«فوتوونەر» قوعامدىق بىرلەستىگى تاۋەلسىزدىكتىڭ 25 جىلدىعىنا ارنالعان «تاۋەلسىزدىك تاعىلىمى» اتتى ۇلتتىق جوبا اياسىندا وڭتۇستىك قازاقستان وبلىسىندا حالىقارالىق «TURKESTAN-2016» فوتوەكسپەديتسياسىن ۇيىمداستىرعان بولاتىن.
15 فوتوجۋرناليستەن تۇراتىن ەكسپەديتسيا قۇرامىندا قىتايدان دا ارنايى فوتوماماندار شاقىرىلدى. جىل سايىن ءداستۇرلى تۇردە ۇيىمداستىرىلىپ كەلە جاتقان شارا قازاقستاندىق فوتوشەبەرلەر مەن شەتەلدىك ارىپتەستەر دە قاتىساتىن فوتوەكسپەديتسيالاردىڭ جالعاسى بولىپ تابىلادى.
شىمكەنت قالاسىنداعى كوركەمسۋرەت گالەرەياسىندا بەلگىلى فوتوگراف شۇكىر شاحايدىڭ 50 جاسقا تولعان مەرەيتويىنا ارنالعان «شۇكىر شاحاي – 50ح50» جانە «ەل ماقتانىشتارى» فوتوكورمەسى اشىلدى. سونىمەن قاتار, كورمەگە بىرقاتار باسقا فوتوسۋرەت شەبەرلەرىنىڭ تۋىندىلارى قويىلدى.
«فوتوونەر» بىرلەستىگىنىڭ توراعاسى اسىلحان ابدرايىمنىڭ ايتۋىنشا, «TURKESTAN – 2016» ەكسپەديتسياسى نەگىزىنەن فوتومامانداردىڭ ءبىر-بىرىمەن ءوزارا تاجىريبە الماسۋىن ماقسات تۇتادى.
ايتا كەتەرلىگى, ەكسپەديتسياعا قىتايدان ارنايى شاقىرىلعان تانىمال فوتوجۋرناليستەر – التايلىق ارداق بەيىسحان ۇلى مەن تارباعاتايلىق اكپار ۇركىمباي ۇلى اتاجۇرتتىڭ ەجەلگى وركەنيەتتەر وشاعىنا اينالعان وڭتۇستىك ولكەسىندەگى تاريحي جەرلەرگە العاش رەت قادام باسىپ وتىر. قانداستارىمىز «فوتوونەر» قوعامدىق بىرلەستىگىنە وسىنداي رۋحاني لاززاتقا بولەگەندەرى ءۇشىن ريزاشىلىقتارىن ءبىلدىردى.
فوتوەكسپەديتسيا مۇشەلەرى ءۇش كۇن بويى تاريحي ورىندار شوعىرلانعان وتىرار اۋدانىنا, تۇركىستان قالاسىنا بارىپ, تۇلكىباس اۋدانىنداعى اقسۋ-جاباعىلى قورىعىن ارالادى.
ەكسپەديتسيا باعدارلاماسىنا سايكەس, تۇركى الەمىنىڭ كيەلى بەسىگى سانالاتىن تۇركىستانعا ارنايى اتباسىن بۇردى. 1396-1399 جىلدارى ءامىر تەمىردىڭ بۇيرىعىمەن قوجا احمەت ياسساۋي قابىرىنىڭ باسىنا تۇرعىزىلعان كەسەنە – ۇلكەن پورتالدى-كۇمبەزدى مەموريالدىق عيمارات, فوتوتىلشىلەر نازارىن اۋدارىپ, كوزدەرىنە وتتاي باسىلدى.
«TURKESTAN – 2016» فوتوەكسپەديتسياسى اقسۋ-جاباعىلىنىڭ 90 جىلدىق مەرەيتويىمەن ءدوپ كەلگەن ەكەن. اقسۋ-جاباعىلى – تالاس الاتاۋىنىڭ سولتۇستىك-باتىس بولىگىن جانە وگەم جوتاسىن الىپ جاتقان قازاقستانداعى تۇڭعىش قورىق. بۇگىندە اۋماعى 131 934 گەكتار القاپتى الىپ جاتقان قورىق يۋنەسكو-نىڭ دۇنيەجۇزىلىك قورىقتار تىزىمىنە ەنگەن. الەمدى تاڭىرقاتاتىن تابيعاتتىڭ تاماشا تۇكپىرىنە جەتكەندە فوتوەكسپەديتسياعا وبلىس اكىمى بەيبىت اتامقۇلوۆ قوسىلدى.
جالپى, «Turkestan-2016» حالىقارالىق فوتوەكسپەديتسياسى اياسىنداعى شارالار مۇنىمەن شەكتەلمەيدى. ويتكەنى, وسى ساپاردىڭ ءتۇيىنى بويىنشا ۇيىمداستىرۋشى «فوتوونەر» قوعامدىق بىرلەستىگى «مەنىڭ ەلىم – قازاقستان» فوتوبايقاۋىن قولعا الماقشى. ال, ەڭ باستىسى, بيىلعى ءىس-شارالاردىڭ قورىتىندىسى رەتىندە «تاۋەلسىزدىك تاعىلىمى – 25» فوتوكورمەسىن وتكىزۋ جوسپارلانعان. وندا قازاقستاننىڭ ەڭ ۇزدىك فوتوجۋرناليستەرى ۇسىناتىن 125 فوتوتۋىندى ەل تاۋەلسىزدىگىنىڭ 25 جىلدىعى اياسىندا پاش ەتىلىپ, بايقاۋ جەڭىمپازدارى جاريالاناتىن بولادى.
ەرلان وماروۆ,
«ەگەمەن قازاقستان»
سۋرەتتەردى تۇسىرگەن اۆتور
