جيىندا الاياقتىق قىلمىستاردىڭ الدىن الۋ, تىركەۋ جانە قىلمىستىق ىستەردى تەرگەپ-تەكسەرۋ, ولارمەن شەشىم قابىلداۋ بارىسىندا زاڭ تالاپتارىنىڭ ساقتالۋ جاعدايىنا قاتىستى ماسەلەلەر تالقىلاندى. وندا ايماقتا الاياقتىق قىلمىسىنىڭ تىيىلماي كەلە جاتقانى, تۇرعىنداردىڭ ارباۋشىلاردىڭ قۇرىعىنا ءىلىنىپ قالا بەرەتىنى ايتىلدى. «كونستيتۋتسيامىزدىڭ 26-بابىنا سايكەس, سوتتىڭ شەشىمىنسىز ادامداردى م ۇلىكتەرىنەن ايىرۋعا تىيىم سالىنعان. دەگەنمەن, ازاماتتاردىڭ ادال ەڭبەكپەن تاپقان م ۇلىكتەرىن قىلمىستىق جولمەن يەمدەنىپ, وڭاي ولجا تابۋ دەرەكتەرى وبلىسىمىزدا كەزدەسۋدە», – دەدى جيىندا پروكۋراتۋرا وكىلدەرى. سونىمەن قاتار, القادا وسى جىلدىڭ 4 ايىندا اتقارىلعان شارۋالار ايتىلدى. وبلىس اۋماعىندا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە تىركەلگەن 414 (570) الاياقتىق قىلمىس تىركەلىپ (قىلمىستىق ءىس قوزعالىپ), ونى وتكەن جىلدىڭ وسى مەرزىمىمەن سالىستىرعاندا 156 نەمەسە 27,4 پايىزعا تومەندەگەن. بۇل ساناتتاعى قىلمىستار قازالى (6-دان 14-كە) مەن شيەلى (24-تەن 27-گە) اۋداندارىنان باسقا بارلىق قاداعالاۋ اۋماقتارىندا تومەندەگەن بولسا, ال قارماقشى اۋدانىندا ءبىر دەڭگەيدە قالعان (7/7). سونىمەن قاتار, وبلىس اۋماعىندا الاياقتىق قىلمىستىڭ نەگىزگى تۇرلەرى, ياعني جۇمىسقا ورنالاستىرۋعا 31-دەن 52-كە, پاتەردى الىپ بەرۋگە 8-دەن 29-عا, جەر ۋچاسكەلەرىن راسىمدەپ بەرۋگە 6-تان 25-كە, تەلەفون ارقىلى الداۋعا 8-دەن 13-كە جانە ۇيالى تەلەفوندى قوڭىراۋ سوعۋ ءۇشىن سۇراپ الىپ يەلەنىپ كەتۋ 11-دەن 16-عا وسكەن. نەگىزىنەن وبلىس كولەمىندە پاتەر, جەر الىپ بەرۋگە قاتىستى الاياقتىق قىلمىستاردىڭ بارلىعى قىزىلوردا قالاسىندا ورىن الۋدا. ونىڭ بىردەن ءبىر سەبەبى سوڭعى جىلى وبلىس ورتالىعى قىزىلوردا قالاسىندا مەملەكەتتىك باعدارلامامەن سالىنىپ جاتقان ۇيلەردىڭ كوبەيگەنى جانە قالا توڭىرەگەندەگى جەرلەرگە سۇرانىستىڭ جوعارى بولۋىندا. ماسەلەن, قالا كولەمىندە جەرگە 48000 ادام جانە پاتەرگە 19121 ادام كەزەكتىلىكتە تۇر. ياعني, الاياقتار كەز كەلگەن جاعدايلاردى ءتيىمدى پايدالانىپ, ونىڭ ىشىندە جەر مەن پاتەرگە سۇرانىستىڭ جوعارى بولۋىنا بايلانىستى وسى جەردە تۋىنداعان قاتىناستاردىڭ توڭىرەگەندە الاياقتىق ارەكەتتەرىن جۇزەگە اسىرۋدا. الاياقتىق قىلمىسىن جاساۋ ءۇشىن تاۋداي ۋادە بەرىپ, ادامدى الداپ, سەنىمىنە كىرە بىلسەڭ بولدى. وعان كۇش قولدانۋ, جاسىرىن ارەكەت جاساۋ قاجەت ەمەس. سوندىقتان دا ايەل ادامدار قىلمىستىڭ بۇل ءتۇرىن ءجيى جاساۋدا. تالداۋ كورسەتكەندەي, الاياقتىڭ ارباۋىنا ءتۇسىپ, ءجابىر كورگەن ادامداردىڭ كوبىسى وزدەرىنىڭ ارەكەتىن بىلمەستىكتەن بولعانىن اڭعارتادى. جيىندا وبلىس پروكۋرورى ساپاربەك نۇرپەيىسوۆ ءسوز الىپ, الاياقتىق قىلمىسىنىڭ الدىن الۋ بارىسىندا جان-جاقتى جۇمىس جاساۋ كەرەكتىگىن قاداپ ايتتى.
تالعات رايىمبەك.
دەرەك: قىزىلوردا وبلىستىق پروكۋراتۋراسىنىڭ ءباسپاسوز قىزمەتى.
فوتو: alashainasy.kz.
