قاراعاندى. 24 مامىر. تەمىرتاۋ قالاسىنداعى سامارقان سۋ قويماسىندا اكادەميالىق ەسكەك ەسۋدەن وتكەن قازاقستان كۋبوگى سىنى قاراعاندىلىق سپورتشىلاردىڭ جەڭىسىمەن اياقتالدى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
جارىسقا وڭتۇستىك قازاقستان, باتىس قازاقستان, قاراعاندى وبلىستارىنىڭ جانە استانا قالاسىنىڭ 78 سپورتشىسى قاتىستى. قاراعاندى وبلىسىنىڭ ەسكەك ەسۋشىلەرى جالپىكوماندالىق سايىستا ءبىرىنشى ورىندى جەڭىپ الدى.
قۇرامىندا 44 سپورتشى ونەر كورسەتكەن قاراعاندى وبلىسى كومانداسىنىڭ ەنشىسىنە 10 التىن, 4 كۇمىس جانە 5 قولا مەدال بۇيىردى.
ايتا كەتەيىك, وسى كۋبوك سىنىنا قاتىسقان قاراعاندىلىق ەسكەك ەسۋشىلەر سۆەتلانا گەرمانوۆيچ پەن ۆيتالي ۆاسيلەۆ بۇدان بۇرىن ريو-2016 وليمپياداسىنىڭ ليتسەنزياسىن جەڭىپ العان بولاتىن.
قايرات ءابىلدينوۆ.
دەرەك, فوتو: قاراعاندى وبلىستىق دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى.
