شاراينا
اقش-تا ەل پرەزيدەنتتىگىنە كانديداتتاردىڭ پرايمەريزى جالعاسىپ جاتقانى بەلگىلى. ماسەلەن, سەناتور-دەموكرات بەرني ساندەرس ورەگون شتاتىنداعى پرايمەريزدە ءوزىنىڭ باسەكەلەسى, بۇرىنعى مەملەكەتتىك حاتشى حيللاري كلينتوننان باسىم ءتۇستى. CBS News تەلەارناسىنىڭ دەرەكتەرىنە قاراعاندا, ساندەرس پارتيالاستارىنىڭ 53 پايىز داۋىسىن السا, كلينتوننىڭ كورسەتكىشى – 47 پايىز. سونىمەن ءبىر مەزگىلدە, كەنتۋككيدە كلينتون 47 پايىز داۋىس جيناسا, سايكەسىنشە, ساندەرسكە تيگەنى – 46 پايىز. ال رەسپۋبليكاشىلاردىڭ پرايمەريزىندە ورەگون شتاتىندا ميللياردەر دونالد ترامپ, ءتىپتى, 67 پايىز داۋىس الىپتى. اقش پرەزيدەنتىن سايلاۋ 8 قاراشادا وتەتىنىن ايتا كەتەيىك. ساۋديانى سوتقا بەرمەك ەدى... اقش كونگرەسىنىڭ سەناتى 2001 جىلدىڭ 11 قىركۇيەگىندە ۇيىمداستىرىلعان لاڭكەستىكتىڭ قۇرباندارى مەن زارداپ شەككەندەردىڭ وتباسىلارىنا ساۋد ارابياسىن سوتقا بەرۋگە رۇقسات ەتەتىن زاڭدى ماقۇلدادى. ەندى زاڭ جوباسىن كونگرەستىڭ وكىلدەر پالاتاسى ماقۇلداۋى ءتيىس. سودان كەيىن اقش پرەزيدەنتىنىڭ قولى قاجەت بولادى. ال قۇجات قاراۋدىڭ بارلىق ساتىسىنان «امان-ەسەن» وتكەن جاعدايدا ول شەت مەملەكەتتەردى اقش سوتتارىندا قاراعان كەزدە يممۋنيتەت ۇسىناتىن 1976 جىلعى قولدانىستاعى زاڭدى اينالىپ وتۋگە مۇمكىندىك بەرەدى. بىراق پرەزيدەنت ب.وباما قازىردىڭ وزىندە قۇجاتقا ۆەتو قوياتىنىن مالىمدەپ ۇلگەرگەن. ويتكەنى, اقش-تىڭ ساۋدياعا قارىزى باعالى قاعازدار مەن اكتيۆتەردى قوسا ەسەپتەگەندە 750 ميلليارد دوللاردى قۇرايتىن كورىنەدى.
ءتورت جىل بۇرىنعى دەڭگەيگە جەتتى
يراننىڭ مۇناي ەكسپورتى وتكەن ءساۋىر ايىندا 2012 جىلدىڭ باسىنداعى كورسەتكىشتەن دە اسىپ ءتۇسىپ, تاۋلىگىنە 2,3 ميلليون باررەلدى قۇرادى. بۇل – حالىقارالىق ەنەرگەتيكا اگەنتتىگىنىڭ بولجامىنان 15 پايىزعا جوعارى كورسەتكىش.
وسى مامىر ايىندا يران 2,1 ميلليون باررەل مۇناي ساتۋدى جوسپارلاپ وتىر ەكەن. بۇل – 2015 جىلمەن سالىستىرعاندا (1,3 ميلليون باررەل) ايتارلىقتاي ۇلكەن كورسەتكىش. ەكىنشى جاعىنان, يراندا «قارا التىندى» تاسىمالدايتىن تانكەرلەر سانى جەتكىلىكتى ەكەنى دە ايقىن اڭعارىلادى. جالپى, ەلدىڭ ەكسپورتى بارلىق باعىتتاردا وسە ءتۇسىپ وتىر ەكەن. سولاردىڭ قاتارىندا قىتاي جانە ەۋروپا ەلدەرى بار.
قىسقا قايىرىپ ايتقاندا:
- رەسەي كوممۋنيستەرى مەملەكەتتىك دۋماعا سايلاۋ كەزىندە يوسيف ءستاليننىڭ وبرازىن پايدالانباق نيەتتە. وسىلايشا, رفكپ وزدەرىنىڭ جاعىنا قوسىمشا ەلەكتورات تارتپاق. بۇل جونىندە رفكپ وك-ءنىڭ حاتشىسى سەرگەي وبۋحوۆ مالىمدەدى.
- پولشانىڭ بيلەۋشى «زاڭ جانە ادىلەتتىلىك» پارتياسىنىڭ سەركەسى ياروسلاۆ كاچينسكي اقش-تىڭ بۇرىنعى پرەزيدەنتى بيلل كلينتونعا, ول پولشادا دەموكراتيا نورمالارى ساقتالمايدى دەپ مالىمدەگەننەن كەيىن, دارىگەرگە كورىنۋدى ۇسىندى. يا.كاچينسكيدىڭ پىكىرىنشە, ەلدەگى دەموكراتيا اسا جوعارى دەڭگەيدە.
- لۋكويل باسشىسى ۆاگيت الەكپەروۆ «روسسيا-24» تەلەارناسىنا سۇحباتىندا مالىمدەگەنىندەي, ۇستىمىزدەگى جىلى مۇناي باعاسى شامامەن 45-55 دوللار ارالىعىندا تەربەلىپ تۇراتىن بولادى. ال جىلدىڭ سوڭىنا قاراي, بۇل تابالدىرىق جوعارىلاۋى ىقتيمال.
