقىلى جۇرگىزىلەدى. مۇنى اتقا­راتىندار – «قازاقستان بيوالۋان تۇرلىلىگىن ساقتاۋ قاۋىمداستىعى» رەسپۋبليكالىق قوعامدىق بىرلەستىگى عالىمدارى مەن «وحوتزووپروم» ارنايى كاسىپورنى جانە وبلىستارداعى ورمان شارۋاشىلىعى, جانۋارلار دۇنيەسى اۋماقتىق ينسپەكتسياسىنىڭ ماماندارى ەكەنىن دە ايتا كەت­كەننىڭ ارتىقشىلىعى جوق. باتىس قازاقستان وبلىسىنداعى اتالعان ينسپەكتسيانىڭ ءبولىم باسشىسى تالعات ءىلياسوۆتىڭ ايتۋىنشا, اقجايىق الابى اۋماعىندا بۇگىندە 51 مىڭنان استام اقبو­كەن بار. الداعى كەزدە كيىكتەردىڭ سانى قان­شا بول­ماق؟ جەر­گىلىكتى عالىمدار مەن ما­مانداردىڭ تۇجى­رىمداۋىنشا بيىل ورال وڭىرىندە دالا ەركەلەرىنىڭ بەلگىلى ءبىر مولشەردەگى ءوسىمى كۇتىلمەك. ال وسى اۋە سانا­عىنىڭ ناتيجەسى قاشان ءازىر بولادى دەگەن ساۋالعا كەلسەك, جەتەكشى مامانداردىڭ ايتۋىنشا, بۇل كەز تۇتاستاي رەسپۋبليكا بويىنشا جازدىڭ سوڭعى ايىنا سايكەس كەلەدى. سوعان دەيىن بارلىق ەسەپتەۋ­لەر مەن تۇسىرىلىمدەر وڭدەل­مەك. قازىر ەل اۋماعىنداعى اقبو­كەندەر تۇتاستاي تولدەپ بولدى. بۇگىنگى كۇننەن باستاپ دالا ارۋلارى لاقتارىن ورگىزە باستادى دەيدى ماماندار. كيىكتىڭ لاعىن قۇرالاي دەيدى. اقبوكەندەر لاقتاعان كەزدى حالقىمىز قۇرالايدىڭ سالقىنى دەپ اتايدى. ويتكەنى, سالقىندىق اقبوكەندەردىڭ تولدەۋى ءۇشىن وتە قولايلى جاعداي ەكەن. قايران تابيعاتتىڭ جاراتىلىسى-اي دە­سەڭشى. سول سالقىندىق بۇعان دەيىن دالامىزدىڭ ءار قيىرىندا بولدى دا. ەندى ءسىرا كۇن ىسيتىن شىعار. ءويت­كەنى, سينوپتيكتەر الداعى كۇن­دەرى اۋانىڭ تەمپەراتۋراسى 30 گرا­دۋستىڭ ۇستىنە شىعادى دەپ وتىر. دالامىزدىڭ ءسانى, البەتتە, كيىكتەر. ەندەشە, ونىڭ سانى كوبەيە تۇسكەنىنە نە جەتسىن؟ وسىندايدا اقبوكەندەردى ايالايىق, كيەلى جانۋارلار ساناتىنداعى ساحارانىڭ بوتاكوزدەرىنە مىلتىق كوزدەمەيىك دەگىمىز كەلەدى. تەمىر قۇسايىن, «ەگەمەن قازاقستان» باتىس قازاقستان وبلىسى