شىمكەنتتە جوعالىپ كەتكەن 12 جاسار قىز تابىلدى

شىمكەنت. 23 مامىر. كەشە كەشكى ساعات 21:00 شاماسىندا ءىز-ءتۇزسىز جوعالىپ كەتكەن 12 جاسار بالنۇر ناسىر تابىلىپ, اتا-اناسىنا حابارى جەتكىزىلدى. بۇل تۋرالى قالالىق ىشكى ىستەر باسقارماسى ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى. بۇگىن, 23 مامىر كۇنى ساعات 15:30 شاماسىندا بالالار كەشە جوعالىپ كەتكەن بالنۇر ناسىردى تاراتىلعان باعىتتاما بويىنشا «نۇرسات» شاعىن اۋدانىنداعى كوپ قاباتتى ۇيلەردىڭ ءبىرىنىڭ جانىنان كورىپ, تانىپ قالعان. سوسىن وقۋشىلار وزدەرىنىڭ مۇعالىمدەرىنە قوڭىراۋ شالعان. وسىدان كەيىن وقىتۋشىلار قىزدى ءوزى وقيتىن مەكتەپكە ەرتىپ اكەلىپ, پوليتسياعا بولعان جاي تۋرالى حابار بەرگەن. ەسكە سالا كەتەيىك, 2016 جىلعى 22 مامىر كۇنى تۇندە شىمكەنت قالالىق ىشكى ىستەر باسقارماسىنا قاراستى قاراتاۋ پوليتسيا بولىمشەسىنە «نۇرسات» شاعىن اۋدانىندا تۇراتىن 34 جاستاعى ايەل ءوزىنىڭ 2004 جىلى تۋعان, №80 ورتا مەكتەپتىڭ 5-سىنىبىندا وقيتىن ناسىر بالنۇر باقىتجانقىزى ەسىمدى جاسى كامەلەتكە جەتپەگەن قىزىنىڭ ءىز-ءتۇزسىز جوعالىپ كەتكەنىن ايتىپ, شاعىمدانىپ كەلگەن. ول ۇيدەن 22 مامىر كۇنى ساعات 21:00 شاماسىندا شىعىپ كەتىپ, سودان قايتىپ ورالماعان. پوليتسەيلەر اتالمىش فاكتىنى تىركەۋگە الىپ, كامەلەتكە تولماعان بالنۇر ناسىردىڭ جۇرگەن جەرىن انىقتاۋ ءۇشىن وبلىستاعى بارلىق ىشكى ىستەر بولىمدەرىنە باعىتتامالار جىبەرگەن. پوليتسەيلەر تاڭەرتەڭنەن باستاپ جوعالعان قىز تۋرالى باعىتتامانى كوپشىلىك جۇرەتىن جەرلەرگە جاپسىرىپ شىققان. قازىر 12 جاسار قىزبەن پسيحولوگ ماماندار جۇمىس جاساپ جاتىر. بارلىق تەكسەرۋ پروتسەدۋراسىنان وتكەننەن كەيىن بالنۇر اتا-اناسىنا تابىس ەتىلەدى. باقتيار تايجان. دەرەك, فوتو: شىمكەنت قالالىق ىشكى ىستەر باسقارماسىنىڭ ءباسپاسوز قىزمەتى.