تاجىكستان حالقى پرەزيدەنتتىڭ ەلدى شەكسىز باسقارۋىنا كەلىسىم بەردى

استانا. 23 مامىر. تاجىكستان كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى رەفەرەندۋم ءوتتى دەپ ەسەپتەلدى. بۇل تۋرالى ريا «نوۆوستي» اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. جەرگىلىكتى ۋاقىت بويىنشا ساعات 12:00 كەزىندە حالىقتىڭ 66,6 پايىزى داۋىس بەردى. كونستيتۋتسيا بويىنشا, داۋىس بەرۋ قۇقىعىنا يە ازاماتتاردىڭ كەم دەگەندە 50 پايىزى داۋىس بەرۋگە قاتىسقان بولسا, رەفەرەندۋم وتكىزىلگەن بولىپ سانالادى. رەفەرەندۋمدا داۋىس بەرۋشىلەر «تاجىكستان كونستيتۋتسياسىنا وزگەرىستەر مەن تولىقتىرۋلار ەنگىزىلگەنىن قابىلدايسىز با؟» دەگەن سۇراققا جاۋاپ بەرۋلەرى ءتيىس. رەفەرەندۋم ساۋالاماسىندا تاجىكستان پرەزيدەنتى ەمومالي راحموننىڭ مەملەكەتتى شەك قويىلمايتىن مەرزىمگە باسقارۋى مەن پرەزيدەنتتىككە سايلانۋ جاس مولشەرىن 35-تەن 30 جاسقا ازايتۋ تۋرالى حالىقتىڭ كەلىسىمى سۇرالدى. وزگەرتۋلەردە سونداي-اق, شەتەلدەردەن قارجىلاندىراتىن ۇلتتىق نەمەسە ءدىني نەگىزدەگى پارتيالاردىڭ قۇرىلۋىنا تىيىم سالۋ جاعى قاراستىرىلعان. مالىمەتتەر بويىنشا, پرەزيدەنتتىك سايلاۋعا ءتۇسۋ ءۇشىن جاس مولشەرىن ازايتۋ ەمومالي راحموننىڭ ۇلى رۋستام راحمونعا 2020 جىلى 33 جاسقا تولعانىندا مۇمكىندىك بەرەدى. سايلاۋ ۋچاسكەلەرى جەرگىلىكتى ۋاقىت بويىنشا, ساعات 20:00-دە جابىلادى. الدىن الا قورىتىندىلارى بۇگىن جاريالانادى. ايتا كەتەيىك, تاجىكستان كونستيتۋتسياسى 1994 جىلى قابىلدانعان. ال 1994, 1999 جانە 2003 جىلدارى رەفەرەندۋم ارقىلى وزگەرتۋلەر ەنگىزىلىپ تۇردى. 2003 جىلعى وزگەرىس قازىرگى پرەزيدەنتتىڭ ەكى مارتە جەتى جىلدىق باسشى بولىپ قالۋىنا مۇمكىندىك بەرگەن ەدى. ايان ءابدۋالي. دەرەك, فوتو: ريا «نوۆوستي».