- اقش-تىڭ سولتۇستىك-شىعىسىندا مەتەوريتتىڭ قۇلاعانى تىركەلگەن. اۋادا وتتى ءىزدى بەينەكامەرالار ءتۇسىرىپ الىپتى. اتاپ ايتقاندا, مەن شتاتىنداعى پورتلەند پوليتسيا باسقارماسىنداعىلار پاترۋلدىك قىزمەتكەر تۇسىرگەن بەينەجازبانى جاريالاپ ۇلگەردى. مەتەوريتتىڭ كولەمى شاعىن عانا – اۆتوكولىك شامالاس.
حوك باسشىسىنىڭ ۇستانىمى قاتال
حالىقارالىق وليمپيادا كوميتەتىنىڭ (حوك) باسشىسى توماس باح رەسەي قۇراماسى ۇستىمىزدەگى جىلى برازيليانىڭ ريو-دە-جانەيرو قالاسىندا وتەتىن وليمپيا ويىندارىنان الاستاتىلۋى مۇمكىن ەكەنىن جوققا شىعارمايدى.
ونىڭ سوزىنە قاراعاندا, ەگەر «دوپينگتىك باعدارلامانىڭ» بولعانى تۋرالى ايىپ راستالاتىن بولسا, رەسەي قۇراماسىنىڭ وليمپياداعا جىبەرىلمەۋى ابدەن مۇمكىن. «حوك جاۋاپكەرشىلىككە تەك جەكەلەگەن سپورتشىلاردى عانا ەمەس, سونداي-اق, ونىڭ توڭىرەگىندەگىلەردى دە تارتاتىنىنا كۇمان بولماۋى ءتيىس», دەپ مالىمدەدى ت.باح. ءسويتىپ, ايىپ تاعىلعان سپورتشىلار وليمپيادالارعا ءومىر باقي قاتىستىرىلماۋىنان باستاپ, رەسەي جەڭىل اتلەتيكا فەدەراتسياسىنا ايتارلىقتاي ايىپپۇل دا سالىنۋى ىقتيمال.
چاۆەستىڭ ولىمىنە كىم كىنالى؟
ۆەنەسۋەلا پرەزيدەنتى ۋگو چاۆەس كوز جۇمعان راك اۋرۋى ونىڭ اعزاسىندا تابيعي جولمەن پايدا بولماعان, جاساندى تۇردە تۋىنداعان, دەپ ەسەپتەيدى وسى ەلدىڭ ۆيتسە-پرەزيدەنتى اريستوبۋلو يستۋريس. ول ءوزىنىڭ وسىنداي كوزقاراسىن ەل استاناسى – كاراكاستا وتكەن دەنساۋلىق ساقتاۋ سالاسى قىزمەتكەرلەرىنىڭ جيىنىندا ءبىلدىردى.
ۆيتسە-پرەزيدەنتتىڭ سوزىنە قاراعاندا, بۇل – بوليۆاريان رەۆوليۋتسياسىن اياقتان شالىپ, «دوللار ديكتاتۋراسىنا» قاتەر توندىرەتىن بالامالى قارجى ءتارتىبىن قالىپتاستىرۋدى توقتاتۋ ماقساتىندا جاسالعان قادام. ا.ءيستۋريستىڭ پىكىرىنشە, چاۆەس الەمدىك ءىرى قارجى ورتالىقتارى ءۇشىن №1 جاۋعا اينالىپ, وسى سەبەپتى ادەيى ءولتىرىلىپ وتىر. «بىراق, – دەيدى ول, – مۇنى ءبىز بىلگەنىمىزبەن, دالەلدەي المايمىز». ۋ.چاۆەس 2013 جىلدىڭ ناۋرىزىندا 58 جاسىندا قايتىس بولعان ەدى.
[caption id="attachment_40719" align="alignleft" width="224"]
man with map over tourist attraction[/caption]
رەسەي تۋريستەرىنىڭ تاڭداۋى – پراگا
رەسەي تۋريستەرى ءۇشىن ەڭ تارتىمدى قالا پراگا كورىنەدى. چەحيانىڭ استاناسىنا بارعان تۋريستەر ورتاشا ەسەپپەن العاندا جامباسپۇلعا تاۋلىگىنە 58 ەۋرودان تولەيدى ەكەن. ەكىنشى ورىندا – مينسك, ءۇشىنشى ورىندا پاريج تۇر. العاشقى وندىققا, سونداي-اق, ريگا, باكۋ, تاللين, ريم, بارسەلونا, حەلسينكي جانە لوندون كىرەدى.
ال رەسەيلىكتەر ءۇشىن ەلدەگى قالالاردىڭ اراسىندا ماسكەۋ ءبىرىنشى ورىن الادى. ودان كەيىنگى كەزەكتە سانكت-پەتەربۋرگ پەن قازان ورنالاسقان. العاشقى وندىققا, سونىمەن قاتار, نيجني نوۆگورود, ەكاتەرينبۋرگ, كالينينگراد, ياروسلاۆل, پەتروزاۆودسك, يركۋتسك جانە دونداعى روستوۆ قالالارى ەنىپ وتىر. سونداي-اق, تانىمال شاعىن قالالار قاتارىندا ماسكەۋ تۇبىندەگى سەرپۋحوۆ, لەنينگراد وبلىسىنداعى پريوزەرسك جانە ۆلاديمير وبلىسىنداعى كونە سۋزدال بار.
ينتەرنەت ماتەريالدارى نەگىزىندە ازىرلەندى
