تالدىقورعان. 24 مامىر. قازاقستان قورعانىس ءمينيسترى يمانعالي تاسماعامبەتوۆ بۇگىن الماتى وبلىسىنداعى سارىوزەك گارنيزونىنا ۇشىپ كەلىپ, شۇعىل تەكسەرۋ جۇمىستارىن جۇرگىزدى. بۇل تۋرالى 7sunews.kz اقپارىنا سۇيەنگەن egemen.kz ءتىلشىسى حابارلادى.
قورعانىس ءمينيسترى اسكەري بولىمدە وقۋ-جاۋىنگەرلىك دايارلىق, اسكەري بولىمدەردىڭ جازعى وقىتۋ كەزەڭىنە ازىرلىگى ماسەلەلەرىن باقىلاپ, مەرزىمدى قىزمەتتەگى اسكەري قىزمەتشىنىڭ قازا بولۋ دەرەگى ەگجەي-تەگجەيلى تالقىلادى.
ەستەرىڭىزگە سالا كەتەيىك, 21 مامىر كۇنى 12740 اسكەري بولىمىندە پارك-شارۋاشىلىق كۇنى وتكىزىلۋ بارىسىندا ءبىر قاتارداعى جاۋىنگەر قازا تاپتى. كۇن اياسىندا ءبولىم, ۇرىس ماشينالارى پاركىنىڭ اۋماعىندا, بولىمشەلەردىڭ ىشىندە جۇمىستار ۇيىمداستىرىلعان. عيماراتتى بولشەكتەۋ بويىنشا جۇمىستاردى ورىنداۋ كەزىندە قۇرىلىستىڭ بولىگى وپىرىلىپ تۇسەدى. سونىڭ سالدارىنان قۇرىلىس ەلەمەنتتەرىنىڭ ءبىرى سول ماڭايدا تۇرعان 12740 اسكەري ءبولىمىنىڭ مەرزىمدى قىزمەتتەگى قاتارداعى جاۋىنگەرى ە. جاقاشەۆتىڭ ۇستىنە قۇلايدى. سالدارىنان اۋىر جاراقات العان اسكەري قىزمەتشى سارىوزەك كەنتىنىڭ لازارەتىندە كوز جۇمادى.
وقيعانىڭ سەبەپتەرى جوعارىدا اتالعان ءبولىم لاۋازىمدى ادامدارىنىڭ اسكەري قىزمەت وتكەرۋ بارىسىندا قاۋىپسىزدىك شارالارىن قامتاماسىز ەتۋ جونىندەگى تالاپتاردىڭ ورىندالماۋىنان شىعادى.
«اسكەردە ورىن الاتىن قايعىلى وقيعالاردا قاۋىپسىزدىك شارالارىنىڭ بۇزىلۋى, باقىلاۋدىڭ بولماۋى جانە لاۋازىمدى ادامنىڭ نەمقۇرايلىعى سەبەپكەر بولادى. اتالعان فاكتى بويىنشا قىلمىستىق ءىس قوزعالعانى وتە دۇرىس جانە بارلىق كىنالى ادامدار لايىقتى جازالارىن الۋى ءتيىس», - دەدى قورعانىس ۆەدومستۆوسىنىڭ باسشىسى تەكسەرۋ بارىسىندا.
تەكسەرىس اياقتالعاننان كەيىن كادرلىق جانە تارتىپتىك شەشىمدەر قابىلدانادى.
نۇربول الدىباەۆ.
دەرەك, فوتو: 7sunews.kz.
