قوستانايدا قالالىق اۋرۋحانانىڭ ءتورت دارىگەرى ءىستى بولدى

قوستاناي. 24 مامىر. سوت الدىندا قوستاناي اۋرۋحاناسىنىڭ ءتورت دارىگەرى جاۋاپ بەرىپ, جازاسىن الدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. سوت الدىنا ۇستىنەن قىلمىستىق كودەكستىڭ 2 ءبولىمىنىڭ 114 بابى بويىنشا (1997 جىلعى رەداكتسيا) ءىس قوزعالعان قوستاناي قالالىق اۋرۋحاناسنىڭ دارىگەرلەرى ۆ.ۆەركو, پ.كوۆالەۆ, م.احماديەۆ, ا.پەتري كەلىپ, جاۋاپ بەردى. ولارعا اتالعان باپ بويىنشا «مەديتسينا قىزمەتكەرىنىڭ كاسىبي مىندەتىن ورىنداماعانى نەمەسە لايىقتى ورىنداماعانى, سول سەبەپتى اۋرۋعا ۇقىپسىز جانە ىقىلاسسىز قاراعانى, سونىڭ سالدارىنان ادام دەنساۋلىعىنا اۋىر زيان كەلتىرگەنى ءۇشىن» دەگەن ايىپ تاعىلدى. تەرگەۋ ماتەريالدارى بويىنشا, 2012 جىلى 18 قاڭتاردا 1995 جىلى تۋعان ش. دەگەن ازاماتشا جول اپاتىنان قالالىق اۋرۋحاناعا تۇسەدى. قىزعا «وڭ جاق قاباعى سوعىلعان, باسى جارالانعان, ميى شايقالعان» دەگەن دياگنوز قويىلادى. دارىگەرلەر كوۆالەۆ پەن احماديەۆتىڭ تەكسەرۋىنەن كەيىن قىزدى نەيروحيرۋرگيالىق بولىمشەگە اۋدارادى. جول اپاتىنا تۇسكەننەن كەيىن ەكى كۇن بويى قىزعا انتيبيوتيك دارىلەر ەگىلمەيدى. بولىمشە مەڭگەرۋشىسى ۆەركو انتيبيوتيكتى تەك 20 اقپان كۇنى عانا بەلگىلەيدى. بۇل كەزدە اۋرۋدىڭ جاراسى مەڭدەپ, جاعدايى ناشارلاپ كەتكەن بولاتىن. 19 جانە 20 اقپان كۇندەرى اۋرۋعا حيرۋرگ دارىگەر پەتري تاراپىنان قاراۋ بولماعان, كۇندەلىكتى باقىلاماعان. دارىگەرلەردىڭ نەمكەتتىلىگى مەن سالاقتىعىنان قىزدىڭ جاراسى ىرىڭدەپ, ءبىر بەتىن تۇگەل الىپ كەتەدى. بەت تەرىسىن ءبۇلدىرىپ, ءتۇرىنىڭ وزگەرۋىنە الىپ كەلەدى. قازىر جابىرلەنۋشى قارا كوزىلدىرىكسىز جۇرە المايتىن دارەجەگە جەتكەن. سوتتىڭ قاۋلىسى بويىنشا, كوۆالەۆ, مارات احماديەۆ, الەكساندر پەتري, ۆلاديمير ۆەركو كىنالى دەپ تابىلدى. ولاردىڭ ارقايسىسىن ءبىر جىل باس بوستاندىعىنان ايىرۋ, ءۇش جىلعا دەيىن مەديتسينا سالاسىندا جۇمىس ىستەۋدەن الاستاۋ جازاسى كەسىلدى. الايدا, قىلمىستىق كودەكستىڭ 71 بابىمەن تاعايىنلعان بۇل جازا ءىستىڭ ەسكىرگەنىنە, مەرزىمىنىڭ وتۋىنە بايلانىستى كۇشىن جويدى. حيرۋرگ-دارىگەر د.قاراعۇلوۆتىڭ ۇستىنەن قوزعالعان ءىس پروكۋروردىڭ قىلمىستىق ءىس جوقتىعىن ايتۋىنا وراي قىسقارتىلدى. سوت مورالدىق زيان كەلتىرگەنى ءۇشىن قوستاناي قالالىق اۋرۋحاناسىنان جابىرلەنۋشىنىڭ پايداسىنا 200 مىڭ تەڭگە جانە 62 582 تەڭگە ماتەريالدىق شىعىن وندىرۋگە ۇكىم شىعاردى. ءنازيرا جارىمبەتوۆا. دەرەك, فوتو: قوستاناي وبلىستىق سوتتىڭ ءباسپاسوز قىزمەتى.