ءوزىن ءوزى باسقارۋدى دامىتۋ – ۋاقىت تالابى

مەملەكەت باسشىسى نۇرسۇلتان نازارباەۆ ۇسىنعان «100 ناقتى قادام» ۇلت جوسپارىنىڭ ەلىمىزدى دامىتۋداعى ءرولى ايرىقشا. وندا اتاپ كورسەتىلگەن ماسەلەلەردىڭ بار­لىعى دا وزىندىك مانگە يە. ماسەلەن, ۇلت جوسپارىنداعى 97-قا­دامنىڭ تالاپتارى الدىمىزعا كوپتەگەن مىندەتتەردى قويىپ وتىر. بۇل ءمىن­دەتتەردى جۇزەگە اسىرۋدىڭ وزەكتىلىگىن بارشا قازاقستاندىقتار جەتە تۇسىنەدى دەپ ويلايمىز. جالپى, 97-قادام جەرگىلىكتى ءوزىن ءوزى باسقارۋدى دامىتۋ ار­­­قىلى ازاماتتاردىڭ شەشىم قابىلداۋ ۇدەرىسىنە قاتىسۋ ءمۇم­كىندىگىن كەڭەيتۋگە جول اشادى. وسى ورايدا 2015 جىلدىڭ 2 قاراشاسىندا جەرگىلىكتى ءوزىن ءوزى باسقارۋ ورگاندارىنىڭ قۇزىرەتىن كەڭەيتۋ بويىنشا سايكەس نورما­لارىن ەنگىزەتىن «قازاقستان رەس­پۋبليكاسىنىڭ كەيبىر زاڭ­نا­ما­لىق اكتىلەرىنە قازاقستان رەس­پۋبليكاسىندا جەرگىلىكتى ءوزىن ءوزى باس­قارۋدى دامىتۋ ماسەلەلەرى  بويىنشا وزگەرىستەر مەن تولىقتىرۋلار ەن­گىزۋ تۋرالى» زاڭ قابىلدانعان بولاتىن. ۋاقىت تالابىنا ساي قابىلدانعان بۇل زاڭناما اياسىندا جەرگىلىكتى قوعامداستىق جينالىسىنا اكىم­دەردىڭ كانديداتۋرالارىن قىزمەتكە تاعايىنداۋعا كەلىسىم بەرۋ, كوم­مۋنالدىق مەنشىكتى باسقارۋ, اكىمدەرگە جەر رەسۋرستارىن باسقارۋ بويىنشا وكىلەتتىكتەرىن بەرۋ جونىندەگى نورمالار قاراستىرىلعان. سونداي-اق, قالا تۇرعىندارىن جەر­گىلىكتى ماڭىزى بار ماسەلەلەردى شەشۋ ءۇشىن استانادا, رەسپۋبليكالىق جانە وبلىستىق ماڭىزى بار قالالاردا جەرگىلىكتى ءوزىن ءوزى باسقارۋدىڭ اۋماقتىق كەڭەستەرىن قۇرۋ ماسەلەلەرى قامتىلعان. اتالعان كەڭەستەردىڭ نەگىزگى مىندەتى – بيلىكتىڭ اتقارۋشى جانە وكىلەتتى ورگاندارى ارقىلى ازاماتتاردى تكش ماسەلەلەرىن شەشۋگە, قۇقىق بۇزۋشىلىقتىڭ الدىن الۋعا تارتۋ. وسى ارادا 97-قادام تالاپتارىن جۇزەگە اسىرۋ باعىتىنداعى, ياعني اۋدان اكىمىنىڭ اۋىل اكىمىنىڭ كانديداتۋراسىن جەرگىلىكتى قوعامداستىق جينالىسىنىڭ شەشىمىمەن كەلىسۋ جانە ونى قىزمەتتەن بوساتۋ ماسە­لەسىن كوتەرۋ جونىندەگى نورمالاردى, جەرگىلىكتى ءوزىن ءوزى باسقارۋ ماسەلەلەرى جونىندەگى ۋاكىلەتتى ورگاندى انىقتاۋ­دى, استانادا, وبلىستىق جانە رەسپۋبليكالىق ما­ڭى­زى بار قالالارداعى تۇر­عىن ءۇي-كوممۋنالدىق شا­رۋاشىلىقتىڭ جۇمىس ىستەۋى, اۋماقتىڭ سانيتاريالىق جاي-كۇيى مەن قۇقىق بۇزۋشىلىقتاردىڭ الدىن الۋ ماسەلەلەرىن شەشۋ ءۇشىن جەرگىلىكتى ءوزىن ءوزى باسقارۋدىڭ اۋماقتىق كەڭەستەرىن قۇرۋدى قاراستىراتىن بىرقاتار ماڭىزدى قۇجاتتار قابىلدانعانىن ايتا كەتەيىك. وسى قۇجاتتاردىڭ بارلىعى جەرگىلىكتى ءوزىن ءوزى باسقارۋدى دامىتۋ جۇمىستارىن جۇيەلى تۇردە جۇرگىزۋگە مۇمكىندىك بەرەدى. تاعى ءبىر توقتالا كەتەر جايت, جەرگىلىكتى ءوزىن ءوزى باسقارۋدى دامىتۋ كەزەڭ-كەزەڭمەن ىسكە اسىرىلاتىن بولادى. ءبىرىنشى كەزەڭدە اۋداندىق ماڭىزى بار قالا, اۋىل, كەنت جانە اۋىلدىق وكرۋگ دەڭگەيىندە دەربەس بيۋدجەتىمەن جانە جەكە­مەنشىگىمەن تولىققاندى ءوزىن ءوزى باسقارۋدى قۇرۋ كوز­دەلەدى. ناقتىلاي ايتقاندا, پرەزيدەنت جانىنداعى جاڭعىرتۋ جونىندەگى ۇلتتىق كوميسسيانىڭ ۇسىنىسىنا سايكەس جەرگىلىكتى ءوزىن ءوزى باسقارۋدىڭ دەربەس بيۋدجەتىن جانە جەكەمەنشىگىن ەنگىزۋ 2018 جىلدان باستاي وتىرىپ كەزەڭدەرمەن ىسكە اسىرۋعا ۇسىنىلىپ وتىر. بۇل ۇسىنىستاردى ءارى قاراي جەتىلدىرۋ ماقساتىندا ۇلتتىق ەكونوميكا مينيستر­لىگىندە زاڭ جوباسىن ازىرلەۋ بويىنشا جۇمىس باستالىپ, ونىڭ شەڭبەرىندە ەلىمىزدەگى جەرگىلىكتى ءوزىن ءوزى باسقارۋ جۇيەسىن ءارى قاراي دامىتۋدىڭ نەگىزگى تۇ­جى­رىمدامالىق باعىتتاردىڭ شەشىلۋى قاراستىرىلادى. اتالعان زاڭنامانى ازىرلەۋ بارىسىندا ەىدۇ ەلدەرىنىڭ تاجىريبەسى زەرتتەلەتىن بولادى, سونداي-اق, حالىق­ارالىق جانە وتاندىق مەملەكەتتىك ەمەس ۇيىمداردىڭ ۇسىنىستارى دا ەسكەرىلەدى. مارعۇلان ەرماعانبەت ۇلى, ۇلتتىق ەكونوميكا مينيسترلىگىنىڭ وڭىرلىك ساياسات جانە جەرگىلىكتى ءوزىن ءوزى باسقارۋدى دامىتۋ دەپارتامەنتى جەرگىلىكتى ءوزىن ءوزى باسقارۋدى دامىتۋ باسقارماسىنىڭ باسشىسى