«اتتاندىق ساپارعا, كوڭىلدە مول ءۇمىت!»

سارىاعاشتىقتار سولتۇستىك وڭىرلەرمەن تانىسۋعا بەت الدى وڭتۇستىك – ادام رەسۋرسىنا باي. بۇل ءبىر جاعىنان ماقتا­نىش بولعانىمەن, ەكىنشى جاعى­نان ەكونو­ميكالىق قيىندىق تۋعىزات­ىن­دىعىن جاسىرۋعا بولمايدى. رەسپۋبليكا بويىنشا اۋىل شارۋاشىلىعىنان تاماشا جەتىس­تىككە جەتىپ, تەك جىلىجاي سالاسىنداعى ۇلەسى 87 پايىز مەجەگە جەتكەن وڭتۇستىك قازاقستان وبلىسىندا ءىرى اگروشارۋاشىلىقتار ساۋساقپەن سانارلىقتاي. جەر قورىنىڭ ازدىعىنان ءبىر-ەكى گەكتار جەرى بار شارۋالار قانشا ەپتى بولعانىمەن, قىسقا ءجىبى كۇرمەۋگە كەلمەي, ۇكىمەتتەن بەرىلەتىن كومەك­تەر­دى الا الماي, كۇيىنىپ جۇرەدى. ەسەسىنە قازاقستاننىڭ سولتۇستىك وبلىستارىندا حالىق سانى از, جەر قورى كوپ. ەلباسى وڭتۇستىككە كەلگەن ساپارىنىڭ بىرىندە كەلەلى كەڭەستە جۇمىس تاپپاي جۇرگەن ءوڭتۇس­تىكقازاقستاندىقتاردىڭ سول­تۇس­تىككە قونىس اۋدارىپ, جاعداي­لارىن تۇزەۋگە اقىل قوسقان. سىرت دەيتىندەي ەمەس, ەكى جاق تا – قازاق جەرى. ەل اعالارى ماقۇل كورگەن. جاقىندا سارىاعاش اۋدانىنا وبلىستىق ءماسليحاتتىڭ حاتشىسى حاميت ايتورەەۆ ارنايى ىسساپارمەن بارىپ, جۇرتشىلىققا «سەرپىن» باعدارلاماسى اياسىندا قولعا الىنىپ جاتقان جۇمىستار جايىندا كەڭەس وتكىزدى. ەل ءىشى – التىن بەسىك. «ەلدە بولسا, ەرىنگە تيەدى» دەيتىن, مەملەكەتتىڭ كەلەشەگىنە ءبىر ازاماتى رەتىندە ۇلەس قوسىپ جۇرگەن اقبەرەندەر كوپ. سونىڭ ءبىرى – بەلگىلى كاسىپكەر, وبلىستىق ءماسليحاتتىڭ دەپۋتاتى جاڭاباي اعابەكوۆ: «سولتۇستىككە قونىس اۋداراتىن جەرلەستەرىمنىڭ كوشى-قون شىعىنىن, تەحنيكاسىن ءوزىم كوتەرەمىن. سولتۇستىك قازاقستان دا ءوز جەرىمىز. تابيعاتى قاتال دەپ قورىقپاڭىزدار», – دەگەن. سارىاعاش اۋدانىنىڭ اكىمى بۇحارباي پارمانوۆ – كوبىك ءسوز, قۇرعاق ۋادەنىڭ ەمەس, ناعىز ءىستىڭ ادامى. «سولتۇستىك ايماقتا تابيعات قاتقىلداۋ بولعانىمەن, جەرىنىڭ قۇنار­لىلىعى وتە جوعارى. ءبىز بىرگە بارامىز. ول جاقتىڭ تۇرمىس جا­ع­دايى­­مەن تانىسامىز. اۋدان اكىم­دەرى­­مەن سويلەسىپ, قانداي جەرلەردى بەرە­تىندەرىن بايقايمىز. كوشىرىپ تاستاپ, ءىس سونىمەن بىتپەيدى. ءبىز ءاردايىم بايلانىستا بولامىز», – دەدى ول. وسىلايشا, جۇمىس توبى قۇرىلعان. ەل اعالارىنىڭ ۋاجىنە توقتاعان, تۇرمىس جاعدايىن تۇزەۋگە بەكىنگەن كەرۋەن, 40 ادامنان تۇراتىن توپ  سولتۇستىككە اتتاندى. بۇل العاش­قى ساپار ەمەس. بۇرىنىراق بارعان­دار بۇگىندە باقۋاتتى وتباسىلارعا اينالعانىن وسىنداعى اعايىندار بىلەدى. باقتيار تايجان, «ەگەمەن قازاقستان»