شىمكەنت. 24 مامىر. بۇدان ەكى اپتا بۇرىن جوعالىپ كەتكەن ستۋدەنت ايگەرىم وسپانبەكوۆانىڭ ءمايىتى قازىعۇرت اۋدانىنىڭ اۋماعىنان تابىلدى. بۇل تۋرالى وڭتۇستىك قازاقستان وبلىسى سارىاعاش اۋداندىق پروكۋراتۋراسىنىڭ مالىمەتىنە سۇيەنگەن egemen.kz ءتىلشىسى حابارلادى.
ەسكە سالا كەتەيىك, بيىلعى جىلعى 11 مامىر كۇنى سارىاعاش اۋدانىنىڭ 53 جاستاعى تۇرعىنى اۋداندىق ىشكى ىستەر بولىمىنە ءوزىنىڭ 1998 جىلى تۋعان قىزى, 1-كۋرس ستۋدەنتى وسپانبەكوۆا ايگەرىم سۇنناتقىزىنىڭ 10 مامىر كۇنى ساعات 15:00 شاماسىندا وقۋىنا بارۋ ءۇشىن شىمكەنتكە كەتىپ بارا جاتقان جولىندا كەنەت جوعالىپ كەتكەنىن ايتىپ, شاعىمدانىپ كەلدى.
اتالمىش فاكت سوتقا دەيىنگى تەكسەرۋدىڭ ءبىرتۇتاس تىزىمىنە ەنگىزىلدى. وسىعان بايلانىستى سارىاعاش اۋداندىق ىشكى ىستەر ءبولىمىنىڭ قىزمەتكەرلەرى جوعالعان قىزعا ىزدەۋ جاريالادى.
سول كۇنى 18 جاسار ستۋدەنت قىزدىڭ جەتىساي-شىمكەنت تاسجولىنىڭ سارىاعاش اۋدانىنا قاراستى جاڭاتۇرمىس اۋىلى تۇسىنان جولاي كەزدەسكەن كولىككە وتىرعانى بەلگىلى بولدى. ول ماشينادا كەلە جاتىپ, تاكسي جۇرگىزۋشىنىڭ تۇرىنەن قورقىپ كەلە جاتقانىن, ءوزىن شىمكەنتتە كۇتىپ الۋدى ءوتىنىپ, الدەكىمگە سمس تاستاعان ەكەن. بىراق ءبىرازدان سوڭ ءوزى ەشكىمنىڭ قوڭىراۋىنا جاۋاپ بەرمەي قويادى. اقىرىندا وبلىس ورتالىعىنا جەتپەگەن.
جوعالعان ستۋدەنت قىزدىڭ ءمايىتى جاڭاتۇرمىس اۋىلىنىڭ كورىپكەلى ورىنحان ءجۇنىسوۆتىڭ اقپارى بويىنشا قازىعۇرت اۋدانىنىڭ اۋماعىنان, باعىس اۋىلىنا جاقىن جەردەن كەشە كەشكە تابىلعان. ءبيدىڭ ايتۋىنشا, قىز ولەر الدىندا ءبىراز قورلانعان. ال بۇگىن تاڭەرتەڭ مارقۇمنىڭ دەنەسى جەر قوينىنا بەرىلدى.
قىزدىڭ ناقتى قالاي قازا تاپقانى ازىرگە اشىلعان جوق.
وڭتۇستىك قازاقستان وبلىستىق ىشكى ىستەر دەپارتامەنتىنىڭ دەرەگى بويىنشا, قىلمىسكەر الدىمەن ايگەرىمدى قورلاعان, سودان كەيىن ءوزىن ولتىرگەن. «23.05.2016 جىلى شامامەن 18.00 ساعاتتا سارىاعاش اۋداندىق ىشكى ىستەر ءبولىمىنىڭ كەزەكشى بولىمىنە ءبىر تۇرعىن سارىاعاش اۋدانىنداعى باعىس اۋىلىنىڭ جانىنان ءبىر ايەلدىڭ ءولى دەنەسى تابىلعانى تۋرالى حابارى ءتۇستى. جەدەل-ىزدەستىرۋ توبى سارىاعاش اۋدانىنىڭ باعىس اۋىلىنا قاراي باراتىن اسفالت جولدىڭ بويىنان 130 مەتردەي قاشىقتىقتان ايەل ادامنىڭ ءمايىتىن تاپقان. ونىڭ موينى, وڭ قولى مەن ەكى اياعى ءتۇسسىز سكوتچپەن جانە توقىما بەلدىكپەن بايلانىپ تاستالعان. پوليتسەيلەر جەدەل-ىزدەستىرۋ شارالارىن جۇرگىزۋ بارىسىندا ونىڭ بۇدان بۇرىن جوعالىپ كەتكەن وسپانبەكوۆا ايگەرىم ەكەنىن تانىدى», - دەلىنگەن حابارلامادا.
قازىرگى تاڭدا 1998 جىلى تۋعان قىزدى ءولتىرۋشى كۇدىكتى رەتىندە 1990 جىلعى جىگىت ۇستالدى. ودان ايعاقتى زاتتار رەتىندە قىزدىڭ ۇيالى تەلەفونى مەن اقشاسى الىندى. قازىر كۇدىكتىنىڭ ۇستىنەن كىسى ءولتىرۋ بابى بويىنشا قىلمىستىق ءىس قوزعالدى.
باقتيار تايجان.
دەرەك, فوتو: وڭتۇستىك قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
